ឃើញចំណុចថ្មីៗទាំងនេះលើ iOS 11 ធានាថាចង់អាប់ដេតភ្លាម!

2017-09-20 06:54:00
ចំនួនមតិ 0 | ចំនួនចែករំលែក 0

ចន្លោះមិនឃើញ

Apple បានបញ្ចេញប្រព័ន្ធប្រតិបត្តិការ iOS 11 ដាក់ឲ្យប្រើប្រាស់ជាផ្លូវការហើយ។ មនុស្សមួយចំនួននៅរារែកថាគួរអាប់ដេតឡើងទៅ iOS 11 ឬក៏អត់ ប៉ុន្តែពេលដឹងចំណុចពិសេសៗលើប្រព័ន្ធប្រតិបត្តិការជំនាន់ចុងក្រោយតាមរយៈអត្ថបទខាងក្រោមរួច អ្នកនឹងសម្រេចអាប់ដេតភ្លាម។

@ Control Center ថ្មី

នៅលើ iOS 10 Apple បានអាប់ដេត Control Center ដោយបំបែកចេញជាពីរផ្ទាំង ផ្ទាំងទីមួយសម្រាប់បើកមុខងារផ្សេងៗ និងទីពីរសម្រាប់បញ្ជាលើការចាក់ចម្រៀង។ នៅលើ iOS 11 Control Center បានបន្តអាប់ដេតថ្មី ដោយផ្លាស់ប្ដូរផ្ទៃ Interface និងអាចបន្ថែមបន្ថយមុខងារសំខាន់ៗលើ Control Center បាន មានដូចជាមុខងារបើកអ៊ីនធឺណិតទូរសព្ទ, មុខងារ Low-Power Mode និងមុខងារសម្រាប់ថតអេក្រង់ទូរសព្ទជាលក្ខណៈវីដេអូជាដើម។

Control Center ថ្មីនេះក៏បានពង្រីកវិសាលភាពជាមួយនឹងបច្ចេកវិទ្យា 3D Touch ផងដែរ។ ជាមួយនឹងការអាប់ដេតនេះអ្នកនឹងមិនបាច់ចូលទៅកាន់ Settings ញឹកញាប់ដូចលើ iOS មុនៗនោះទេ។

@ Siri

Siri បានអាប់ដេតថ្មីដោយមានសំឡេងកាន់តែដូចធម្មជាតិ និងកាន់តែឆ្លាតវៃជាងមុន។ មួយក្នុងចំណោមនោះគឺ Siri អាចបកប្រែភាសាអង់គ្លេសទៅជាភាសាចិន បារាំង អាល្លឺម៉ង់ អ៊ីតាលី និងអេស្ប៉ាញ បានភ្លាមៗ។

@ ការរក្សាទុករូបភាព

វិធីសាស្ត្រនៃការរក្សាទុករូបភាព ឬ វីដេអូបានកែប្រែ ដោយរូបភាព ឬ វីដេអូនឹងស៊ីទំហំមេមូរីតិចជាងមុននៅលើ iPhone ឬ iPad។ សម្រាប់វីដេអូ Apple បានរក្សាទុកតាម Encoding H.265 ឬ HEVC ដែលបង្រួមទំហំ (Compress) បានតូចជាងមុន ២ ដង។ រូបភាពដែលពីមុនជាប្រភេទ JPEG ពេលនេះបានប្ដូរទៅជា HEIF ដែលមានទំហំតូចជាងមុន ២ ដងដូចគ្នា។ បញ្ជាក់ថា Format ថ្មីនេះមានសម្រាប់តែផលិតផល Apple ដែលប្រើបន្ទះឈីបចាប់ពីស៊េរី A9 ឡើងទៅប៉ុណ្ណោះ។

