គណៈកម្មការសិទ្ធិមនុស្សហ្វីលីពីនស្នើកញ្ចប់ថវិកា ៣៤លានដុល្លារ បែរទទួលបាន២០ដុល្លារ

2017-09-13 00:22:58
ចំនួនមតិ 0 | ចំនួនចែករំលែក 0

ចន្លោះមិនឃើញ

សមាជិកសភាហ្វីលីពីនបានបោះឆ្នោតផ្ដល់កញ្ចប់ថវិកាដល់គណៈកម្មការសិទ្ធិមនុស្សចំនួន ១ ០០០ប៉េសូ ឬប្រមាណ ២០ដុល្លារក្នុងមួយឆ្នាំ ដើម្បីស៊ើបអង្កេតបញ្ហាសង្គ្រាមគ្រឿងញៀនដ៏ចម្រូងចម្រាស់។

រូបភាពផ្ដល់សិទ្ធិដោយ Reuters

ការកាត់បន្ថយថវិកាចំពោះគណៈកម្មការសិទ្ធិមនុស្សនេះ គឺគាំទ្រដោយសំឡេងបោះឆ្នោត ១១៩ ទល់នឹង ៣២ ក្នុងរដ្ឋសភា។ អ្នកនាំពាក្យរដ្ឋាភិបាលហ្វីលីពីនលោក Pantaleon Alvarez បានចាត់ទុកគណៈកម្មការនោះថា "គ្មានប្រយោជន៍"។ ប៉ុន្តែក្រុមអ្នករិះគន់និយាយថា ចំណាត់ការនេះគឺជាទណ្ឌកម្មចំពោះគណៈកម្មការដែលតែងតែរិះគន់សង្គ្រាមគ្រឿងញៀនរបស់ប្រធានាធិបតី ឌូតឺតេ។

គណៈកម្មការផ្នែកសិទ្ធិមនុស្សដែលកំពុងតែស៊ើបអង្កេតការសម្លាប់ពាក់ព័ន្ធគ្រឿងញៀន បានធ្វើសំណើសុំកញ្ចប់ថវិកាចំនួន ១,៧២ពាន់លានប៉េសូ ឬប្រមាណ ៣៤លានដុល្លារសម្រាប់ឆ្នាំ ២០១៨ ប៉ុន្តែបែរជារដ្ឋាភិបាលយល់ព្រមឲ្យតិចហួសពីការស្មាន។ កញ្ចប់ថវិកាសម្រាប់ស៊ើបសង្កេតក្នុងឆ្នាំ ២០១៧ គឺទទួលបានជាង ១៤លានដុល្លារ តែឆ្នាំ ២០១៨ ជាឆ្នាំ ឌូតឺតេ ឡើងជាប្រធានាធិបតីគឺទទួលបានតែ ២០ដុល្លារប៉ុណ្ណោះ។

អ្នកនាំពាក្យដដែលបានថ្លែងតាមកញ្ចក់ទូរទស្សន៍ថា "ប្រសិនបើអ្នកចង់ការពារសិទ្ធិរបស់ឧក្រិដ្ឋជន សូមយកប្រាក់ខ្លួនឯងដែលបានពីឧក្រិដ្ឋជនទៅ"។ លោកក៏បានចោទប្រកាន់ពីការអសមត្ថភាពរបស់គណៈកម្មការថា "ហេតុអ្វីអ្នកគួរទទួលកញ្ចប់ថវិកាពីរដ្ឋាភិបាល ប៉ុន្តែអ្នកមិនធ្វើការលើកិច្ចការរបស់អ្នក”?

គួរបញ្ជាក់ថា មនុស្សជាង ៧ ០០០នាក់ ត្រូវបានអាជ្ញាធរបាញ់សម្លាប់ចាប់តាំងពីប្រធានាធិបតីឌូតឺតេ ចាប់ផ្ដើមយុទ្ធនាការបោសសម្អាតគ្រឿងញៀនកាលពីឆ្នាំមុនដោយមានគោលបំណងកម្ចាត់ឲ្យអស់ជំនួញគ្រឿងញៀននៅហ្វីលីពីន ប៉ុន្តែក៏ទាក់ទាញការរិះគន់ពីសហគមន៍អន្តរជាតិផងដែរ៕