រថយន្តបុកទ្រុឌក្បាល ទទួលបានសំណងជាង ៣៦លានដុល្លារ

2017-09-23 06:21:54
ចំនួនមតិ 0 | ចំនួនចែករំលែក 0

ចន្លោះមិនឃើញ

កុមារី ១១ឆ្នាំ រស់នៅសហរដ្ឋអាមេរិក បានឈ្នះក្ដីដោយទទួលសំណង ៣៦លានដុល្លារ បន្ទាប់ពីរថយន្តមួយគ្រឿងបុកទ្រុឌក្បាល ខណៈពេលនាងដើរឆ្លងផ្លូវទៅជិះរថយន្តក្រុងរបស់សាលាបឋម Bonnie Oehl នៅរដ្ឋកាលីហ្វញ៉ា កាលពីថ្ងៃទី ៣តុលា ឆ្នាំ ២០១២។

កុមារីនេះមានឈ្មោះ Isabella Escamilla Sanchez ពេលកើតហេតុនាងមានអាយុ ៦ឆ្នាំ នាងត្រូវរថយន្តធុនតូចប្រភេទ Subaru Impreza បុកខ្ទាតលើអាកាសចម្ងាយ ២១ម៉ែត្រនៅទីក្រុង Highland រដ្ឋកាលីហ្វញ៉ា។

កុមារី Sanchez បានកើតជំងឺបេះដូង បន្ទាប់ពីធ្លាក់ដល់ដីវិញ ព្រមទាំងបាក់ឆ្អឹងក ឆ្អឹងដៃ ជើង និងត្រគាក។ ក្រុមគ្រួសារកុមាររងគ្រោះបានដាក់ពាក្យបណ្ដឹងប្រឆាំងនឹងក្រុមហ៊ុនរថយន្តក្រុងរបស់សាលា Durham School Services ក្នុងឆ្នាំ ២០១៣ ដោយចោទថា មិនបានប្រាប់ និងការពារពេលក្មេងឆ្លងផ្លូវ។

បន្ទាប់ពីបើកសវនាការចំនួន ៥សប្ដាហ៍ ក្រុមមេធាវីដើមបណ្ដឹង បានរកឃើញក្រុមហ៊ុនរថយន្តក្រុងបានរួមចំណែកធ្វើឲ្យកើតមានគ្រោះថ្នាក់ចរាចរណ៍នេះដល់ទៅ ៨០% និង ២០% ទៀតមកពីម្ដាយរបស់កុមារី។

ម្ដាយរបស់ Sanchez និយាយថាគាត់ និងគ្រួសារមិនមានពេលសម្រាកគ្រប់គ្រាន់ទេ ចាប់តាំងពីកូនស្រីជួបគ្រោះថ្នាក់មក។ នៅថ្ងៃទី ២២កញ្ញាកន្លងទៅ ក្រុមហ៊ុនរថយន្តក្រុងព្រមប្រគល់ទឹកប្រាក់ចំនួន ៣៦,១លានដុល្លារទៅឲ្យក្រុមគ្រួសារ សម្រាប់ថ្លៃព្យាបាល និងចំណាយនានា៕