កិត្តិយសបំផុត! ទិដ្ឋភាពព្រឹទ្ធាចារ្យ គង់ ណៃ ទទួលពានរង្វាន់ Fukuoka ពីព្រះអម្ចាស់ Akishino នៅជប៉ុន
- 2017-09-25 07:16:16
- ចំនួនមតិ 0 | ចំនួនចែករំលែក 0
កិត្តិយសបំផុត! ទិដ្ឋភាពព្រឹទ្ធាចារ្យ គង់ ណៃ ទទួលពានរង្វាន់ Fukuoka ពីព្រះអម្ចាស់ Akishino នៅជប៉ុន
ចន្លោះមិនឃើញ
ព្រឹទ្ធាចារ្យកោសល្យវោហារគង់ ណៃ ត្រូវបានក្រុង Fukuoka ប្រទេសជប៉ុនអញ្ជើញទទួលជយលាភីពានរង្វាន់ក្រុង Fukuoka ឆ្នាំ ២០១៧ ផ្នែកសិល្បៈ និងវប្បធម៌កាលពីថ្ងៃព្រហស្បតិ៍ទី ២១ ខែកញ្ញា ២០១៧ អមដោយមានវត្តមានដ៏ខ្ពង់ខ្ពស់របស់ព្រះអម្ចាស់ Akishino និងព្រះមហេសីផង។
ការប្រគល់ពានរង្វាន់ទីក្រុង Fukuoka លើកទី ២៨ នេះមានជយលាភីមកពី៣ប្រទេសក្នុងតំបន់អាស៊ី ក្នុងនោះក្រៅពីព្រឹទ្ធាចារ្យចាប៉ី គង់ ណៃ មានជយលាភីមកពីប្រទេសចិន គឺលោក Wang Ming ផ្នែកការសិក្សាសម្រាប់ការជំរុញឲ្យមានការបង្កើតស្ថាប័នសិក្សាពីអង្គការមិនទទួលប្រាក់កម្រៃនៅចិន និងលោកបណ្ឌិត Chris Baker និងភរិយាលោកស្រី Pasuk Phongpaichit មកពីថៃ សម្រាប់ការស្រាវជ្រាវអស់រយៈពេលជាច្រើនឆ្នាំរបស់ប្តីប្រពន្ធទាំងពីរលើវិស័យសេដ្ឋកិច្ច និងប្រវត្តិសាស្ត្រទាំងក្នុងប្រទេសថៃ និងតំបន់អាស៊ី។
ក្នុងពិធីពានរង្វាន់ទីក្រុងធំលំដាប់ទី ៥ របស់ជប៉ុនដដែល ព្រះអម្ចាស់ Akishino ទ្រង់បានចូលរួមអបអរសាទរចំពោះជយលាភីទាំងបីប្រទេស ហើយព្រះអង្គមានបន្ទូលថា កម្មវិធីនេះនឹងបន្តលើកកម្ពស់ការយល់ដឹងពីវប្បធម៌ចម្រុះជាតិសាសន៍នៅក្នុងតំបន់អាស៊ីកាន់តែស៊ីជម្រៅទៀត។
ស្របគ្នានេះ អភិបាលក្រុង Fukuoka លោក Soichiro Takashima បានសម្តែងការសាទរអស់ពីចិត្តចំពោះអ្នកឈ្នះទាំងអស់។ លោកសង្ឃឹមថា កម្មវិធីនេះនឹងបន្តឲ្យប្រជាជាតិក្នុងតំបន់អាស៊ីស្គាល់ និងយល់កាន់តែច្បាស់ពីវប្បធម៌គ្នាទៅវិញទៅមក ក៏ដូចជាឲ្យពិភពលោកស្គាល់ពីតម្លៃនៃវម្បធម៌ចម្រុះសាសន៍នេះ។
ក្នុងពិធីដ៏មហោឡារិក អ្នកចាប៉ីជើងចាស់ក៏បានសម្តែងនូវសោមនស្សយ៉ាងខ្លាំងក្លាចំពោះផ្លែផ្កាដែលបានមកពីការខិតខំអភិរក្សសិល្បៈបុរាណមួយនេះមិនឲ្យបាត់បង់។ "ខ្ញុំមានសេចក្តីរីករាយឥតឧបមាដែលចាប៉ីឈ្នះពានពីទីក្រុង Fukuoka ក្រោយអង្គការយូណេស្កូចាត់បញ្ចូលជាបេតិកភណ្ឌពិភពលោកនៅថ្ងៃទី ៣០ វិច្ឆិកា ២០១៦"។ អ្នកសិល្បៈជើងចាស់សម្បូរវោហាវ័យ ៧២ ឆ្នាំបន្តថា ចាប៉ីដងវែងនឹងបន្តរស់ជាច្រើនឆ្នាំទៅមុខទៀត។
ក្រៅពីទទួលពានរង្វាន់ពីក្រុង Fukuoka ព្រឹទ្ធាចារ្យគង់ ណៃ ក៏ត្រូវអញ្ជើញទៅសម្តែងដល់សិក្សានុសិស្សអនុវិទ្យាល័យ ក៏ដូចជាប្រជាជនភាគអាគ្នេយ៍ប្រទេសជប៉ុនមួយនេះបានទស្សនាយ៉ាងរីករាយ។
កម្មវិធីប្រគល់ពានរង្វាន់ក្រុង Fukuoka ត្រូវបានបង្កើតឡើងអស់រយៈពេល ២៨ ឆ្នាំមកហើយ ដោយក្នុងនោះអ្នកមានស្នាដៃលេចធ្លោទាំងក្នុងតំបន់អាស៊ី និងក្រៅតំបន់បានទទួលពានរង្វាន់សរុបមាន ១០៩ នាក់មកពី ២២ ប្រទេស។ លោកព្រឹទ្ធាចារ្យកោសល្យវោហារគង់ ណៃ ជាប្រជាជនកម្ពុជាទី ៣ ដែលទទួលពាននេះបន្ទាប់ពីលោកសាស្ត្រាចារ្យ អាង ជូលៀន និងព្រឹទ្ធាចារ្យ ឆេង ផុន អតីតរដ្ឋមន្រ្តីក្រសួងវប្បធម៌ ដែលជាជនជាតិខ្មែរដំបូងគេទទួលពានរង្វាន់នៅក្នុងឆ្នាំ ១៩៩៧។ កម្មវិធីនេះត្រូវបានបង្កើតឡើងក្នុងគោលបំណងប្រគល់កិត្តិយសដល់អ្នកមានស្នាដៃក្នុងតំបន់អាស៊ី និងដើម្បីស្វែងយល់កាន់តែច្បាស់ពីវប្បធម៌របស់គ្នាទៅវិញទៅមក៕
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
