ដំណក់ប្រេងដំបូងរបស់កម្ពុជា មិនធ្វើឲ្យប្រែប្រួលតម្លៃសាំងក្នុងស្រុកឡើយ

2017-09-07 08:26:02
ចំនួនមតិ 0 | ចំនួនចែករំលែក 0

ចន្លោះមិនឃើញ

មន្ត្រីថាដំណក់ប្រេងដំបូងរបស់កម្ពុជា ដែលរំពឹងថាផលិតបាន ៣០លានបារ៉ែល នៅរយៈពេល ២ឆ្នាំខាងមុខ នឹងមិនធ្វើឲ្យតម្លៃប្រេងសាំងក្នុងស្រុកមានការប្រែប្រួលនោះឡើយ ដោយថាត្បិតកម្ពុជា បានផ្ដល់សិទ្ធិលក់ឲ្យក្រុមហ៊ុនសិង្ហបុរីផលិតប្រេងឆៅ តែប្រេងឆៅទាំងនោះនឹងត្រូវនាំចេញទៅទីផ្សារអន្តរជាតិខណៈដែលកម្ពុជាមិនទាន់អភិវឌ្ឍរោងចក្រចម្រាញ់ប្រេងបាននៅឡើយ។

ឯកឧត្តម ម៉េង សក្ដិធារ៉ា រដ្ឋលេខាធិការក្រសួងរ៉ែ និងថាមពល បានបញ្ជាក់ក្នុងសិក្ខាសាលាស្ដីពី " ដំណើរឆ្ពោះទៅជាប្រទេសផលិតប្រេង" កាលពីម្សិលមិញថាៈ « ការចាប់ផ្ដើមធ្វើផលិតកម្មប្រេងឆៅរបស់យើងនៅប្លុក A នេះ មិនមានផលទាក់ទងអីជាមួយនឹងថ្លៃ ប្រេងដែលប្រជាជនយើងប្រើសព្វថ្ងៃនោះទេ»។

ឯកឧត្តមបានបន្ថែមថាៈ «ក្នុងរយៈពេលវែង ពេលដែលកម្ពុជាអភិវឌ្ឍខ្សែសង្វាក់ឧស្សាហកម្មផលិតកម្មពេញលេញ... រហូតដល់ការកែច្នៃរោងចក្រចម្រាញ់ប្រេងការផលិតក្នុងស្រុកយើងបាន ...ពេលនោះ (ប្រេងឆៅ) បានអាចមានទំនាក់ទំនងជាមួយថ្លៃប្រេងដែលប្រជាពលរដ្ឋយើងប្រើប្រាស់»។

ដោយឡែក កម្ពុជាក៏មានក្រុមហ៊ុននាំចូលប្រេងឆៅដើម្បីចម្រាញ់ជាប្រេងដែលប្រើប្រាស់រាល់ថ្ងៃដែរ តែមិនទាន់អាចយកប្រេងឆៅដែលកម្ពុជាផលិតដំបូងនេះបាន ដោយសារការអភិវឌ្ឍន៍នៅប្លុក A នៅមានភាពមិនច្បាស់លាស់មួយចំនួន ដែលមិនអាចធានាគោលដៅនិរន្តភាពសម្រាប់ផ្គត់ផ្គង់ទីផ្សារធំៗបាន។ យ៉ាងណាក្ដី កម្ពុជានៅតែរំពឹងថា នឹងអាចយកប្រេងឆៅដែលចម្រាញ់ជាប្រេងសម្រាប់ប្រជាពលរដ្ឋប្រើប្រាស់នៅពេលខាងមុខ។ ឯកឧត្តម សក្ដិធារ៉ា បន្ថែម។

កិច្ចព្រមព្រៀងរវាងកម្ពុជានិងក្រុមហ៊ុនគ្រីសអេនើជី ដែលចុះហត្ថលេខាជាផ្លូវការកាលពីថ្ងៃទី ២៣ សីហា ឆ្នាំ ២០១៧ ថ្មីៗនេះ បញ្ជាក់ថា ភាគហ៊ុន ៥% នៃប្រតិបត្តិករក្នុងប្លុក A នឹងត្រូវផ្ទេរទៅឲ្យរាជរដ្ឋាភិបាលកម្ពុជា ដែលនឹងត្រូវគ្រប់គ្រងដោយអគ្គនាយកដ្ឋានទ្រព្យសម្បត្តិរដ្ឋ និងចំណូលមិនមែនសារពើពន្ធ នៃក្រសួងសេដ្ឋកិច្ច និងហិរញ្ញវត្ថុ។ ចំណែកក្រុមហ៊ុន កាន់កាន់ភាគហ៊ុន ៩៥% ដែលនៅសល់។ កម្ពុជារំពឹងថា ការអភិវឌ្ឍអណ្ដូងប្រេងឈ្មោះអប្សរានេះ នឹងបង្កើតប្រាក់ចំណូល និងពន្ធលើប្រាក់ចំណូលប្រេងកាត សរុបយ៉ាងហោចណាស់ ៥០០លានដុល្លារ។

(ពិធីចុះកិច្ចព្រមព្រៀងរវាងកម្ពុជានិងក្រុមហ៊ុនគ្រីសអេនើជី)

បើតាមសេចក្ដីជូនដំណឹងរបស់ក្រសួងពាណិជ្ជកម្មស្ដីពីតម្លៃលក់រាយប្រេងឥន្ទនៈនៅតាមស្ថានីយ សម្រាប់ថ្ងៃទី ០២ ដល់ ១១ ខែកញ្ញា ២០១៧ បង្ហាញថា តម្លៃប្រេងម៉ាស៊ូត ថ្លៃ ៣ ៤០០រៀល តម្លៃប្រេងសាំងធម្មតា ៣ ៧៥០រៀល និងតម្លៃប្រេងសាំងស៊ុបពែរ ៣ ៨០០រៀល ក្នុងមួយលីត្រ៕

អត្ថបទ៖ ស៊ិន សាវ៉េត