វេស្ទើន ពង្រឹងកូនក្រុម៣ចំណុច ត្រៀមស្ដារដើមពីប៉ូលិសចុងសប្ដាហ៍នេះ
- 2017-09-13 03:57:26
- ចំនួនមតិ 0 | ចំនួនចែករំលែក 0
វេស្ទើន ពង្រឹងកូនក្រុម៣ចំណុច ត្រៀមស្ដារដើមពីប៉ូលិសចុងសប្ដាហ៍នេះ
ចន្លោះមិនឃើញ
ក្រោយចាញ់ បឹងកេត ៤-០ កាលពីចុងសប្ដាហ៍កន្លងទៅលោក ស៊ុំ វណ្ណា គ្រូបង្វឹកវេស្ទើនភ្នំពេញមើលឃើញចន្លោះខ្វះខាតរបស់កូនក្រុមចំនួន ៣ ចំណុច ហើយថា នឹងពង្រឹងឡើងវិញ ដើម្បីត្រៀមសងសឹកប៉ូលិស នាថ្ងៃទី១៧ ខែកញ្ញា ឆ្នាំ២០១៧ ក្នុងការប្រកួតលីគកំពូលកម្ពុជាសប្ដាហ៍ទី១៦ នៅស្តាតចាស់វេលាម៉ោង ៦:៣០ នាទី។
ទី១៖ ឆន្ទៈប្រកួត
ទី២៖ ការបញ្ចប់ទី
ទី៣៖ ទម្រង់លេងក្រុមឲ្យវិលមករកភាពល្អប្រសើរឡើងវិញ
ការបរាជ័យរបស់វេស្ទើនក្រោមថ្វីជើងបឹងកេត ធ្វើឲ្យ ស៊ុំ វណ្ណា ជាគ្រូបង្វឹកមើលឃើញថា កូនក្រុមរបស់លោកបាត់បង់ឆន្ទៈក្នុងការប្រកួត ដែលនេះជាចំណុចមួយខ្ពស់ធ្វើឲ្យទម្រង់លេងរបស់ក្រុមមានការធ្លាក់ចុះ។ លោកថា ចំណុចនេះត្រូវតែពង្រឹងឡើងវិញក្នុងរយៈពេល ១សប្ដាហ៍នេះ ដើម្បីត្រៀមសងសឹកក្លឹបប៉ូលិស ដែលបានយកឈ្នះក្រុមរបស់លោកកាលពីជើងទី១ ដោយលទ្ធផល ៤-០។
លោកបញ្ជាក់ទៀតថា កាលប៉ះបឹងកេតក្រុមរបស់លោកមានឱកាសច្រើនមែនទែន ប៉ុន្តែខ្សែប្រយុទ្ធមិនអាចធ្វើបានសម្រេច។ ចំណុចនេះត្រូវតែកែខៃឲ្យបានល្អ ដោយបង្វឹកខ្សែប្រយុទ្ធឲ្យព្យាយាមបញ្ចប់ទីឲ្យបានល្អជាងមុន។
វេស្ទើនបច្ចុប្បន្នមានតែ១៦ពិន្ទុប៉ុណ្ណោះឆ្លងកាត់ការប្រកួតចំនួន ១៥លើកកន្លងមក ដោយស្ថិតនៅលេខរៀងទី៨ ក្នុងតារាងលីគកំពូលកម្ពុជា៕