លោកស្រី សុខ ចិន្ដា៖ “ប្រលូកការងារដំបូង ក្រុមហ៊ុនតូច ឬធំមិនសំខាន់ គឺសំខាន់ឱកាស លូតលាស់ទៅថ្ងៃមុខ”

2017-09-15 06:30:15
ចំនួនមតិ 0 | ចំនួនចែករំលែក 0

ចន្លោះមិនឃើញ

ជាអ្នកជំនួញ និងជាអ្នកគ្រប់គ្រងមួយរូប ដែលមានបទពិសោធន៍ច្រើនឆ្នាំ លោកស្រី សុខ ចិន្តា ប្រធាន និងជាអគ្គនាយកក្រុមហ៊ុន Mekong Net បានផ្កាំផ្ញើទៅយុវជនជំនាន់ក្រោយ ដែលទើបបញ្ចប់ការសិក្សានៅមហាវិទ្យាល័យ និងសាកលវិទ្យាល័យ ហើយត្រៀមស្វែងរកការងារធ្វើនៅក្រុមហ៊ុននានា គួរកុំប្រកាន់ក្រុមហ៊ុនតូច ឬក្រុមហ៊ុនធំ។ យុវជនគួរចាប់ផ្ដើមការងារនៅកន្លែង ណាមួយដែលត្រូវការយើងជាជាងសម្លឹងមើលទៅលើប្រាក់ខែតែមួយមុខ។

ថ្លែងក្នុងឱកាសពិព័រណ៍ការងារ ដែលរៀបចំឡើងដោយអង្គការ ភី អិន ស៊ី កាលពីចុងសប្តាហ៍មុនលោក ស្រីលើកឡើងថា ទើបចេញពីសាលា យុវជនគួរស្វែងរកបទពិសោធន៍ថ្មី និងពីរបៀបធ្វើឱ្យបានល្អ ជាជាង សម្លឹងមើលលើប្រាក់ខែ តែមួយមុខ។ “ខ្ញុំសូមលើក ឧទាហរណ៍ក្រុមហ៊ុន ធំគេមានគោលការណ៍គេច្បាស់លាស់ …យើងចូលទៅ យើងត្រូវតែធ្វើឱ្យបាន បើធ្វើមិនបានគេដកយើងចេញ។ ផ្ទុយមកវិញបើយើងធ្វើការងារនៅក្រុមហ៊ុនតូច តែគេត្រូវការយើង គេត្រូវការបុគ្គលិកនៅផ្នែកហ្នឹង គេនឹងបណ្តុះ បណ្តាលយើង។ អញ្ចឹងយើងអាចមានឱកាសរៀនសូត្រ និងទទួលបានបទពិសោធន៍ការងារ។ ដូច្នេះប្រលូកការងារដំបូង ក្រុមហ៊ុនតូច ឬធំមិនសំខាន់…សំខាន់ឱកាសរីកចម្រើនទៅថ្ងៃមុខ ”។

ទន្ទឹមនោះបុគ្គលិកថ្មីថ្មោងក៏ចាំបាច់ត្រូវមានភាពហ្មត់ចង់ ការអត់ធ្មត់ និងការទទួលខុសត្រូវក្នុងការងារផងដែរ។នេះបើតាមការលើកឡើងបន្ថែមរបស់លោកស្រី ចិន្តា។ លោកស្រីថា យុវជនគួរ ប្រកាន់ឥរិយាបថ និងទំនាក់ទំនងល្អជាមួយនឹងក្រុមការងារ ដើម្បីអាចមានឱកាសរៀនសូត្រពីគ្នាទៅវិញទៅមក។ “ធ្វើការងារជាមួយគ្នាមែន ប៉ុន្តែអាចមានចំណុចណាមួយដែលយើងចេះមិនអស់។ យើងត្រូវមានទំនាក់ទំនងល្អ និងចែករំលែកចំណេះដឹងគ្នាទៅវិញទៅមក។ ត្រលប់មកវិញបើយើងមានសញ្ញាបត្រអនុបណ្ឌិត ឬបណ្ឌិតមែន ប៉ុន្តែធ្វើការគ្មានការទទួលខុសត្រូវ ឥរិយាបថក្រអើតក្រទម មិនត្រូវជាមួយគេ ក្រុមហ៊ុនក៏មិនអាចទទួលយកបានដែរ”។

លោកស្រី សុខ ចិន្តា ឱ្យដឹងទៀតថា នៅពេលយើងមានទាំង បទពិសោធន៍ សមត្ថភាព និងការជឿទុក ចិត្ត ហើយចង់ផ្លាស់ប្តូរការងារទៅក្រុមហ៊ុនថ្មី លោកស្រីជឿថា គេនឹងមិនអាចហាមឃាត់ យើងបានទេ។ ប៉ុន្តែមានករណីខ្លះ ដែលយើងជាបុគ្គលិកក៏គួរយល់អារម្មណ៍ម្ចាស់ក្រុមហ៊ុនដែរ ពោលគឺទាំងក្រុមហ៊ុនតូច និងធំ មាបញ្ហាប្រឈមដូចគ្នា។ បញ្ហាប្រឈមត្រង់ថា មុនពេលដែលបុគ្គលិករូបនោះទទួលបានបទពិសោធន៍ និងចំណេះដឹងថ្មីៗ ក្រុមហ៊ុនបាន បញ្ជូនយើងទៅសិក្សានៅបរទេសជាមួយនឹងការចំណាយយ៉ាងច្រើន។ប៉ុន្តែមិនទាន់ទាំងចែករំលែកចំណេះដឹង និងបទពិសោធន៍ឱ្យអ្នកផ្សេងផង បែរសុំដាក់ពាក្យលាឈប់ទៅកន្លែងផ្សេង ដែលមានប្រាក់ខែខ្ពស់ជាង។ “អញ្ចឹងមុនពេលយើងចាកចេញសុំឱ្យគិតថា គេបញ្ជូនយើងទៅរៀន ហើយមកវិញទើបចេះធ្វើការងារ បែរជាដាក់លក្ខ័ណ្ឌជាមួយនឹងក្រុមហ៊ុន បើមិនឱ្យប្រាក់ខែប៉ុណ្ណេះ ប៉ុណ្ណោះ នឹងប្តូរទៅក្រុមហ៊ុនផ្សេង។ រឿងនេះទាំងគេទាំងខ្ញុំយល់ថា ពិបាកទទួលយកណាស់”៕

អត្ថបទ៖ សុផល