មនុស្សប្រមាណ ២៥ម៉ឺននាក់ រំពឹងថានឹងចូលរួមពិធីថ្វាយព្រះភ្លើងមហាក្សត្រថៃ

2017-09-30 07:14:18
ចំនួនមតិ 0 | ចំនួនចែករំលែក 0

ចន្លោះមិនឃើញ

មេដឹកនាំរបបយោធាថៃ បាននិយាយកលពីថ្ងៃសុក្រថា មនុស្សប្រមាណ ២៥ម៉ឺននាក់ អាចនឹងប្រមូលផ្ដុំចូលរួមពិធីថ្វាយព្រះភ្លើងដល់អតីតមហាក្សត្រថៃ ភូមិបុល អាឌុលយ៉ាដេត ដែលនឹងប្រារព្ធឡើងនៅថ្ងៃទី២៦ ខែតុលាខាងមុខ។

ពេលនេះ ក្រុមវិចិត្រករនៅព្រះបរមរាជវាំង កំពុងមមាញឹករៀបចំតុបតែងរចនា នៅទីតាំងប្រារព្ធពិធី ដើម្បីឲ្យស័ក្ដិសមទៅនឹងព្រះកិត្តិនាមរបស់ព្រះមហាក្សត្រ។ ការប្រារព្ធពិធីបុណ្យជូនដំណើរមហាក្សត្រថៃ នឹងប្រារព្ធឡើងចាប់ពីថ្ងៃទី២៥ ដល់ ២៩ខែតុលាខាងមុខ ដោយមានពិធីបែបសាសនាព្រះពុទ្ធជាច្រើន ខណៈព្រះរាជពិធីថ្វាយព្រះភ្លើងធ្វើឡើងនៅថ្ងៃទី២៦ ខែតុលា។

មេបញ្ជាការរងរបបយោធាថៃ លោក Prawit Wongsuwon បាននិយាយថា៖ "យើងរំពឹងមានមនុស្សប្រហែល ២៥ម៉ឺននាក់ចូលរួមពិធីនេះ"។ លោក Prawit បានបន្ថែមទៀថា អាជ្ញាធរនឹងរៀបចំកន្លែងតំណាងពិធីបុណ្យជាច្រើនទៀត នៅក្រុងបាងកក ដើម្បីជួយសម្រួលអ្នកដែលមិនអាចមកដល់កន្លែងប្រារព្ធពិធីផ្ទាល់ និងដើម្បីកាត់បន្ថយការកកកុញនៅបរិវេណព្រះបរមរាជវាំងផងដែរ។ លើសពីនេះ កងកម្លាំង ៧ម៉ឺននាក់ នឹងដាក់ពង្រាយការពារសន្តិសុខ។

អតីតព្រះមហាក្សត្រថៃ ភូមិបុល អាឌុលយ៉ាដេត បានសោយទិវង្គតកាលពីថ្ងៃទី ១៣ តុលា ឆ្នាំ ២០១៦ ក្នុងព្រះជន្ម ៨៨វស្សា ដោយរោគាពាធ។ ចាប់តាំងពីសោយទិវង្គតជិតមួយឆ្នាំនេះ មានប្រជាជនថៃប្រមាណ ១១លាននាក់ ពីគ្រប់ខេត្ត គ្រប់តំបន់ បានមកគោរពសពព្រះមហាក្សត្រដល់បាងកក៕