ឧកញ៉ា គួច ម៉េងលី៖ យុវជនពុំគួរប្រញាប់ប្រញាល់ចង់ក្លាយជាអ្នកជោគជ័យលឿនពេកទេ

2017-09-12 23:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

មនុស្សគ្រប់គ្នាតែងប្រាថ្នាចង់ចេះចង់ដឹង និងទទួលបានបទពិសោធន៍ច្រើន ដើម្បីឈានឆ្ពោះទៅសម្រេចជោគជ័យឆាប់ៗ ក្នុងឆាកជីវិតរបស់ខ្លួន។

ទោះយ៉ាងណាអ្នកជំនួញជើងចាស់ម្នាក់គឺលោកឧកញ៉ា គួច ម៉េងលី ដែលជាស្ថាបនិក និងជាអគ្គនាយនៃក្រុមហ៊ុន Mengly J. Quach Holding Co, Ltd បានលើកឡើងថា យុវជនពុំគួរប្រញាប់ ឬតក់ក្រហល់ក្លាយជាបុគ្គលជោគជ័យលឿនពេកនោះទេ។ ភាពតក់ក្រហល់ លោកថានឹងធ្វើឱ្យយុវជនខ្លួនឯងខាតបង់ទាំងពេលវេលា ថវិកា និងអនាគត់ទៅវិញទេ។

(លោក ឧកញ៉ា គួច ម៉េងលី)

ថ្លែងក្នុងវេទិការការងារលើកទី៤ ដែលរៀបចំឡើងដោយអង្គការ ភី អិន ស៊ី កាលពីថ្ងៃទី ៩ ខែកញ្ញាកន្លងទៅលោកពន្យល់ថា យុវជនត្រូវមាន ចំណេះដឹង ចំណង់ចំណូលចិត្ត បទពិសោធន៍ និងជំនាញមួយច្បាស់លាស់។ លោកបន្តថាយុវជនមានពេលវេលាច្រើន ដើម្បីសិក្សារៀនសូត្រស្វែងរកបទពិសោធន៍ថ្មីៗ និងការសំលៀងក្តីស្រម៉ៃរបស់ខ្លួន។

លោកឧកញ៉ាបានឱ្យដឹងថា នៅបណ្តាប្រទេសជាច្រើនលើសកលលោកជាមធ្យមអ្នកជោគជ័យមានអាយុចាប់ពី៥៦ឆ្នាំ ហើយបើជាសហគ្រិនវ័យក្មេង ឬអ្នកគ្រប់គ្រងជាមធ្យមមានអាយុចន្លោះពី៣៨ឆ្នាំទៅ៤៥ឆ្នាំ និងធ្វើជានាយកសាលាខ្ទង់អាយុ ៦០ឆ្នាំ។ «ក្មួយៗនៅមានពេលវេលាច្រើន អ្វីដែលយុវជនត្រូវធ្វើ គឺរៀនធ្វើឱ្យច្បាស់លាស់ ផ្ចិតផ្ចង់ ក្បោះក្បាយ ច្បូតពីក្បាលដល់កន្ទុយ ទី១ ត្រូវធ្វើឱ្យលះ ទី២ កុំឆ្អិនក្បាល ស៊ីក្បាលឆ្អិនកន្ទុយស៊ីកន្ទុយ និងកុំហក់លោត និងទី៣ សំលៀងក្តីស្រម៉ៃរបស់យើងឱ្យលះ ហើយធ្វើឱ្យជាប់លាប់»។ លោកបន្ថែម។

(លោក ឧកញ៉ា គួច ម៉េងលី និងយុវជន)

លោកឧញ៉ាបានបន្ថែមថា យុវជនត្រូវវិនិយោគលើចំណេះដឹង ដកពិសោធន៍លើការងារ ពិសោធន៍លើភាពអត់ធ្មត់ និងភាពស៊ូទ្រាំរបស់ខ្លួនឯងជាមុន។ «អ្នកខ្លះធ្វើការងារបានប្រាក់ខែ៥០០០ដុល្លារ…ឈប់ធ្វើការចេញរកស៊ីជាមួយនឹងដើមទុនជាង២០ម៉ឺន(ដុល្លារ តែ)ទីបំផុតមួយខែរក១០០០ដុល្លារសឹងមិនឃើញ។ នេះជាឧទាហរណ៍មួយ។យើងត្រូវស្វែងរកទាំងចំណេះដឹង និងចំណេះធ្វើ ដើម្បីជាទុន ក្នុងការថ្លឹងថ្លែង និងការវិភាគរកហេតុផលមានប្រសិទ្ធិភាពខ្ពស់»។ លោកបញ្ជាក់។

លោកឲ្យដឹងទៀតថាយុវជនដែលមានចំណេះដឹង វិជ្ជាជីវៈក្នុងខ្លួនហើយមិនទាន់គ្រប់គ្រាន់នោះទេ តែថាត្រូវរៀនបន្ថែមទៀតឲ្យចេះវិភាគស្ថានការណ៍ ឬទិដ្ឋភាពផ្សេងៗដោយត្រូវអានសៀវភៅឲ្យបានច្រើន។ លោកថាការអានច្រើនធ្វើឲ្យចំណេះដឹងទូលំទូលាយ និងការសុខវិនិច្ឆ័យខ្ពស់៕

អត្ថបទដោយ៖ សុផល

រូបភាព៖ ផ្តល់ឲ្យ