ពលរដ្ឋតាមជនបទ នាំគ្នាដាំដើមចេកជ្វា ជម្នះអប្បិយជំនឿពីបុរាណ

2017-09-17 05:32:03
ចំនួនមតិ 0 | ចំនួនចែករំលែក 0

ចន្លោះមិនឃើញ

ពលរដ្ឋខ្មែរមួយចំនួនហាក់រសាយបន្តិចពីអប្បិយជំនឿទាក់ទងនឹងដើមចេកជ្វា។ បច្ចុប្បន្នគេឃើញមានប្រជាពលរដ្ឋដាំដុះចេកជ្វានេះនៅតាមភូមិស្រុកជាហូរហែរ។

បើតាមលោកយាយថន វ័យប្រមាណជាង៦០ឆ្នាំបានលើកឡើងថា គេពុំសូវជឿលើអប្បិយជំនឿដើមចេកជ្វាទៀតទេ ព្រោះមានគេដាំហូរហែរនៅក្បែផ្ទះ។

លោកយាយបន្ថែមដូច្នេះ៖ "ឥលូវវាសាបរលាបអស់ហើយ គេលែងសូវជឿហើយ គេមិនខ្លាចនឹងដាំវាទៀតទេ សំខាន់វាអត់មានពូជដាំទៀតហ្នឹងហា។ ពីមុនគេជឿថាដាំក្បែផ្ទះទៅវាមានស្អីតោងឡើងផ្ទះតាមចេកហ្នឹង(ចេកជ្វា) ឥលូវគេមិនសូវជឿទេ"។

ស្រដៀងគ្នានេះដែរ លោកយាយនី ក្នុងវ័យជាង៦០ឆ្នាំដូចគ្នា បានរៀបរាប់ថា៖"ពីមុនគេមិនហ៊ានដាំមែន ប៉ុន្តែឥលូវឱ្យតែមានពូជគេដាំហើយ អ៊ើ..កុំឱ្យតែដាំទៅ ស្លឹកឬធាងវាអីហ្នឹង ជាប់មកផ្ទះ។ ស្លឹកវាគេយកទៅវេចនំបាននំល្អៗណាស់ បកឡើងនំឡើងខៀវ។ គេរកតែពូជដាំមិនបានផង។"

មិនខុសគ្នាប៉ុន្មានទេ អ្នកមីងចន្ថា បានប្រាប់ថាគាត់មិនខ្លាចនឹងដាំចេកជ្វានោះទេ សំខាន់ចេកនេះភាគច្រើនមានដុះតែនៅតាមជើងភ្នំ ឬតំបន់ទំនាបផ្សេងៗ។ អ្នកមីងថ្លែងថា៖" អត់មានអីត្រូវខ្លាចទេអូន សំខាន់យើងរកពូជមកដាំវាអត់បាន ព្រោះភាគច្រើនវាដុះនៅតាមជើងភ្នំ។ ចេកហ្នឹងស្លឹកវាគេយកទៅវេចនំ បាននំស្អាតៗណាស់ បើចេកអំបូងអាហ្នឹងបានល្វីងវេចនំអត់បាន។"

ថ្វីត្បិតតែមានការលើកឡើងស្រដៀងគ្នាក្ដី ក៏គេពុំសូវប្រទះឃើញដើមចេកជ្វាត្រូវបានគេដាំដុះនៅក្នុងដីភូមិ ឬក្បែរលំនៅឋានដដែល ហើយភាគច្រើនឃើញតែដាំដុះនៅតាមវត្ត ឬដុះពាសវាលពាសកាលនៅតាមជើងភ្នំជាដើម៕

អត្ថបទ៖ សូទ្រី