៧ ចំណុចត្រូវប្រុងប្រយ័ត្នបំផុត ពេលទៅវត្ត កុំឱ្យធ្វើបុណ្យបានទឹកភ្នែក

2017-09-19 00:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងថ្ងៃភ្ជុំបិណ្ឌ ប្រជាពលរដ្ឋខ្មែរទូទាំងប្រទេស បានឈប់សម្រាកពីការងារ ដើម្បីទៅស្រុកកំណើតជួបជុំគ្រួសារធ្វើបុណ្យជុំគ្នា។ ដូច្នេះហើយនៅតាមវត្តអារាមនានា ប្រាកដជាមនុស្សសម្រុកទៅធ្វើបុណ្យច្រើន លើសពីថ្ងៃកាន់បិណ្ឌធម្មតា។ ខាងក្រោមនេះជាចំណុចសំខាន់ៗបំផុតពេលតៅវត្តក្នុងថ្ងៃភ្ជុំធំ ដើម្បីការពារកុំឱ្យមានបញ្ហាពេលធ្វើបុណ្យទាន៖

១. ស្បែកជើង ក្នុងថ្ងៃភ្ជុំធំ៖ អាចមានជនខិលខូច ឆ្លៀតឱកាសចេញរកស៊ីតាមវត្ត។ ជាពិសេសស្បែកជើងថ្លៃៗ បើអាចកុំអង្គុយកន្លែងណាឆ្ងាយពីស្បែកជើងពេក ហើយក៏មិនគួរទុកចោលរាប់ម៉ោងដែរ។

២. ទូរសព្ទ និងកាបូបលុយ៖ ក្នុង១ឆ្នាំមិនដែលថាអត់មានករណីបាត់ទូរសព្ទ និងកាបូបលុយក្នុងវត្តទេ មានពុទ្ធបរិស័ទខ្លះ ឱ្យតាអាចារ្យប្រកាសរកពេញវត្តក៏មានដែរ។ ភាគច្រើន ពុទ្ធបរិស័ទ តែងភ្លេចនៅកន្លែងអុជធូប ឫពេលវេរចង្ហាន់ជូនព្រះសង្ឃ ពេលក្រោកមកវិញ ចោលទួរសព្ទ ឫកាបូបលុយ។ ជាពិសេសពេលធ្វើដំណើរទៅវត្តស្រីៗចូលចិត្តស្ពាយកាបូបចំហៀង ប្រយ័ត្នចោរឃើញទ្រាំមិនបាន។

៣. កុំចតម៉ូតូចោលផ្ដេសផ្ដាស៖ ចោរមិនចេះគិតបាបបុណ្យ ក្នុងវត្តអ្វីនោះទេ ឱ្យតែមានឱកាស គឺដឹងតែលួចហើយ។ ដូច្នេះត្រូវប្រុងប្រយ័ត្នកុំទុកម៉ូតូចោល ត្រូវរកកន្លែងចតឱ្យបានត្រឹមត្រូវ។

៤. ប្រយ័ត្នអាហារមួយចំនួនកំពប់លើបោកមិនជ្រះ៖ នារីខ្មែរភាគច្រើនតែងស្លៀកហូលផាមួង ទៅវត្ត ហើយសុទ្ធតែមានតម្លៃថ្លៃៗ។ ដូច្នេះហើយត្រូវប្រយ័ត្នឱ្យមែនទែន ដូចជាសម្លគីរី ឫសម្លមានខ្លាញ់ច្រើន កុំឱ្យកំពប់លើខ្លួនឯង ឫលើគេប្រយ័ត្នយំស្ដាយសំលៀកបំពាក់។

៥. ចានស្រាក់៖ ជាធម្មតា ពេលទៅវត្ត តែងមានចានស្រាក់ដើម្បីដាក់ចង្ហាន់ជូនព្រះសង្ឃ។ ដូច្នេះត្រូវចំណាំចានស្រាក់ខ្លួនឯងឱ្យច្បាស់ ប្រយ័ត្នច្រឡំចានស្រាក់អ្នកដទៃ ដើម្បីកុំឱ្យមានបញ្ហាដោយសារចានស្រាក់នេះ។

៦. ប្រយ័ត្នរឿងធូបទៀន៖ ជាធម្មតាក្នុងថ្ងៃភ្ជុំធំមានមនុស្សម្នាទៅវត្តច្រើនណាស់។ ដូច្នេះពេលយកធូបទៅដោតប្រយ័ត្នប៉ះគេប៉ះឯង ហើយប្រយ័ត្នធ្លាក់កម្ទេចធូបលើសំលៀកបំពាក់ ព្រោះអាចធ្លុះបាន។

៧. ប្រយ័ត្នវង្វេងក្មេង៖ ឪពុកម្ដាយមានកូនតូចៗ យកទៅវត្ត ត្រូវប្រយ័ត្នចំពោះកុមារតូច ព្រោះអាចវង្វេងបាន។ ជាពិសេសក្នុងវត្តតែងមានស្រះទឹក ប្រយ័ត្នក្មេងទៅលេងទឹកមិនដឹង។ ដូចនេះសូមកុំធ្វេសប្រហែសឱ្យសោះ៕

អត្ថបទ៖ វឌ្ឍនៈ