មូលហេតុពិតនៃភាពវឹកវរក្នុងការប្រកួត Europa League នៅកីឡដ្ឋាន Emirates
- 2017-09-16 03:03:09
- ចំនួនមតិ 0 | ចំនួនចែករំលែក 0
មូលហេតុពិតនៃភាពវឹកវរក្នុងការប្រកួត Europa League នៅកីឡដ្ឋាន Emirates
ចន្លោះមិនឃើញ
ការប្រកួតក្របខ័ណ្ឌ Europa League រវាងក្រុមកាំភ្លើងធំ ជាមួយនឹងក្លឹបមកពីក្របខ័ណ្ឌ Bundesliga, FC Cologne បានធ្លាក់ចូលក្នុងភាពវឹកវរខណៈអ្នកគាំទ្រដែលបានធ្វើដំណើរមកពីអាល្លឺម៉ង់ ប្រមាណ ២ម៉ឺននាក់ បានសម្រុកចូលកីឡដ្ឋាន Emirates នៅទីក្រុងឡុងដ៏ ដោយគ្មានសំបុត្រទស្សនា។ អ្នកគាំទ្រក្លឹបរហ័សនាមពពែ តែជិត៣ពាន់នាក់ប៉ុណ្ណោះក្នុងចំណោមពួកគេ ដែលមានសំបុត្រ ក្រៅពីនោះប្រើគ្រប់មធ្យោបាយ ឲ្យតែបានចូលមើល ដែលនេះជាហេតុបង្ខំឲ្យការប្រកួតត្រូវពន្យារពេល១ម៉ោង។
ក្រោយចប់ការប្រកួត ក្រុម FC Cologne បានចេញលិខិត១ច្បាប់ ដើម្បីសូមទោសទៅកាន់ក្រុមកាំភ្លើងធំ នៅលើវិបសាយផ្លូវការរបស់ខ្លួន ដោយរៀបរាប់ថា មូលហេតុដែលនាំឲ្យមានហេតុការណ៍ដ៏អាម៉ាស់នេះកើតឡើង បណ្ដាលមកពីអ្នកគាំទ្រ "ចង់ស្គាល់រសជាតិការប្រកួតក្នុងក្របខ័ណ្ឌ Europa League ជាលើកដំបូងរបស់ក្លឹបក្នុងរយៈពេល ២៥ឆ្នាំ ទើបនាំឲ្យគេធ្វើដំណើរទៅទីក្រុងឡុងដ៍"។
ទោះជាយ៉ាងនេះក្តី FC Cologne បានឆ្លៀតដាក់កំហុសឲ្យ Arsenal ព្រោះមិនបានបម្រុងសំបុត្រទុកឲ្យច្រើនសម្រាប់អ្នកគាំទ្រក្រៅទឹកដី ហើយថា "ប៉ូលិសតិចពេក" ទើបរៀបចំសណ្ដាប់ធ្នាប់មិនបានល្អ។
Arsene Wenger ដែលបានដឹកនាំ Arsenal ឲ្យឈ្នះ FC Cologne ៣-១ ការប្រកួតក្នុងដី បាននិយាយថា សំបុត្រ ៣ ០០០ (៣ពាន់) សន្លឹកដែលបានលក់ឱ្យអ្នកគាំទ្រក្រុម FC Cologne គឺស្របទៅនឹងច្បាប់សម្រាប់ការប្រកួតហើយ ប៉ុន្តែពួកគេមកច្រើនពេក។
ដោយឡែក ក្រុមទាំង២ត្រូវបាន UEFAពិន័យដូចគ្នា ដោយពិន័យក្រុម FC Cologne ពីបទ៖ អ្នកគាំទ្រគ្មានសណ្ដាប់ធ្នាប់ គប់ដប ដុតភ្លើងកាំជ្រួច និង ទាត់ធាក់របាំងជាដើម ខណៈពិន័យក្រុមកាំភ្លើងធំពីបទបណ្ដោយឲ្យកាំជណ្ដើរខាងអ្នកគាំទ្រក្រៅទឹកដីណែនតាន់តាប់ដោយមនុស្ស៕