សិល្បករខ្មែរ៣ជំនាន់សរុបជាង១០០នាក់រួមគ្នាបង្កើតកម្មវិធីដ៏អស្ចារ្យ១
- 2017-09-05 07:04:19
- ចំនួនមតិ 0 | ចំនួនចែករំលែក 0
សិល្បករខ្មែរ៣ជំនាន់សរុបជាង១០០នាក់រួមគ្នាបង្កើតកម្មវិធីដ៏អស្ចារ្យ១
ចន្លោះមិនឃើញ
ការសម្ដែងផ្ទាំងទស្សនីយភាពដ៏ធំមួយរឿង "មហាវេស្សន្ដរជាតក" ដែលមានសិល្បករ៣ជំនាន់និងជាង១០០នាក់ចូលរួម ហើយសិល្បករខ្លះមានវ័យជាង៧០ឆ្នាំទៅហើយ។
ការរៀបចំកម្មវិធីដ៏ធំនេះ ត្រូវបានធ្វើឡើងជាលើកទី២ហើយ ដោយលើកទី១ ធ្វើឡើងក្នុងអំឡុងទសវត្សទី៦០ ឈានចូលទសវត្សទី៧០។ គ្រានោះការសម្ដែងត្រូវបានធ្វើឡើងក្នុងពិធីបុណ្យព្រះសពសម្ដេចព្រះសង្ឃរាជ ជួន ណាត។
សិល្បករផ្ដួចផ្ដើមបង្កើតស្នាដៃរឿងមហាវេស្សន្ដរជាតក អ្នកស្រី សុខ សុមាលី បានប្រាប់ Sabay ថាការសម្ដែងរឿង "មហាវេស្សន្ដរជាតក" ក្នុងគោលបំណងធំ៣ ទី១៖ រម្លឹកដល់គុណបុព្វបុរសខ្មែរដែលជាស្ថាបនិកសិល្បៈខ្មែរ ទី២៖ ទុកជាការរម្លឹកឡើងវិញនៃការសម្ដែងរឿងនេះ ក្នុងពិធីបុណ្យព្រះសព សម្ដេចព្រះសង្ឃរាជ ជួន ណាត និងទី៣៖ ទុកជាស្នាដៃមួយដើម្បីផ្សព្វផ្សាយពីវប្បធម៌ខ្មែរទុកឱ្យកូនចៅជំនាន់ក្រោយបានថែរក្សានិងយកគំរូតាម។
“យើងចាស់ៗហើយ ការសម្ដែងមិនបានល្អដូចកាលពីនៅក្មេងទេ អ្នកខ្លះអាយុ៧០ជាងហើយ តែពួកគាត់សប្បាយចិត្តចូលរួម ហើយយ៉ាងណាយើងមានក្បាច់បាតនៅសល់ច្រើន។ ការសម្ដែងនេះជាចំណងដៃចុងក្រោយរបស់សិល្បករចាស់ៗ ក្នុងជីវិតចុងក្រោយរបស់ពួកគាត់។" អ្នកស្រីបន្ថែម។
ទីប្រឹក្សាក្រសួងវប្បធម៌និងវិចិត្រសិល្បៈ និងជាអតីតនាយកសាលារបាំ លោក ព្រឿង ឈៀង បានឲ្យដឹងថា ក្រោយពីលោកគ្រូពិភាក្សាជាមួយអ្នកគ្រូ សុខ សុមាលី រួចមក ក៏បានសម្រេចថានឹងបង្កើតស្នាដៃមួយនេះឡើង។ សិល្បករជំនាន់សង្គមរាស្ត្រនិយមរូបនេះបញ្ជាក់ទៀតថាការប្រមូលផ្ដុំសិល្បករដើម្បីហាត់សមមានការពិបាក ព្រោះតែសិល្បករទាំងអស់សុទ្ធតែរវល់ការងាររៀងៗខ្លួន តែទោះជាយ៉ាងណាសិល្បករទាំងអស់រីករាយនិងសប្បាយចិត្តក្នុងការចូលរួមសម្ដែង។ លោកគ្រូបន្ថែមថា ការសម្ដែងមានការលក់សំបុត្រ ព្រោះប្រាក់ទាំងនេះទុកសម្រាប់ជាវិភាគទានក្នុងការរៀបចំការសម្ដែងតែប៉ុណ្ណោះ។
"ថវិកាដែលបានពីលក់សំបុត្រនេះយើងយកទៅផ្គត់ផ្គង់ក្នុងការរៀបចំការសម្ដែង យើងអត់យកទៅណាទេ សូម្បីតែសិល្បករទាំងអស់ដែលចូលរួមសម្ដែងនេះ ក៏យើងអត់បានជូនប្រាក់គាត់ច្រើនដែរ គឺយើងបានតែជូនពួកគាត់អាចទិញបាយហូបខ្លះៗ និងទិញទឹកអីហ្នឹងទេ ហ្នឹងបានអ្នកជួយឧបត្ថម្ភខ្លះផង បើពឹងតែទៅលើការលក់សំបុត្រនេះអត់គ្រប់ទេ"។ មកដល់ពេលនេះយើងឃើញមានសន្ទុះនៃការគាំទ្រច្រើន ដោយពួកគាត់ឮថាសិល្បករចាស់ៗមកសម្ដែងគាត់ចង់មកមើលនិងគាំទ្រ”។
រឿង "មហាវេស្សន្ដរជាតក" នឹងត្រូវសម្ដែងនៅថ្ងៃទី១០ ១១ ១២ ខែ កញ្ញា ខាងមុខនេះ ដោយមានសិល្បករ៣ជំនាន់ចូលរួម។ តម្លៃសំបុត្រ ១០ម៉ឺន ៦ម៉ឺន ៤ម៉ឺន និងមានតម្លៃពិសេសសម្រាប់ព្រះសង្ឃ និងសិស្សនិស្សិត៕