ស្គាល់ខ្សែប្រយុទ្ធ U19 ចិន៣រូប អាចមានវត្តមានពេលប៉ះកម្ពុជាជម្រុះ AFC U-19
- 2017-09-15 02:55:16
- ចំនួនមតិ 0 | ចំនួនចែករំលែក 0
ស្គាល់ខ្សែប្រយុទ្ធ U19 ចិន៣រូប អាចមានវត្តមានពេលប៉ះកម្ពុជាជម្រុះ AFC U-19
ចន្លោះមិនឃើញ
ក្រុមជម្រើសជាតិកម្ពុជាក្រោមអាយុ ១៩ ឆ្នាំបានស្ថិតនៅពូល G ជាមួយក្រុមខ្លាំង U19 ចិន U19 ហ្វីលីពីន និង U19 មីយ៉ាន់ម៉ា សម្រាប់ការប្រកួតវគ្គជម្រុះ 2018 AFC U-19 Championship ដែលគ្រោងធ្វើឡើងនៅទឹកដីកម្ពុជានាកំឡុងខែវិច្ឆិកា ឆ្នាំ២០១៧ ខាងមុខនេះ។
ក្រុមចំណោមប្រទេសទាំង ៤ ត្រូវបានគេមើលឃើញថា U19 ចិនជាក្រុមខ្លាំងជាងគេ និងមានខ្សែប្រយុទ្ធ ៣ រូបកំពុងលេងនៅលីគកំពូលចិន ២ រូប និងមានម្នាក់ទៀតលេងនៅលីគកំពូលអាល្លឺម៉ង់។ ជាការបំភ្លឺជូនអ្នកគាំទ្រថ្ងៃនេះ Sabay សូមបង្ហាញប្រវត្តិរូបខ្លះៗ អំពីខ្សែប្រយុទ្ធទាំង ៣របស់ចិន។
ទី១ ៖ Zhang Yuning កីឡាកររូបនេះកើតនៅថ្ងៃទី៥ ខែមករា ឆ្នាំ១៩៩៧ មានអាយុ ២០ ឆ្នាំមានកម្ពស់ ១,៨៥ ម៉ែត្រ បច្ចុប្បន្នកំពុងលេងនៅក្លឹប Werder Bremen របស់អាល្លឺម៉ង់។ យុវជនរូបនេះមុនផ្លាស់ទៅលេងនៅ Werder Bremen រូបគេលេងនៅក្លឹប Vitesse របស់ហុល្លង់ដោយបង្ហាញខ្លួនបានចំនួន២៤លើកទាត់បញ្ចូលទីបានចំនួន ៣គ្រាប់។ ដល់ឆ្នាំ២០១៧ នេះត្រូវបានក្លឹបនៅអង់គ្លេស West Bromwich Albion ចាប់អារម្មណ៍និងបានទិញមកចូលរួមជាមួយពួកគេ ប៉ុន្តែឲ្យ Werder Bremen ខ្ចីជើង ១រដូវកាលសិន។
ទី២៖ Shan Huanhuan កើតនៅថ្ងៃទី២៤ ខែមករា ឆ្នាំ១៩៩៩ មានអាយុ ១៨ ឆ្នាំមានកម្ពស់ ១.៨៥ ម៉ែត្រ លេងនៅក្លឹប Beijing Guoan F.C. លីគកំពូលរបស់ចិន ដោយចូលលេងបាន ២ប្រកួតក្នុងចំណោម ២៤ ប្រកួត។ ទោះមិនសូវបានបង្ហាញខ្លួនឲ្យក្លឹបមែន ប៉ុន្តែកីឡាកររូបនេះចូលលេងឲ្យជម្រើសជាតិក្រោមអាយុ ២០ឆ្នាំបានចំនួនបានចំនួន ១១លើក និងរកគ្រាប់បាល់បានចំនួន ៣ គ្រាប់។
ទី៣ ៖ Guo Tianyu កើតនៅថ្ងៃទី៥ ខែមីនា ឆ្នាំ១៩៩៩ មានអាយុ ១៨ ឆ្នាំមានកម្ពស់រហូតដល់ ២ម៉ែត្រ រូបគេជាយុវជនរបស់ក្លឹប Shandong Luneng នៃលីគកំពូលរបស់ចិន។ សម្រាប់ការប្រកួតក្នុងលីគកំពូលរបស់ចិនរដូវកាល២០១៧ នេះ រូបគេទើបតែបង្ហាញខ្លួនបានចំនួន ២លើកប៉ុណ្ណោះក្នុងចំណោម ២៣ ប្រកួត។ សម្រាប់ជម្រើសជាតិ U-19 ចិននេះជាការបង្ហាញខ្លួនលើកដំបូងរបស់គេ។