Neymar ថា Coutinho កំពុងខូចចិត្តជាទម្ងន់

2017-09-01 13:26:05
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែប្រយុទ្ធស្លាបថ្លៃជាងគេក្នុងកំណត់ត្រាបាល់ទាត់ Neymar Jr. ក្នុងថ្ងៃនេះបានបង្ហើបថាកីឡាកររួមសញ្ជាតិប្រេស៊ីលជាមួយខ្លួន ខ្សែបម្រើប្រយុទ្ធ Philippe Coutinho កំពុងស្ថិតក្នុងសភាពខូចចិត្ត អស់សង្ឃឹម និងក្រៀមក្រំ បន្ទាប់ពីមិនអាចផ្ទេរទៅក្លឹបអ្នកមានបុណ្យ Barcelona បានដូចបំណង។

អតីតខ្សែប្រយុទ្ធឆ្នើមរបស់ក្លឹបអ្នកមានបុណ្យ Neymar បានថ្លែងប្រាប់សារព័ត៌មានប្រេស៊ីល esporte ថា៖ "វាជារឿងគួរឲ្យសោកស្ដាយ! ពេលវេលានេះ (បើផ្ទេរទៅ Barca បានសម្រេច) គួរតែជាពេលដែលគេ (Coutinho) និងក្រុមគ្រួសាររបស់គេសប្បាយចិត្ត ប៉ុន្តែវាបែរជាក្លាយជាពេលនៃភាពខូចចិត្ត អស់សង្ឃឹម និងក្រៀមក្រំសម្រាប់គេទៅវិញ"។

កីឡាករវ័យ ២៥ឆ្នាំរូបនេះបានបន្តទៀតថា៖ "ខ្ញុំចង់ឃើញគេ (Coutinho) សប្បាយចិត្ត ពីព្រោះគេជាមិត្តរួមក្រុម និងជាមិត្តភ័ក្ដិរបស់ខ្ញុំជាយូរណាស់មកហើយ"។ បើទោះជាត្រូវមិត្តរួមក្រុមនៃក្រុមជម្រើសជាតិខ្លួនថាបែបនេះក៏ដោយ ក្នុងថ្ងៃនេះ Coutinho បានស៊ុតបញ្ចូលទីបានមួយគ្រាប់ ដែលជួយឲ្យប្រេស៊ីល យកឈ្នះ Ecuador ក្នុងលទ្ធផល ២ទល់នឹង០។ ការបង្ហាញខ្លួននេះ ជាការបង្ហាញខ្លួនដំបូងរបស់កីឡាករសញ្ជាតិប្រេស៊ីលរូបនេះ បន្ទាប់អវត្តមានអស់ជាច្រើនសប្ដាហ៍ក្នុងការលេងឲ្យក្លឹបហង្សក្រហម Liverpool ដោយសារបញ្ហារបួសខ្នង។

ក្លឹបយក្សអេស្ប៉ាញ Barcelona មានរយៈពេលប៉ុន្មានម៉ោងទៀតនាយប់នេះ ដើម្បីព្យាយាមធ្វើឲ្យការផ្ទេរនេះឲ្យទទួលបានជោគជ័យ ដោយសារទីផ្សារដោះដូរកីឡាករនៅក្នុងប្រទេសអេស្ប៉ាញនឹងបិទនៅម៉ោង ១១យប់នេះ (ម៉ោងប្រទេសអេស្ប៉ាញ) ខណៈទីផ្សារនេះត្រូវបានបិទស្ថាពរហើយក្នុងប្រទេសអង់គ្លេសកាលពីថ្ងៃម្សិលមិញ។

ទោះជាយ៉ាងណាក៏ដោយ ការផ្ទេរនេះហាក់មិនអាចទៅរួចឡើយ ដោយសារចំហរឹងមាំរបស់ Liverpool ក្នុងការមិនលក់កីឡាកររូបនេះ ហើយណាមួយក្លឹបអ្នកមានបុណ្យ Barca ទើបតែទិញបានខ្សែប្រយុទ្ធស្លាបវ័យក្មេងសញ្ជាតិបារាំង Ousmane Dembele ពី Dortmund ក្នុងតម្លៃរហូតដល់ទៅ ១០៥លានអឺរ៉ូកាលពីពេលថ្មីៗនេះ ដែលទាំងនេះជាហេតុធ្វើឲ្យ Coutinho អាចនឹងបន្តលេងឲ្យក្លឹបហង្សក្រហមទៀតនារដូវកាលនេះ៕

ប្រភព៖ Dailymail ប្រែសម្រួល៖ ហ៊ីម រស្មី