សិល្បករចាប៉ីដងវែងទូទាំងប្រទេសចូលរួមប្រឡងក្នុងមហោស្រពថ្នាក់ជាតិ២០១៧

2017-09-22 07:11:26
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រសួងវប្បធម៌និងវិចិត្រសិល្បៈនិងរៀបចំមហោស្រពចាប៉ីដងវែង ឆ្នាំ២០១៧ នៅថ្ងៃទី២៣ ស្អែកនេះ ដោយការធ្វើមហោស្រពនេះនឹងប្រឡងសមត្ថភាពសិល្បករចាប៉ីដងវែងទូទាំងប្រទេស។

រូបតំណាង

ប្រធាននាយកដ្ឋានសិល្បៈទស្សនីយភាព លោក ប៊ុត ចាន់ណា បានប្រាប់ Sabay ថា ការរៀបចំមហោស្រពចាប៉ីដងវែង និងឧបករណ៍ខ្សែមួយ (ខ្សែដៀវ) នេះឡើង គឺក្នុងគោលបំណងអភិរក្សនិងអភិវឌ្ឍន៍ទម្រង់ចាប៉ីដងវែងឲ្យគង់វង្ស។ មួយវិញទៀតដើម្បីផ្សព្វផ្សាយទម្រង់មួយនៅទៅកាន់យុវវ័យនិងក្មេងជំនាន់ក្រោយៗឲ្យបានដឹងនិងចូលរួមថែរក្សា។ អ្នករៀបចំមហោស្រពចាប៉ីដងវែងរូបនេះបន្ថែមទៀតថា ឆ្នាំនេះមានការដាក់បញ្ចូលទម្រង់ឧបករណ៍ខ្សែដៀវចូលរួមប្រកួតដែរ ការដាក់នេះក៏ដោយសារតែក្រសួងវប្បធម៌មើលឃើញថា ឧបករណ៍មួយនេះប្រឈមនឹងការបាត់បង់បន្តិចម្ដងៗ ព្រោះមិនសូវមានអ្នករៀន។

“មហោស្រពឆ្នាំនេះ មានប្រឡងចាប៉ី និងឧបករណ៍ខ្សែដៀវ។ បានជាយើងប្រឡងទម្រង់ពីរនេះដោយសារតែទម្រង់ចាប៉ីបានចុះបញ្ជីជាបេតិកភណ្ឌពិភពលោកហើយ ដូច្នេះយើងត្រូវតែខំផ្សព្វផ្សាយ បើមិនដូច្នោះគេអាចលុបចេញពីបញ្ជីវិញ។ ខ្សែដៀវវិញឥឡូវនេះវាប្រឈមនិងការបាត់បង់ហើយ ដូច្នេះយើងត្រូវខំផ្សព្វផ្សាយឲ្យបានកាន់តែធំទូលាយ”។ លោក បញ្ជាក់។

មហោស្រពចាប៉ីដងវែងនេះ រៀបចំឡើងតាំងពីឆ្នាំ១៩៩១មកម្ល៉េះ ការរៀបចំឆ្នាំមុនៗមានប្រឡងតាំងពីចាប៉ីដងវែង អាយ៉ៃ យីកេ ជាដើម។ ដោយឡែកឆ្នាំនេះ មហោស្រពចាប៉ីដងវែងមានប្រឡងពីរទម្រង់គឺ ចាប៉ីដងវែង និងឧបករណ៍ខ្សែដៀវ។ អ្នកដែលជាប់ជ័យលាភីលេខ១និងទទួលបានពាន១ រួមនិងថវិកាមួយចំនួន។ ក្រៅពីនោះអ្នកដែលប្រឡងចាប៉ីទាំងអស់ក្នុងមហោស្រពនេះ សម្ដេចនាយករដ្ឋមន្ត្រី នឹងអនុញ្ញាតឲ្យចូលជួបនៅវិមានសន្តិភាពផងដែរ។

បើតាមលោក ប៊ុន ចាន់ណា គិតត្រឹមថ្ងៃទី២២នេះ ផ្នែកទម្រង់ចាប៉ីមានអ្នកដាក់ពាក្យប្រឡងប្រមាណ ១៧ខេត្តក្រុងហើយ ចំណែកឯផ្នែកឧបករណ៍ខ្សែដៀវវិញមានប្រមាណ៨នាក់។

រូបតំណាង

បញ្ជាក់របាយការណ៍នេះមិនទាន់បូកសរុបអស់នៅឡើយទេ ព្រោះនៅមានបេក្ខជនដាក់ពាក្យជាបន្តបន្ទាប់។ មហោស្រពនេះធ្វើឡើងនៅ នាយកដ្ឋានសិល្បៈទស្សនីយភាព នៅថ្ងៃទី២៣ ខែកញ្ញា ចាប់ពីម៉ោង៨ កន្លះ ដល់ ម៉ោង ៦ កន្លះ។ បិតបញ្ចប់ទៅវិញនៅសាលចតុម្មុខនៅថ្ងៃទី ២៤ ខែកញ្ញា២០១៧ ដោយធ្វើរួមជាមួយនឹងការអបអរសាទរការវិលត្រឡប់ពីទទួលពានរង្វាន់សិល្បៈវប្បធម៌ហ្វុកុអូកា នៃប្រទេសជប៉ុនរបស់លោក ព្រឹទ្ធាចារ្យកោសល្យវោហារ គង់ ណៃ ផងដែរ៕

អត្ថបទ៖ ប៉ូ សាគុន