កូនខ្មែរមិនគួររំលង! ទស្សនាផ្ទាំងទស្សនីយភាពដ៏អស្ចារ្យពីល្ខោនខោល ៣តំបន់ (វីដេអូ)

2017-09-05 03:03:25
ចំនួនមតិ 0 | ចំនួនចែករំលែក 0

ចន្លោះមិនឃើញ

ផ្ទាំងទស្សនីយភាពល្ខោនខោល៣តំបន់បញ្ចូលគ្នា ដែលបានសម្ដែងក្នុងកម្មវិធី «ស្នាដៃ និងអនាគត» លើកទី៥ យប់មិញនេះ ធ្វើឱ្យអ្នកទស្សនាប្លែកអារម្មណ៍ជាខ្លាំង ដោយសារតែទេពកោសល្យដ៏អស្ចារ្យរបស់សិល្បករដែលមកពីតាមតំបន់រៀងៗខ្លួន។

លោក ហង់ ភូមរ៉ា គ្រូដឹកនាំក្រុមល្ខោនភ្នំពេញ បានប្រាប់ Sabay ថា លោកសប្បាយចិត្តណាស់ដោយសារតែការសម្ដែងលើកនេះទទួលបានជោគជ័យខ្លាំងទាំងការសម្ដែង និងទាំងការគាំទ្រច្រើនពីភ្ញៀវចូលទស្សនា។ លោកថាការខិតខំប្រឹងប្រែងរបស់លោក និងសិល្បករទាំងអស់មិនអស់សង្ឃឹមឡើយ។

“ក្រុមរបស់បងមកនេះអ្នកខ្លះអត់បានរៀនល្ខោនទេ គឺរៀនជំនាញផ្សេងៗ តែពួកគេអាចសម្ដែងបានយ៉ាងល្អហើយជោគជ័យទៀត បងសប្បាយចិត្តខ្លាំងណាស់”។

ចំណែក លោក ប៉ូច ផៃ តំណាងក្រុមល្ខោនមកពីវត្តស្វាយអណ្ដែតបានឱ្យដឹងថា ការសម្ដែងនេះ ក្រុមសិល្បករខាងលោកមិនសូវមានពេលវេលាគ្រប់គ្រាន់ហាត់សមទេ ដោយសារតែពួកគេភាគច្រើនជាសិស្ស ហើយអ្នកខ្លះត្រូវត្រៀមប្រឡងផង។ តែជាលទ្ធផលពួកគេសម្ដែងបានល្អ គ្រាន់តែមានការហត់បន្តិច។

រីឯលោក ញឹក កុសល គ្រូដឹកនាំក្រុមល្ខោនមកពីខេត្តកំពង់ធំវិញ បានឱ្យដឹងថា ក្រុមល្ខោននៅខេត្តលោកកើតមានក្នុងអំឡុងឆ្នាំ១៩៨៤។ លោកថាកាលពីមុនល្ខោនក្នុងខេត្តនេះមានប្រុសតែតួយក្សនិងតួស្វាតែប៉ុណ្ណោះ សល់ប៉ុន្មានសុទ្ធតែស្រី តែមកដល់បច្ចុប្បន្នបង្កើតឱ្យមានតួប្រុសទាំងអស់។ លោកបញ្ជាក់ថា រាល់ការប្រឡងជាលក្ខណៈជាតិក្ដី និងអន្តរជាតិក្ដីតាំងឆ្នាំ១៩៩០មក ក្រុមលោកតែងទទួលបានជ័យលាភីពានមាស លេខ១ លេខ២ និងបានជាប់ជាល្ខោនខោលស្នាដៃឆ្នើម ថែមទៀតផង។

ការសម្ដែងល្ខោនខោលកាលពីយប់មិញនេះត្រូវបានបែងចែកជា៣វគ្គ ក្នុងវគ្គទី១ ល្ខោនមកពីខេត្តកំពង់ធំ ត្រង់ឈុតបុប្ផការតាំងសិល្ប៍ស្នាដៃនេះជាស្នាដៃឆ្នើមទទួលបានជ័យលាភី២ ទូទាំងប្រទេសឆ្នាំ២០១៧។ វគ្គទី២ ល្ខោនវត្តស្វាយអណ្ដែត ត្រង់ឈុតពលព្រះរាម ពលយក្ស និងទី៣ល្ខោនខោលភ្នំពេញ ត្រង់ឈុតកំណើតរាមលក្ខណ៍ ជប់លក្ខណ៍។

ស្ថាបនិករីកសាយជាក្រុមរៀបចំការសម្ដែងនេះ លោក ឡោ វុឌ្ឍី បានឱ្យដឹងថា ការសម្ដែងថ្ងៃនេះទទួលបានជោគជ័យខ្លាំងគួរឱ្យកត់សម្គាល់ ដោយអ្នកចូលរួមទស្សនាមានប្រមាណជាជាង៥០០នាក់។ លោកបញ្ជាក់ថា ការសម្ដែងទស្សនីយភាពស្នាដៃ និងអនាគត ធ្វើរយៈពេលប្រាំឆ្នាំមកនេះ ឆ្នាំដែលទទួលបានជោគជ័យខ្លាំងជាងគេ គឺឆ្នាំទី៣ដោយធ្វើរយៈពេល២ថ្ងៃ ទទួលបានភ្ញៀវប្រមាណ១ពាន់នាក់ ហើយនិងឆ្នាំទី៥នេះធ្វើ១ថ្ងៃ ទទួលបានភ្ញៀវជាង៥០០នាក់។

លោកបញ្ជាក់ថាឆ្នាំក្រោយអាចនឹងមានកម្មវិធី «ស្នាដៃ និងអនាគត» លើកទី៦បន្តទៀត ហើយទម្រង់សិល្បៈដែលអាចនឹងមានវត្តមាននៅពេលនោះ អាចមានទម្រង់ "ល្ខោនខោល” "ល្ខោនពោលស្រី" និងទម្រង់ "យីកេ"។

អត្ថបទៈ ប៉ូ សាគុន