ដឹងអត្ថន័យពិធីសែនក្បាលទឹក ដែលជាពេលបើកទ្វារលែងព្រលឹងខ្មោច ១ខែ

2017-09-05 06:38:55
ចំនួនមតិ 0 | ចំនួនចែករំលែក 0

ចន្លោះមិនឃើញ

តាមជំនឿប្រពៃណីជនជាតិចិន បានជ្រើសយកថ្ងៃទី១៥ នៃខែទី៧ ក្នុងប្រតិទិនចន្ទគតិ(ឆ្នាំនេះ ត្រូវនឹងថ្ងៃទី៥ ខែកញ្ញា) ដើម្បីប្រារព្ធពិធីសែនក្បាលទឹក មិនខុសគ្នាប៉ុន្មានពីជំនឿបុណ្យភ្ជុំបិណ្ឌរបស់ខ្មែរ។ ព្រលឹងខ្មោចទាំងឡាយនឹងត្រូវដោះលែងឲ្យមានសេរីភាព និងធ្វើដំណើរមកឋានមនុស្សរយៈពេល១ខែ ដើម្បីស្វែងអាហារ និងគ្រឿងសំណែនផ្សេងៗពីកូនចៅ។

តាមជំនឿជនជាតិចិន និងអ្នកជាប់សែស្រឡាយចិន គិតថា ពេញមួយខែ នៃពិធីសែនក្បាលទឹក ឋាននរកនឹងបើកចំហឲ្យព្រលឹងខ្មោចទាំងឡាយ មករកញាតិសន្ដាន និងចំណីអាហារគ្រឿងសំណែនផ្សេងៗពីកូនចៅ។ នៅឆ្នាំ២០១៧ នេះ ខែសែនក្បាលទឹក ឬ Ghost Month គឺរាប់ចាប់ពីថ្ងៃទី២២ ខែសីហា រហូតដល់ ១៩ខែកញ្ញា។ ចំណែកថ្ងៃសែនធំ គឺថ្ងៃទី៥ ខែកញ្ញានេះ។

នៅខែនេះ មនុស្សម្នាទាំងអស់ដែលមានជំនឿ បាននាំគ្នាដុតលុយខ្មោច អុជធូប និងសែននំចំណីអាហារផ្សេងៗ ដើម្បីឧទ្ទិសដល់ព្រលឹងបុព្វបុរសដូនតា ដែលជំនឿនេះកើតឡើងតាំងពីសម័យបុរាណចិនមកម្ល៉េះ។ នៅក្នុងពិធីសែនក្បាលទឹកនេះ ព្រលឹងខ្មោចដែលគ្មានញាតិសន្ដាន ក៏នាំគ្នាឡើងមករកសំណែនផ្សេងៗដែរ ទើបគេហៅថា Hungry Ghost Festival។

ជំនឿមួយចំនួនក្នុងពិធីបុណ្យសែនក្បាលទឹក

នៅក្នុងថ្ងៃសែន គេឃើញមានសកម្មភាពមួយចំនួនដែលជាជំនឿ ដូចជាការដុតក្រដាស ដុតលុយកាក់ ការអុជធូបទៀន ការដាក់អាហារនៅតាមកន្លៀតផ្លូវក្បែរផ្ទះជាដើម។ គេជឿថាការដុតក្រដាសលុយខ្មោច ទំនិញមួយចំនួន ដូចជាឡាន ទូរសព្ទ សំលៀកបំពាក់ និងផ្ទះធ្វើពីក្រដាស គឺអាចបញ្ជូនរបស់ទាំងនោះទៅព្រលឹងបុព្វបុរស ញាតិសន្ដានបានប្រើប្រាស់។

