ទឹករលកសមុទ្រសិប្បនិម្មិតលើកដំបូងនៅកម្ពុជា ទាក់ទាញការអារម្មណ៍អ្នកបាត់ដំបង

2017-09-22 00:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

អាចចាត់ទុកជាការច្នៃប្រឌិតមួយដើម្បីទាក់ទាញការចាប់អារម្មណ៍ដល់អតិថិជន រមណីយ៍ដ្ឋានកែច្នៃមួយកន្លែង ក្នុងខេត្តបាត់ដំបងបានបង្កើតជាអាងទឹករលកសមុទ្រសិប្បនិម្មិត និងទើបដាក់ឱ្យដំណើរការកាលពីចុងសប្តាហ៍មុន។ អាងទឹករលកសិប្បនិម្មិតនេះមានទីតាំងស្ថិតនៅក្នុងមជ្ឈមណ្ឌលសុភមង្គលក្រុងបាត់ដំបង ម្តុំផ្លូវក្រវ៉ាត់ក្រុង។ កញ្ញា ស៊ន សុខកញ្ញា អ្នកគ្រប់គ្រងទូទៅនៅមជ្ឈមណ្ឌល សុភមង្គលក្រុងបាត់ដំបងបានប្រាប់ sabay ឱ្យដឹងថា មូលហេតុដែលមជ្ឈមណ្ឌលនាំយកបច្ចេកទេសអាងសិប្បនិម្មិតនេះដាក់ដំណើរការ ដោយសារចង់បង្ហាញពីការច្នៃប្រឌិតថ្មីៗ និងប្លែកអារម្មណ៍សម្រាប់អតិថិជនមកកម្សាន្ត ខណៈអាងទឹករលកសិប្បនិម្មិតនេះមិនទាន់មានក្នុងប្រទេសកម្ពុជានៅឡើយ។

(អាងទឹកមជ្ឈមណ្ឌល សុភមង្គលក្រុងបាត់ដំបង មើលពីលើ)

កញ្ញាបន្តថា បន្ទាប់ពីដាក់ឱ្យដំណើការចាប់ពីថ្ងៃទី១៥ ខែកញ្ញា មកមណ្ឌលកម្សាន្តនេះមានការចាប់អារម្មណ៍ពីមនុស្សគ្រប់វ័យក្នុងខេត្តបាត់ដំបងមកហែលទឹកកម្សាន្ត។ ដោយមិនប្រាប់ពីទំហំទឹកប្រាក់វិនិយោគ និងបច្ចេកទេសមកពីប្រទេសណានោះ កញ្ញាបានបង្ហើបថា អាងទឹកសិប្បនិម្មិតនេះក៏ឃើញមានដាក់ឱ្យដំណើរការនៅរមណីយដ្ឋានល្បីមួយក្នុងប្រទេសថៃ។ កញ្ញាបន្ថែមថា នៅមជ្ឈមណ្ឌល មានអាងចំនួន៤ អាងនីមួយៗមានទំហំ ១២៤០ម៉ែត្រការ៉េ និងមានទឹករលកចន្លោះពី១ម៉ែត្រទៅជាង១ម៉ែត្រ ដែលអាចឲ្យមនុស្សពេញវ័យហែលលេងបាននិង ក្មេងជំទង់អាចហែលលេងបាន។ «អ្នកខ្លះគាត់អត់ដែលបានទៅសមុទ្រទេបង…ចឹងពេលគាត់ឃើញចឹងទៅដូចថាអារម្មណ៍ប្លែក ពិសេសទឹករលកបោកប៉ះខ្លួនមានអារម្មណ៍រីករាយដូចបានទៅលេងសមុទ្រចឹងដែរ។ប៉ុន្តែទឹកហ្នឹងអត់ប្រៃដូចទឹកសមុទ្រទេ »។ កញ្ញាបន្ថែម។

(អាងហែលទឹកមើលពីលើ)

ក្រៅពីមានអាងទឹកសមុទ្រសិប្បនិម្មិត មណ្ឌលកម្សាន្តមួយនេះក៏មានសួនច្បា រូបសត្វផ្សេងៗ ព្រមទាំងផ្សារបន្លែសេរីរាង្គសម្រាប់អតិថិជនជនជាវផងដែរ។ នេះបើតាមកញ្ញា ស៊ន សុខកញ្ញា ថ្លែងប្រាប់ sabay ។

អត្ថបទដោយ៖ សុផល

រូបភាព៖ ផ្តល់ឲ្យ