មិនធម្មតា! មួយថ្ងៃខេត្តព្រះវិហារ នាំចេញចេកណាំវ៉ា ២០រថយន្ដធំទៅភ្នំពេញ និងខេត្តជិតខាង
- 2017-09-15 03:24:37
- ចំនួនមតិ 0 | ចំនួនចែករំលែក 0
មិនធម្មតា! មួយថ្ងៃខេត្តព្រះវិហារ នាំចេញចេកណាំវ៉ា ២០រថយន្ដធំទៅភ្នំពេញ និងខេត្តជិតខាង
ចន្លោះមិនឃើញ
លោក ពឹង ទ្រីដា ប្រធានមន្ទីរកសិកម្មខេត្តព្រះវិហារ បានឲ្យ Sabayដឹងថា ក្នុងមួយថ្ងៃខេត្តព្រះវិហារអាចនាំចេញផ្លែចេកណាំវ៉ាចំនួន ២០រថយន្ដធំ ឬប្រមាណជាង ៣០០តោន មកកាន់រាជធានីភ្នំពេញ និងបណ្ដាខេត្តជិតខាង។ ចេកណាំវ៉ា ដែលដាំដុះនៅខេត្តព្រះវិហារមានទំហំតូច ប៉ុន្តែមានរសជាតិផ្អែមឆ្ងាញ់ និងអាចកែច្នៃធ្វើជាចេកឆាប ផងដែរ។
លោកបញ្ជាក់ថា ខេត្តព្រះវិហារមានផ្ទៃដីដាំចេកជាង ៧ពាន់ហិកតា ភាគច្រើននៅក្នុងក្រុងព្រះវិហារ ស្រុកគូលែន និងស្រុកត្បែងមានជ័យ ហើយការដាំដុះនេះទៀតសោតធ្វើឡើងជាលក្ខណៈគ្រួសារដោយគ្មានក្រុមហ៊ុនណាមួយវិនិយោគទុននោះទេ។
លោកថា ឆ្នាំនេះទិន្នផលចេកណាំវ៉ា មានការកើនឡើងខ្ពស់ ដោយសារតែមានទឹកភ្លៀងគ្រប់គ្រាន់ ហើយក្នុងមួយហិកតារប្រជាកសិករអាចប្រមូលផលបានចន្លោះពី ៥លានរៀល ទៅ៩លានរៀល។ ជាធម្មតាចេកមួយស្និតមានទម្ងន់ចន្លោះពី ១គីឡូក្រាម ទៅ១គីឡូក្រាម២ខាំ និងអាចលក់ចេញក្នុងតម្លៃ ៩០០រៀលក្នុង ១ស្និត ប៉ុន្ដែ បើនាំចេញទៅដល់ភ្នំពេញតម្លៃចេកនឹងមានការកើនឡើងរហូតដល់ជិត ២ពាន់រៀលក្នុង ១ស្និត។
លោក ពឹង ទ្រីដា បន្ថែមថា បច្ចុប្បន្នមានក្រុមហ៊ុនវិនិយោគចិន មួយចំនួនគ្រោងនឹងទិញទិន្នផលចេកណាំវ៉ាពីខេត្តព្រះវិហារ ដើម្បីនាំចេញទៅក្រៅប្រទេសផងដែរ បន្ទាប់ពីអាជ្ញាធរមានទំនាក់ទំនងជាមួយភាគីចិនរួចមក។ ជាមួយគ្នា អាជ្ញាធរក៍បានសហការគ្នាជាមួយប្រជាកសិករបង្កើតឲ្យមានការផលិតចេកឆាបនៅក្នុងតំបន់បន្ថែមទៀត។
ខេត្តព្រះវិហារមានផ្ទៃដាំដុះដំណាំរហូតដល់ទៅជាង ៨ម៉ឺនហិកតារ។ ក្រៅពីដំណាំចេក ខេត្តភាគឧត្តរប្រទេសមួយនេះ ក៏មានដាំដំណាំជាច្រើនទៀតផងដែរ រួមមានដំឡូងមី ស្រូវ ស្វាយចន្ទីម្រេច និង ល្ពៅជាដើម។