ចំណែកឯការអុជទៀន និងគោម គឺដើម្បីបំភ្លឺផ្លូវឲ្យព្រលឹងខ្មោចអាចរកផ្លូវទៅកាន់ទីកន្លែងដើមរបស់ពួកគេវិញ។ ដោយឡែកសំណែន ផ្លែឈើ សាច់ និងនំ គឺតំណាងឲ្យការផ្ដល់អាហារជូនព្រលឹងខ្មោចជាញាតិកា ហើយក៏ដើម្បីឲ្យព្រលឹងខ្មោចផ្សេងទៀតពុំមានការខឹងសម្បារដោយការស្រេកឃ្លាន។

នៅក្នុងជំនឿសាសនា គេជឿថាមានទីឋានផ្សេងសម្រាប់ព្រលឹងខ្មោចរស់នៅ តែក៏មានព្រលឹងខ្មោចមួយចំនួនដែលនៅតែលតោល អនាថា ដោយសារមិនមានគេធ្វើបុណ្យឲ្យតាមប្រពៃណីត្រឹមត្រូវ។ ការសែនក្បាលទឹក ក៏ជាការជួយដល់ព្រលឹងខ្មោចទាំងនោះផងដែរ ដើម្បីឲ្យពួកគេមានអាហារហូបចុកគ្រប់គ្រាន់ និងនាំសំណាងដល់អ្នកសែនជូន។

ភាពខុសគ្នារវាងសែនក្បាលទឹក និងសែនឆេងម៉េង

ថ្ងៃសែនក្បាលទឹក គឺជាពេលវេលាដែលទ្វារឋាននរកបើកមួយខែ អនុញ្ញាតឲ្យព្រលឹងខ្មោច ទាំងមានញាតិសន្ដាន និងគ្មានញាតិសន្ដាន ស្វែងរកសំណែន និងគ្រឿងប្រើប្រាស់ផ្សេងៗ ដើម្បីបំពេញការស្រេកឃ្លាននាពេលកន្លងមក។ ពេញមួយខែនេះ ព្រលឹងខ្មោចទាំងអស់ អាចធ្វើដំណើរទៅគ្រប់ទិសទី ហើយទទួលយកសំណែនបានពីមនុស្សគ្រប់គ្នា។

ចំណែកសែនឆេងម៉េង ជាពេលញាតិសន្ដាន ជួបជុំគ្នាសែននៅផ្នូរអ្នកដែលស្លាប់ទៅ ដើម្បីសែនសំណែនផ្សេងៗ ហើយការសែននោះ គឺផ្ដោតតែអ្នកជាប់សាច់សាលោហិតប៉ុណ្ណោះ។ តាមជំនឿ នៅក្នុងពិធីសែនឆេងម៉េង ព្រលឹងខ្មោចត្រូវអនុញ្ញាតឲ្យចេញមកជិតផ្នូររបស់ខ្លួនប៉ុណ្ណោះ មិនអាចចាកចេញទៅឆ្ងាយគ្រប់ទិសទី ដូចពិធីសែនក្បាលទឹកឡើយ។

ប្រវត្តិទាក់ទងមួយចំនួន

មានការលើកឡើងច្រើនពីប្រវត្តិពិធីបុណ្យនោះ ប៉ុន្តែមានការលើកឡើងមួយចំនួនថារយៈកាលជាង២ពាន់ឆ្នាំមុន នៅក្នុងសាសនាតាវ ឬលទ្ធិតាវ ពិធីបុណ្យនេះធ្វើឡើងក្នុងពិធីចម្រើនព្រះជន្ម អាទិទេព Qingxu ដែលជាអ្នកកាត់ទោសមនុស្សសាងបាបកម្ម។ នៅថ្ងៃចម្រើនព្រះជន្ម អាទិទេពដោះលែងព្រលឹងខ្មោចដែលរងកម្មឲ្យមានសេរីភាព ក្នុងខែនៃខ្មោចបិសាច៕

ចុចអានអត្ថបទ៖

ប្រភព៖ Scmp | Chinadaily ប្រែសម្រួល៖ គង់ វិសាល