មកស្គាល់ប្រទេសទាំង ៩ ដែលមានអាវុធនុយក្លេអ៊ែរ
- 2017-09-04 13:51:13
- ចំនួនមតិ 0 | ចំនួនចែករំលែក 0
មកស្គាល់ប្រទេសទាំង ៩ ដែលមានអាវុធនុយក្លេអ៊ែរ
ចន្លោះមិនឃើញ
អាវុធនុយក្លេអ៊ែរ ជាអាវុធដែលសាហាវដែលតែងតែគំរាមកំហែងដល់សន្តិសុខពិភពលោក និងមនុស្សជាតិទាំងមូល ដោយសារតែឥទ្ធិពលនៃការបំផ្លាញរបស់វាមានទំហំធំធេងណាស់ ធំរហូតដល់មិនអាចនឹកស្មានដល់។ ប្រទេសកូរ៉េខាងជើងកាលពីម្សិលមិញ បានសម្រេចការសាកល្បងប្រកបដោយភាពជោគជ័យនូវគ្រាប់បែកនុយក្លេអ៊ែរ ប្រភេទអ៊ីដ្រូហ្សែន (H-Bomb) នៅភាគឦសានប្រទេសខ្លួន ហើយគ្រាប់បែកប្រភេទនេះ អាចបំពាក់លើក្បាលកាំជ្រួចអន្តរទ្វីប មានអានុភាពខ្លាំងជាងគ្រាប់បរមាណូទម្លាក់នៅទីក្រុង Hiroshima ប្រទេសជប៉ុន ក្នុងជំនាន់សង្គ្រាមលោកលើកទី២ រហូតដល់ ៨ដងឯណោះ។ ដូច្នេះ អត្ថបទនេះនឹងរៀបរាប់ប្រាប់ប្រិយមិត្តពីប្រទេសទាំង ៩ ដែលមានអាវុធនុយក្លេអ៊ែរ មានដូចតទៅ៖
១.កូរ៉េខាងជើង៖ ប្រទេសអាស៊ីមួយនេះដែលទើបតែសាកល្បងអាវុធនុយក្លេអ៊ែររបស់ខ្លួនកាលពីម្សិលមិញ មានអាវុធប្រភេទនេះចន្លោះពី ១០ទៅ ២០ បើទោះជារបាយការណ៍របស់សហរដ្ឋអាមេរិកថាប្រទេសឯកោមួយនេះ អាចមានក្បាលគ្រាប់នុយក្លេអ៊ែររហូតដល់ ៦០ ឯណោះ។ ប្រទេសមួយនេះធ្វើការបាញ់សាកល្បងអាវុធនុយក្លេអ៊ែរដំបូងរបស់ខ្លួនកាលពីឆ្នាំ ២០០៦។
២.អ៊ីស្រាអែល៖ បើតាម Arms Control Association ប្រទេសនៅមជ្ឈិមបូព៌ាមួយនេះ មានក្បាលគ្រាប់នុយក្លេអ៊ែរចំនួន ៨០ គ្រាប់។
៣.ឥណ្ឌា៖ មានចំនួនក្បាលគ្រាប់នុយក្លេអ៊ែរចំនួន ១២០ ទៅ ១៣០គ្រាប់ ហើយការបាញ់ល្បងលើកដំបូងប្រព្រឹត្តទៅកាលពីជាង ៤០ឆ្នាំមុន។
៤. ប៉ាគីស្ថាន៖ មានក្បាលគ្រាប់លើសឥណ្ឌាបន្តិចបន្តួច ដែលមានចន្លោះពី ១៣០ ទៅ ១៤០គ្រាប់។
៥.ចក្រភពអង់គ្លេស៖ មានក្បាលគ្រាប់នុយក្លេអ៊ែរចំនួន ២១៥គ្រាប់។
៦.ចិន៖ មានក្បាលគ្រាប់ប្រភេទនេះចំនួន ៥៥គ្រាប់លើសចក្រភពអង់គ្លេស ពោលគឺ ២៧០គ្រាប់។
៧.បារាំង៖ មានក្បាលគ្រាប់នុយក្លេអ៊ែរចំនួន ៣០០គ្រាប់ ហើយបានសាកល្បងលើកដំបូងកាលពីឆ្នាំ ១៩៦០។
៨. សហរដ្ឋអាមេរិក៖ មានក្បាលគ្រាប់នុយក្លេអ៊ែរច្រើនជាងប្រទេសទាំង ៧ខាងលើបូកបញ្ចូលគ្នាទៅទៀត ដែលមានរហូតដល់ទៅ ៦៨០០គ្រាប់។
៩.រុស្ស៊ី៖ ក្បាលគ្រាប់នុយក្លេអ៊ែរក្នុងប្រទេសធំជាងគេលើលោកមួយនេះ មានចំនួន ៧០០០គ្រាប់ ខណៈ ២០០០គ្រាប់ត្រូវបានដាក់ពង្រាយ។
គួរបញ្ជាក់ផងដែរ នៅក្នុងសម័យសង្គ្រាមត្រជាក់ អាវុធនុយក្លេអ៊ែរមានរហូតទៅដល់ ៧០០០០ ក្នុងអំឡុងទសវត្សឆ្នាំ ១៩៨០ ប៉ុន្តែចំនួននេះបានធ្លាក់ចុះយ៉ាងខ្លាំងបន្ទាប់ពីការដួលរលំនៃសហភាពសូវៀតក្នុងឆ្នាំ ១៩៩១៕