អែនឌី ត្រៀមពញ្ញាក់អារម្មណ៍អ្នកគាំទ្រជាមួយចម្រៀងចាស់ដ៏ល្បីរបស់ខ្លួន

2017-08-31 09:10:27
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀង និងសម្ដែង អែនឌី បានប្រាប់ Sabay នាពេលថ្មីៗនេះ ថាលោកត្រៀមផលិតចម្រៀងចាស់របស់ខ្លួនមួយបទឡើងវិញ ដែលធ្លាប់ទទួលបានការគាំទ្រខ្លាំង។

លោកបាន ឲ្យដឹងថាចម្រៀងដែលលោកត្រៀមយកមកផលិតឡើងវិញគឺបទ "នឹកបង៥០%ផង" ដែលនិពន្ធទំនុកភ្លេង និងទំនុកដោយលោកផ្ទាល់តែម្ដង។ ជាមួយការត្រឡប់មកវិញនេះ អែនឌី បញ្ជាក់ថា Version ថ្មីនេះនឹងមានការកែកុនខ្លះទៅលើ ទំនុកភ្លេង ដែលធ្វើឲ្យស្ដាប់ទៅកាន់តែជក់ចិត្ត។ មិនត្រឹមតែប៉ុណ្ណោះ លោកនឹងមានត្រៀមចេញជា MV ទៀតផង។

តួសម្ដែងសិចស៊ីរូបនេះ លោកឡើងពីមូលហេតុថា ដោយសារតែបទនេះធ្លាប់ទទួលបានការគាំទ្រច្រើននាពេលកន្លងមក ដោយមានអ្នកគាំទ្រមួយចំនួនយកទៅ Cover ហើយខ្លះទៀតយកទៅធ្វើជាវីដេអូ។

"ណាមួយបងនឹកស្ដាយដែរ ដែលតាំងពីនោះមកបងមិនដែលមានចេញ MV ទេ ទើបលើកនេះបងត្រៀមចេញមកជាមួយ MV តែម្ដង ហើយក៏ចង់ឲ្យក្មេងៗជំនាន់ក្រោយបានស្គាល់បទនេះដែរ"។ អែនឌី បន្ថែម។

តារាប្រុសខាងលើរំលឹកថាបទនេះ "នឹកបង៥០%ផង" គឺជាសំនៀងផ្ទាល់របស់លោកដែលច្រៀងនៅក្នុងផលិតកម្ម "អង្គរវត្ត" កាលពីប្រមាណជាង១០ឆ្នាំមុន តែសម្រាប់ការផលិតចម្រៀង និងMVថ្មីនេះ គឺមិននៅក្រោមផលិតកម្មណាឡើយ។ "ពេលនេះខ្ញុំជាតារាឯករាជ្យ មិនមានកុងត្រានឹងផលិតកម្មណាទេ អាចថតភាពយន្ត ឬMV ឲ្យផលិតកម្មផ្សេងៗបានទាំងអស់"។ លាវ ពិសិដ្ឋ ហៅ អែនឌី បញ្ជាក់។

លោកបានបន្តទៀតថា មុននឹងចេញ MV លោកក៏ត្រៀមបង្ហាញជូនប្រិយមិត្តនូវ Trailer ពិសេសមួយជាមួយបទដដែលនេះ លើសពីនោះលោកក៏នឹងត្រៀមផលិតចម្រៀងថ្មីៗជាបន្តបន្ទាប់ដែរ៕

អត្ថបទ៖ សុខណា