ដើរស្វែងរកការងារតាមក្ដីស្រមៃ ២០គីឡូម៉ែត្ររាល់ថ្ងៃ ទីបំផុតជួបរឿងមិននឹកស្មាន

2017-09-28 23:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

បុរសវ័យក្មេងជនជាតិម៉ាឡេស៊ីម្នាក់ បានធ្វើឲ្យមហាជនកោតសរសើរ និងអាណិតអាសូរជាខ្លាំង បន្ទាប់ពីដឹងថា លោកបានចំណាយពេលដើរ ២០គីឡូម៉ែត្ររៀងរាល់ថ្ងៃ ដើម្បីស្វែងរកការងារក្នុងក្ដីសុបិន។

បុរសរូបនេះមានឈ្មោះ Shatish Nayar អាយុ ២៤ឆ្នាំ បានទៅជួបអ្នកដឹកនាំរឿងឈ្មោះ Shuhaimi Zulkefli ក្នុងសភាពហត់ហេវ បន្ទាប់ពីដើរក្នុងចម្ងាយផ្លូវដ៏វែងឆ្ងាយ។ ពេលទៅជួបអ្នកដឹកនាំរឿង លោក Shatish បានសួរត្រង់ៗថា "តើលោកជាអ្នកដឹកនាំរឿងមែនទេ? មានត្រូវការជ្រើសរើសបុគ្គលិកទេ? ខ្ញុំកំពុងស្វែងរកការងារ”?

នៅពេលគេសួរពីបទពិសោធន៍ការងារក្នុងវិស័យឧស្សាហកម្មនេះលោករៀបរាប់ថា "ពីមុនខ្ញុំបានរៀនថ្នាក់កម្រិតឌីប្លូមផ្នែកផ្សព្វផ្សាយ និងភាពយន្ត នៅទីក្រុងកូឡាឡាំពួរ ប៉ុន្តែខ្ញុំបានបោះបង់ចោល។ ខ្ញុំបានព្យាយាមត្រួសត្រាយផ្លូវប៉ុន្តែបរាជ័យ។ ខ្ញុំមិនសូវចេះអ្វីច្រើនទេ ប៉ុន្តែមានឆន្ទៈមោះមុតខាងសមិទ្ធិករភាពយន្ត។ ជារៀងរាល់ថ្ងៃ ខ្ញុំបានដើរពីបន្ទប់ជួលរបស់ខ្ញុំនៅតំបន់ Batu Caves មកកាន់ទីក្រុងកូឡាឡាំពួរ ដើម្បីស្វែងរកការងារខាងភាពយន្ត។ ខ្ញុំមិនមានប្រាក់ច្រើនទេសម្រាប់ជិះរថយន្ត"។

លោកបានអត់អាហារ ៣ថ្ងៃហើយ ប៉ុន្តែលោកចាត់ទុកថា មិនមែនជារឿងសំខាន់ឡើយ ពេលនេះលោកកំពុងរកការងារធ្វើដើម្បីទិញអាហារ។

ចំណែកម្ដាយរបស់ Shatish តែងតែជំរុញលើកទឹកចិត្តរូបគេឲ្យក្លាយជាសមិទ្ធិករភាពយន្ត។ "ម្ដាយខ្ញុំសប្បាយរីករាយណាស់នៅពេលខ្ញុំចូលរៀននៅកូឡាឡាំពួរ។ គាត់សង្ឃឹមថា ខ្ញុំអាចរកសញ្ញាប័ត្រខាងផលិតភាពយន្តបាន។ ប៉ុន្តែក្រោយពីចូលរៀនបានរយៈពេលមួយសប្ដាហ៍ ម្ដាយរបស់ខ្ញុំបានទទួលមរណភាព ហើយខ្ញុំត្រូវឈប់រៀនកណ្ដាលទីតែម្ដង ហើយទៅថតរឿងខ្លីៗបន្តិចបន្តួច"។ លោករៀបរាប់។

ឯឪពុករបស់ Shatish មិនដែលចង់ឲ្យកូនធ្វើការខាងផលិតភាពយន្តដូចជា អ្នកដឹកនាំរឿង និងអ្នកសរសេរអត្ថបទរឿងដូចម្ដាយឡើយ ព្រោះគាត់គិតថា ជាការងារពិបាកស្វែងរក។

ក្រោយពីបាត់បង់ម្ដាយ លោកបានក្លាយជាមនុស្សរសាត់អណ្ដែតគ្មានទីពឹង សូម្បីតែខោអាវស្លៀកពាក់នេះក៏គេឲ្យដែរ។ លោកកំពុងធ្វើការជាសន្តិសុខយាម និងជាកម្មករម្នាក់។ នៅពេលល្ងាចលោកបានដើរត្រលប់ពីទីក្រុងកូឡាឡាំពួរទៅកាន់ Batu Caves វិញ។

លោកធ្លាប់ដើរដាក់ពាក្យសុំធ្វើការនៅតាមផលិតកម្មបីបួនដែរ ប៉ុន្តែមិនដែលទទួលបានការឆ្លើយតបទេ ពីព្រោះតែរូបរាងរបស់គាត់។ ទោះជាស្ថានភាពជីវភាពលំបាកប៉ុនណា ក៏លោកមិនដែលលើកដៃសុំទានគេដែរ ព្រោះម្ដាយលោកបានប្រៀនប្រដៅមិនឲ្យធ្វើសកម្មភាពខុសច្បាប់ ដោយស្វែងរកការងារសមរម្យ និងមិនត្រូវក្លាយជាអ្នកសុំទានដាច់ខាត។ ទីបំផុត មេដឹកនាំរឿង បានទទួលបុរសក្រីក្ររូបនេះចូលធ្វើការ។

អ្នកដឹកនាំរឿងលោក Shuhaimi បានចែករំលែករឿងរ៉ាវរំជួលចិត្តនេះនៅលើគណនីហ្វេសប៊ុក និងទទួលបានការចែករំលែកបន្តជាង ២,២ម៉ឺនដង។ លោករៀបរាប់ថា ភាពជម្នះតស៊ូរបស់បុរសកម្សត់នេះ បានលើកទឹកចិត្តគ្រប់គ្នា មិនឲ្យបោះបង់ក្ដីស្រមៃទោះជួបបញ្ហាលំបាកយ៉ាងណាក៏ដោយ។ គ្រប់គ្នាបានជូនពរលោកចំពោះការទទួលបានការងារថ្មីស្របតាមក្ដីស្រមៃយ៉ាងច្រើនផងដែរ៕