កសិករខ្មែរម្នាក់មានគម្រោងដាំដើមប៉ោមជាលក្ខណៈទ្រង់ទ្រាយធំ
- 2017-09-18 01:21:10
- ចំនួនមតិ 0 | ចំនួនចែករំលែក 0
កសិករខ្មែរម្នាក់មានគម្រោងដាំដើមប៉ោមជាលក្ខណៈទ្រង់ទ្រាយធំ
ចន្លោះមិនឃើញ
ប៉ុន្មានថ្ងៃមុននេះមានបុរសម្នាក់បានបង្ហោះវីដេអូមួយនិយាយពីការដាំដើមប៉ោមនៅកម្ពុជាហើយក៏បានទាក់ទាញចំណាប់អារម្មណ៍ពីអ្នកប្រើប្រាស់បណ្តាញហ្វេសប៊ុកមិនតិចដែរ។ ជាការពិតម្ចាស់ហ្វេសប៊ុក Som Oeun Kim បានប្រាប់ Sabay តាមទូរស័ព្ទថាលោកពិតជាបានដាំដើមប៉ោមនោះមែន តែគ្រាន់តែដាំសម្រាប់លម្អរចម្ការប៉ុណ្ណោះ។ ទោះយ៉ាងណាលោកថាក្រោយពីឃើញដើមប៉ោមនេះផ្តល់ផលដូចនេះលោកចង់ពង្រីកការដាំជាលក្ខណៈទ្រង់ទ្រាយធំវិញ។
លោក កឹម សំអឿន បន្តថាលោកបានដាំដើមប៉ោមនេះកាលពីអំឡុងខែសីហា ឆ្នាំ២០១៦ ដែលកាលនោះមិត្តភក្តិរបស់លោកបានឲ្យដើមប៉ោមផ្សាំមែកចំនួនប្រាំដើមមកលោកសម្រាប់ដាំ។ លោកថាពេលនោះដើមប៉ោមមានកម្ពស់ប្រហែលមួយអង្អាមប៉ុណ្ណោះ ដែលមកដល់ពេលនេះលោកថាវាមានកម្ពស់ប្រហែលជា២,៥ម៉ែត្រ។ លោកបញ្ជាក់ថាប៉ោមនេះជាពូជប៉ោមអាហ្វ្រិក ហើយលោកបានដាំវានៅក្នុងដីចម្ការរបស់លោកមួយកន្លែងនៅក្នុងឃុំស្រយ៉ង់ ស្រុកគូលែន ខេត្តព្រះវិហារ។
លោកបន្ថែមថាៈ «តាមពិតទៅខ្ញុំដាំដើមប៉ោមសរុបចំនួន៥ដើម ក្នុងនោះ៤ដើមមានផ្លែ ហើយមួយដើមទៀតអត់មានផ្លែទេ ហើយខ្ញុំក៏មិននឹកស្មានថា ពេលបង្ហោះវីដេអូក្នុងហ្វេសប៊ុកមានគេចាប់អារម្មណ៍ច្រើននោះដែរ...ខ្ញុំអត់ចង់ល្បីអីទេ ក្រោយមកខ្ញុំក៏ប្តូរ Privacy មកជាOnly me វិញ»។
បើតាមលោក សំអឿន ដើមប៉ោមទាំងបួនដែលផ្លែនោះបានហុចផលប្រហែលជាពីរគីឡូក្រាម និងថានៅមានផ្លែខ្លះទៀតមិនទាន់អាចបេះហូបបាននៅឡើយ។ លោកបញ្ជាក់ថា ក្រោយពីឃើញថាចម្ការរបស់លោកអាចដាំប៉ោមបានដូចនេះ លោកមានគម្រោងដាំដើមប៉ោមនេះចំនួនប្រាំពាន់ដើមបន្ថែមទៀត។ លោកបន្តថាៈ «ខ្ញុំមានគម្រោងដាំប្រាំពាន់ដើមទៀត តែសុំលាក់សិនចាំលេចជារូបរាងចាំខ្ញុំបង្ហាញ»។