ប៉ូលិសជាង ១២០០ ក្នុងខណ្ឌមួយរបស់ក្រុងម៉ានីល ត្រូវបានដកចេញពីភារកិច្ច បន្ទាប់ពីការស្លាប់ក្មេងជំទង់ ៣ នាក់

2017-09-16 03:34:53
ចំនួនមតិ 0 | ចំនួនចែករំលែក 0

ចន្លោះមិនឃើញ

កងកម្លាំងប៉ូលិសទាំងមូលនៅក្នុងផ្នែកមួយនៃរដ្ឋធានីហ្វីលីពីននឹងត្រូវដកចេញពីកាតព្វកិច្ច បន្ទាប់ពីការស្លាប់ដ៏ចម្រូងចម្រាស់នៃក្មេងជំទង់ ៣ នាក់។

មេប៉ូលិសក្រុងម៉ានីលលោកអូស្ការ អាល់បាយ៉ាល់ដេ (Oscar Albayalde) បាននិយាយថា មន្ត្រីប៉ូលិសចំនួន ១.២០០ នាក់មកពីខណ្ឌកាលូកាន់ (Caloocan) នឹងត្រូវយកទៅបណ្តុះបណ្តាលឡើងវិញ ហើយបន្ទាប់មកនឹងត្រូវផ្ទេរទៅអង្គភាពផ្សេងទៀត។ ចំណាត់ការនេះធ្វើឡើងចំពេលកំពុងមានការត្រួតពិនិត្យយ៉ាងខ្លាំងក្លាលើប្រតិបត្តិការរបស់ប៉ូលិស ស្របពេលដំណាលគ្នានឹងសង្គ្រាមប្រឆាំងគ្រឿងញៀនរបស់លោកប្រធានាធិបតី រ៉ូឌ្រីហ្គោ ឌូតឺតេ។

សំណុំរឿងដ៏ល្បីបំផុតនេះ គឺពាក់ព័ន្ធនឹងក្មេងប្រុសម្នាក់ ដែលត្រូវបានសម្លាប់នៅខណ្ឌកាលូកាន នៅថ្ងៃទី ១៦ ខែសីហា។ ប៉ូលិសបាននិយាយថា ក្មេងជំទង់ឈ្មោះ កៀន ឡយ ដេឡូស សាន់តូស (Kian Loyd Delos Santos) អាយុ ១៧ ឆ្នាំបានរត់គេចពីពួកគេហើយបន្ទាប់មកបានបើកការបាញ់ប្រហារ ដូច្នេះពួកប៉ូលិសក៏បាញ់រូបគេតែម្តង។

ប៉ុន្តែឪពុកម្តាយរបស់ក្មេងនេះនិយាយថា សាន់តូស មិនមានជាប់ពាក់ព័ន្ធនឹងថ្នាំញៀននោះទេ។ សាក្សីម្នាក់បាននិយាយថា ប៉ូលិសបានយកកាំភ្លើងដាក់ចូលក្នុងដៃរបស់សាន់តូស ហើយវីដេអូពីកាមេរ៉ាសុវត្ថិភាពបង្ហាញក្មេងប្រុសម្នាក់នោះត្រូវបានប៉ូលិសអូសចេញឆ្ងាយ ពោលគឺផ្ទុយស្រឡះពីការអះអាងថា ក្មេងនេះបានរត់ខ្លួន។

ករណីទី ២ គឺទាក់ទងនឹងការស្លាប់របស់ក្មេងជំទង់ឈ្មោះ កាល់ អាណាអ៊ីស (Carl Arnaiz) អាយុ ១៩ ឆ្នាំ ដែលត្រូវបានចោទប្រកាន់ពីបទប្លន់អ្នកបើកតាក់ស៊ីម្នាក់។ ប៉ូលិសបាននិយាយថា ក្មេងនោះបានបាញ់រះមកលើពួកខ្លួន តែអ្នកបើកតាក់ស៊ីបាននិយាយថា គាត់ឃើញក្មេងជំទង់នោះនៅមានជីវិតនៅក្នុងកន្លែងឃុំឃាំងរបស់ប៉ូលិស។ ក្មេងប្រុសអាយុ ១៤ ឆ្នាំម្នាក់ទៀត ដែលត្រូវបានឃើញចុងក្រោយជាមួយ អាណាអ៊ីស ក្រោយមកត្រូវបានរកឃើញថាស្លាប់ផងដែរ។

ប៉ូលិសជាច្រើនរូបឥឡូវនេះកំពុងស្ថិតនៅក្រោមការស៊ើបអង្កេត ហើយព្រឹទ្ធសភាកំពុងធ្វើការស៊ើបអង្កេតលើការស្លាប់របស់ក្មេងជំទង់ទាំង៣។ លោក អាល់បាយ៉ាល់ដេ បាននិយាយថា ប៉ូលិសនៅក្នុងខណ្ឌកាលូកាន់នឹងត្រូវបានបណ្តុះបណ្តាលឡើងវិញជាបន្តបន្ទាប់ ហើយប៉ូលិសទាំងអស់នេះនឹងត្រូវជំនួសតំណែងដោយប៉ូលិសមកពីអង្គភាពសន្តិសុខក្នុងតំបន់។

ប្រព័ន្ធផ្សព្វផ្សាយក្នុងស្រុកបានស្រង់សម្តីលោកដោយនិយាយថា “ពួកគេនឹងត្រូវបានបណ្តុះបណ្តាលឡើងវិញ ហើយពួកគេនឹងត្រូវចាត់តាំងឱ្យទៅអង្គភាពដទៃទៀតនៅទីក្រុងម៉ានីល។ ពួកគេនឹងមិនអាចត្រឡប់ទៅកាន់តំណែងរបស់ពួកគេវិញឬការងាររបស់ពួកគេនៅក្នុងខណ្ឌកាលូកាន់បានទេ”៕

ប្រភព៖ rasmeinews