កីឡាករ ៥ រូបបង្ហាញខ្លួនច្រើនជាងគេក្នុងប្រវត្តិសាស្ត្រ UCL

2017-09-25 13:06:55
ចំនួនមតិ 0 | ចំនួនចែករំលែក 0

ចន្លោះមិនឃើញ

ជាមួយនឹងការជិតត្រលប់មកវិញ នៃការប្រកួតបាល់ទាត់ក្របខ័ណ្ឌកំពូលអឺរ៉ុបនាយប់ថ្ងៃអង្គារខាងមុខនេះ សូមបង្វែរអារម្មណ៍ប្រិយមិត្តមកក្រឡេកមើលកីឡាករទាំង ៥ ដែលមានវត្តមានច្រើនជាងគេក្នុងប្រវត្តិសាស្ត្រនៃការប្រកួត Champions League មានដូចតទៅ៖

៥. Ryan Giggs ៖ វីរបុរសរបស់ក្លឹបបិសាចក្រហម Manchester United រូបនេះ បានបង្ហាញខ្លួនក្នុងការប្រកួតក្របខ័ណ្ឌមួយនេះឲ្យក្លឹបមួយនេះ រហូតដល់ទៅ ១៤១ដង ដោយក្នុងនោះត្រូវបានដាក់ឲ្យចូលលេងតាំងពីដើមតង់ ចំនួន ១១៨ដង ហើយស៊ុតបញ្ចូលទីបាន ២៨គ្រាប់ មុនពេលចូលនិវត្តន៍ក្នុងឆ្នាំ ២០១៤។

៤. Cristaino Ronaldo ៖ ម្ចាស់ជើងឯក Ballon D'or ឆ្នាំ ២០១៦រូបនេះ លេងក្នុងការប្រកួត Champions League ចំនួន ១៤១ដង ដូច Giggs ដែរ តែខុសត្រង់ថា ខ្សែប្រយុទ្ធសញ្ជាតិព័រទុយហ្គាល់រូបនេះនៅបន្តលេងនៅឡើយ ហេតុនេះចំនួននៃការបង្ហាញខ្លួនអាចនឹងបន្តកើនឡើងនៅពេលខាងមុខ។ ក្នុងការបង្ហាញខ្លួនទាំងនេះ Ronaldo បំប៉ោងសំណាញ់ទីរហូតបានចំនួន ១០៧ គ្រាប់ កំពុងនាំមុខគេក្នុងចំណោមកីឡាករដែលស៊ុតចូលទីច្រើនជាងគេ ក្នុងប្រវត្តិសាស្ត្រក្របខ័ណ្ឌបាល់ទាត់មួយនេះ។

៣. Raul ៖ វីរបុរសក្លឹបយក្សអេស្ប៉ាញ Real Madrid និងជាកីឡាករដែលពាក់លេខ ៧ មុន Cristaino Ronaldo ក្នុងក្លឹបមួយនេះ មានវត្តមានក្នុងការប្រកួតបាល់ទាត់កំពូលអឺរ៉ុប UCL បានចំនួន ១៤២ ដង ដោយក្នុងនោះស៊ុតចូលទីបាន ៧១ គ្រាប់។

២. Xavi ៖ អតីតខ្សែបម្រើដ៏ឆ្នើមរបស់ក្លឹបអ្នកមានបុណ្យ Barcelona រូបនេះ បានបង្ហាញខ្លួនក្នុងការប្រកួត Champions League ចំនួន ១៥១ ដង ដោយស៊ុតបញ្ចូលទីបានចំនួន ១១គ្រាប់ មុនពេលចាកចេញពីក្លឹបយក្សអេស្ប៉ាញមួយនេះទៅចូលរួមជាមួយក្លឹបកាតា Al Sadd SC កាលពីឆ្នាំ ២០១៥។

១. Iker Casillas ៖ វីរបុរសក្លឹប Real Madrid ដែលបច្ចុប្បន្នកំពុងលេងឲ្យក្លឹបយក្សព័រទុយហ្គាល់ Porto រូបនេះ បានបង្ហាញខ្លួនក្នុងការប្រកួតបាល់ទាត់ក្របខ័ណ្ឌកំពូលអឺរ៉ុបរូបនេះបានចំនួន ១៦៥ដង ហើយក្នុងនោះចាប់ផ្ដើមលេងតាំងពីដើមតង់រហូតដល់ទៅចំនួន ១៦៤ ដង។ បច្ចុប្បន្នអ្នកចាំទីរូបនេះ ឈរចំណាត់ថ្នាក់លេខ ១ក្នុងចំណោមកីឡាករដែលបង្ហាញខ្លួនច្រើនដងជាងគេក្នុងប្រវត្តិសាស្ត្រនៃការប្រកួតបាល់ទាត់ Champions League៕

ប្រភព៖ StatBunker ប្រែសម្រួល៖ ហ៊ីម រស្មី