@ ក្ដារចុចដែលអាចប្រើដោយដៃម្ខាង

ប្រសិនបើចុចលើ Icon រូបផែនដី ឬ រូប Emoji លើក្ដារចុច iPhone អ្នកនឹងឃើញមានជម្រើសប្រើក្ដារចុច One-Handed Keyboard ដែលទាញគ្រាប់ចុចទាំងអស់មកខាងឆ្វេង ឬស្ដាំ ដើម្បីឲ្យអ្នកអាចវាយអក្សរដោយប្រើដៃតែម្ខាង។

@ App Store រចនាថ្មី

App Store រចនារូបរាងថ្មីដោយបានបែងចែកកម្មវិធី និងហ្គេមជាពីរ Tab ផ្សេងគ្នា ហើយក៏មានបន្ថែម Tab ថ្មីឈ្មោះថា "Today” ដែលជាកន្លែងសម្រាប់ស្វែងរកកម្មវិធីថ្មីៗ ឬ ហ្គេមថ្មីៗប្រចាំថ្ងៃ។

មុខងារបង្កប់លើ iOS 11

មិនខុសពី iOS ជំនាន់មុនៗ នៅលើ iOS 11 នេះក៏សម្បូរទៅដោយមុខងារបង្កប់ជាច្រើនដែរ ដោយកន្លងមកមុខងារបង្កប់ដែលគេប្រទះឃើញលើ iOS 11 មានដូចខាងក្រោម ៖

@ Offload Unused Apps ៖

ក្នុង Settings មានជម្រើសថ្មីដែលវានឹង Uninstall (លុប) កម្មវិធីមួយដែលមិនបានប្រើក្នុងរយៈពេលណាមួយ ចេញដោយស្វ័យប្រវត្តិ។ ទិន្នន័យ ឬ ឯកសារដែលមានក្នុងកម្មវិធីដែលបានលុបនេះ នឹងត្រូវរក្សាទុក ក្នុងករណីដែលកម្មវិធីនេះត្រូវបានដំឡើងឡើងវិញ។

@ កែប្រែលើកន្លែងបង្ហាញពី Storage ៖

Tab ចាស់ឈ្មោះ "Storage and iCloud Uasge” ត្រូវបានប្ដូរដាក់ឈ្មោះថ្មីថា "iPhone Storage” ដែលបង្ហាញពីទំហំអង្គផ្ទុកទិន្នន័យទូរសព្ទ រួមទាំងមានបញ្ចូលមុខងារថ្មីៗមួយចំនួនត្រង់កន្លែង "Recommendations”។

@ Smart Invert ៖

ក្នុង Settings នៅពីក្រោមពាក្យថា Accessibility > Display Accommodations > Invert Colors មានបន្ថែមជម្រើសថ្មីឈ្មោះថា "Smart Invert”។ Smart Invert នឹងប្ដូរពណ៌ (Reverse) ការបង្ហាញលើអេក្រង់ទាំងអស់ លើកលែងតែរូបភាព, វីដេអូ និងកម្មវិធីមួយចំនួន។ វាមានលក្ខណៈស្រដៀងគ្នានឹងមុខងារ Dark Mode ដែលអ្នកប្រើប្រាស់ជាច្រើនសង្ឃឹមថានឹងមានលើ iOS 11 ដែរ។

@ ផ្ទាំងបន្ថែម/បន្ថយសំឡេង ៖

លើ iOS 11 ពេលទស្សនាវីដេអូ បើសិនបន្ថែម ឬ បន្ថយសំឡេងនឹងលែងឃើញមានផ្ទាំងមកបាំងពេញអេក្រង់ទៀតហើយ ដោយជំនួសមកវិញនូវផ្ទាំងតូចមួយ នៅផ្នែកលើខាងស្ដាំនៃវីដេអូវិញម្ដង។

បញ្ជាក់ថាខាងលើគ្រាន់តែជាការបង្ហាញពីចំណុចផ្លាស់ប្ដូរសំខាន់ៗមួយចំនួនប៉ុណ្ណោះ នៅមានមុខងារ និងចំណុចពិសេសៗដទៃទៀតដែលមិនបានបង្ហាញឲ្យអស់៕

ប្រភព៖ macrumors ប្រែសម្រួល៖ សុខហេង