សិល្បករនិង មហាជនរាប់ពាន់នាក់ចូលរួមអបអរសាទរព្រឹទ្ធាចារ្យ គង់ ណៃ មកពីប្រទេសជប៉ុននៅពេលខាងមុខនេះ

2017-09-15 04:30:36
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅព្រឹកមិញនេះក្រសួងវប្បធម៌និងវិចិត្រសិល្បៈបានធ្វើសន្និសីទសារព័ត៌មានស្ដីពី "ពិធីអបអរសាទរ ការទទួលបានពានរង្វាន់សិល្បៈវប្បធម៌ហ្វុកុអូកា នៃប្រទេសជប៉ុនរបស់លោកព្រឹទ្ធាចារ្យកោសល្យវោហារ គង់ ណៃ" នៅទីស្ដីការក្រសួងវប្បធម៌ និងវិចិត្រសិល្បៈ។

ថ្លែងក្នុងឱកាសសន្និសីទសារព័ត៌មាននេះដែរឯកឧត្ដម ហាប់ ទូច អគ្គនាយកនៃអគ្គនាយកដ្ឋានបច្ចេកទេសវប្បធម៌បានមានប្រសាសន៍ថា លោកព្រឹទ្ធាចារ្យកោសល្យវោហារ គង់ ណៃ នឹងវិលត្រឡប់មកពីទទួលពានរង្វាន់សិល្បៈវប្បធម៌ហ្វុគុអូកា នៃប្រទេសជប៉ុននៅថ្ងៃទី ២៤ ខែកញ្ញា ឆ្នាំ ២០១៧ នៅប្រលានយន្តហោះអន្តរជាតិភ្នំពេញនាពេលខាងមុខនេះ មានការអញ្ជើញចូលរួមក្បួនដង្ហែពីសំណាក់អ្នកសិល្បៈ និងប្រជាពលរដ្ឋរាប់ពាន់នាក់ផងដែរ។

ឯកឧត្ដមបន្ថែមថា ចំពោះសិល្បករ និងសិល្បការិនីព្រមទាំងប្រជាពលរដ្ឋដែលចូលរួមក្បួនដង្ហែ មកពីបណ្ដាញសិល្បករ សមាគមសិល្បករ សហគមន៍ចាប៉ីដងវែង និង សមាគមសិល្បៈមួយចំនួនទៀត។ បន្ថែមពីនេះឯកឧត្ដមក៏សូមអំពាវនាវដល់ បងប្អូនប្រជាពលរដ្ឋ និងសិល្បករមួយចំនួនឲ្យចូលរួមក្បួនដង្ហែ ការវិលត្រឡប់របស់លោក ព្រឹទ្ធាចារ្យកោសល្យវោហារ គង់ ណៃ មកពីទទួលពានរង្វាន់នៅប្រទេសជប៉ុនឲ្យបានច្រើនកុះករដើម្បីលើកស្ទួយសិល្បៈវប្បធម៌ខ្មែរ។

“បាទក្រោយពីលោកតា គង់ ណៃ ត្រឡប់មកដល់ប្រលានយន្តហោះអន្តរជាតិភ្នំពេញភ្លាម យើងមានរថយន្តសារ៉ែន នាំមុខ រថយន្តក្រុមឆៃយ៉ាំ រថយន្តដង្ហែលោកតា គង់ ណៃ អមដោយចាប៉ីដងវែង និងម៉ូតូស១០ គ្រឿង រថយន្តតន្ត្រីទិព្វ ក្បួនរថយន្ត ថ្នាក់ដឹកនាំ ក្បួនរថយន្តសិល្បៈ និងយុវជន"។ នេះបើតាមអគ្គនាយកនៃអគ្គនាយកដ្ឋានបច្ចេកទេសវប្បធម៌បញ្ជាក់។

ដោយឡែកនៅថ្ងៃទី២៩ ខែ កញ្ញា ឆ្នាំ ២០១៧ ខាងមុខនេះលោកព្រឹទ្ធាចារ្យចាប៉ីដងវែង គង់ ណៃ នឹងទទួលបានការជួបសំណេះសំណាលជាមួយ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដើម្បីបំពាក់នូវគ្រឿងឥស្សរិយយសនិង ផ្ដល់ការលើកទឹកចិត្តដល់ព្រឹទ្ធាចារ្យចាប៉ីដងវែងរូបនេះ នៅវេលាម៉ោង៩ ព្រឹកនៅវិមានសន្តិភាព៕

អត្ថបទ៖ ឆុង ស៊ីណាន