កែវ សុនន្ទកវី ស៊ូមិនតិចទេ ពេលខ្លះលេងភ្លេងចប់អត់បាយក៏មានដែរ ទម្រាំរក្សាកេរ្តិ៍ឈ្មោះអ្នកភ្លេងបាន៦ជំនាន់
- 2017-10-02 02:47:45
- ចំនួនមតិ 0 | ចំនួនចែករំលែក 0
កែវ សុនន្ទកវី ស៊ូមិនតិចទេ ពេលខ្លះលេងភ្លេងចប់អត់បាយក៏មានដែរ ទម្រាំរក្សាកេរ្តិ៍ឈ្មោះអ្នកភ្លេងបាន៦ជំនាន់
ចន្លោះមិនឃើញ
លោក កែវ សុនន្ទកវី បានថែរក្សាត្រកូលរបស់ខ្លួនជាអ្នកភ្លេងរហូតបាន៦ជំនាន់ ហើយលោកក៏ស្នងកេរ្តិ៍ឈ្មោះល្បីល្បាយពីឪពុក និងជីតាបានរហូតមកដល់សព្វថ្ងៃដែរ។
សាស្ត្រាចារ្យនៅសាកលវិទ្យាល័យភូមិន្ទវិចិត្រសិល្បៈ លោក កែវ សុនន្ទកវី បានប្រាប់ Sabay ថា ការធ្វើជាតន្ត្រីករគឺមានផលលំបាកច្រើន ពេលខ្លះលោកចង់បោះបង់ចោលម្ដងៗ តែលោកនៅតែខំថែរក្សាកេរ្តិ៍ដំណែលដែលឪពុកទុកឱ្យ។ រម្លឹកពីអតីតកាលបន្តិច ពេលលោករៀននៅថ្នាក់ទី១២ លោកត្រូវរៀនបណ្ដើរធ្វើជាគ្រូភ្លេងបណ្ដើរ ដោយសារតែជំនាន់នោះខ្វះគ្រូច្រើន។
“មិនមែនអួតទេ តែវាជាការពិត កាលខ្ញុំរៀនថ្នាក់ទី១២ ខ្ញុំត្រូវបង្ខំចិត្តរៀនបណ្ដើរធ្វើជាគ្រូបណ្ដើរ។ កាលណោះអាចនិយាយបានថាខ្ញុំជាសិស្សឆ្នើមផ្នែករនាតឯក និងឧបករណ៍ផ្សេងៗទៀត គ្រូបង្រៀន១ ខ្ញុំអាចចេះ ២ទៅ៣ ក្រោយពីប្រឡងជាប់ទី១២ ខ្ញុំក៏ចូលធ្វើជាគ្រូក្របខ័ណ្ឌក្រសួង កាលណោះបែកសង្គ្រាមខ្វះគ្រូច្រើនណាស់"។
ក្រោយពីបញ្ចប់ថ្នាក់ទី១២ លោកក៏ចូលធ្វើជាគ្រូក្របខណ្ឌក្រសួង ពេលនោះហើយដែលលោកថាជាពេលលំបាកមួយ លោកត្រូវបង្រៀនផង និងធ្វើការក្រៅផង។ ការបង្រៀន និងលេងភ្លេងបុរាណបានប្រាក់មកចំណាយមិនគ្រប់ លោកក៏ទៅលេងឧបករណ៍បស្ចិមប្រទេសនៅតាមបា ដល់ម៉ោង១ម៉ោង២យប់ទៀត។
“ពេលខ្លះសឹងតែទឹកភ្នែកម្ដងៗ ពេលដែលលេងភ្លេងចប់អត់អីហូប អ្នកភ្លេងដូចគ្នាបានដឹង វេទនាណាស់ និយាយមិនអស់។ ពេលនោះខ្ញុំអត់ទាន់បានចូលរៀនយកបរិញ្ញាបត្រភ្លាមទេ ព្រោះរវល់ ហើយអត់កម្លាំងទៅរៀនទៀត"។
មកដល់បច្ចុប្បន្ននេះ សាស្ត្រាចារ្យរូបនេះអាចនិយាយបានថា មានជីវភាពសមល្មម ព្រោះលោកចេះធ្វើឧបករណ៍ភ្លេងបុរាណខ្មែរបានយ៉ាងស្ទាត់ជំនាញដើម្បីលក់ជួយផ្គត់ផ្គង់ជីវភាព។ បើនិយាយពីការលេងភ្លេងវិញ តន្ត្រីកររូបនេះចេះលេងឧបករណ៍ភ្លេងបុរាណខ្មែរសឹងគ្រប់ទាំងអស់ លើកលែងតែស្រឡៃតែប៉ុណ្ណោះ ព្រោះលោកមិនបានរៀន។ ចំណែកឧបករណ៍ភ្លេងខាងបស្ចិមប្រទេសវិញលោកក៏ស្ទាត់ជំនាញដែរ។
ឪពុករបស់លោកឈ្មោះ កែវ ស្ងួន គឺជាសមាជិកក្នុងក្រុមភ្លេងយោធាភិរម្យដ៏ល្បីល្បាយកាលពីសម័យមុន និងជាតន្ត្រីករប្រចាំព្រះរាជវាំងផង។ រីឯជីតាវិញ លោក សុនន្ទកវី បានត្រឹមតែបានដឹងពីឪពុកប្រាប់ថា លោកជាគ្រូភ្លេងល្បី និងមានការទទួលស្គាល់ច្រើនកាលក្នុងសម័យនោះ។
បើតាមការបញ្ជាក់ពីគ្រូភ្លេងដែលមានវ័យ៥០ឆ្នាំរូបនេះ លោកមានស្នាដៃ៣ធំៗ ១ស្នាដៃសម្ដែង ២ ស្នាដៃផលិត(ផលិតឧបករណ៍ភ្លេងបុរាណខ្មែរ) និងទី៣ ស្នាដៃបង្កើត (បង្កើតឧបករណ៍ពិណដែលបានបាត់រូបរាងអស់ជិត១ពាន់ឆ្នាំមកហើយ ឱ្យរស់ឡើងវិញ)។ លោកបានទៅសម្ដែងនៅក្រៅប្រទេស ខ្នាតអន្តរជាតិប្រមាណជាង១០ប្រទេស ហើយប្រទេសខ្លះទៅរហូតដល់ទៅជិត១០ដង និងខ្លះលើសពីនេះ។
រាប់ពីជំនាន់ទី១ រហូតដល់ជំនាន់លោក កែវ សុនន្ទកវី បាន៥ជំនាន់ ហើយជំនាន់ទី៦គឺជំនាន់កូនស្រីរបស់លោក កញ្ញា កែវសុនន្ទករី សេរីរ័ត្ន ដែលមានកេរ្តិ៍ឈ្មោះមួយរូបដែរ ផ្នែកលេងឧបករណ៍ពិណ។