អ្នកប្រដាល់គុនខ្មែរ២រូបដង្ហើយឡើងសង្វៀនយកលុយផ្គត់ផ្គង់គ្រួសារ

2017-10-02 08:54:39
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកលេងគុនខ្មែរ២រូប ឡេះ តើត និង ព្រំ សំណាង ដង្ហើយឡើងសង្វៀនយកប្រាក់ផ្គត់ផ្គង់គ្រួសារ ព្រោះចំណូលធំបំផុតនោះគឺការឡើងសង្វៀនប្រកួតទើបបានលុយ ប៉ុន្តែមួយរយៈពេលនេះពុំសូវមានឱកាសបានប្រកួតឡើយ។

កីឡាករ ឡេះ តើត

កីឡាករ ឡេះ តើត បានឲ្យដឹងថា លោកសំណូមពរដល់ស្ថានីយទូរទស្សន៍ក្នុងស្រុកមួយចំនួន ជួយចាប់គូឲ្យលោកបានឡើងប្រកួតផង ដើម្បីរកបានប្រាក់ចំណូលខ្លះៗចិញ្ចឹមគ្រួសារ ព្រោះមួយរយៈពេលនេះហាក់ដូចជាស្ងាត់ក្នុង១ខែទើបបានឡើងប្រកួតម្ដង ហេតុនេះវាពិតជាប៉ះពាល់ដល់ជីវភាពខ្លាំងតែម្ដង។ អ្នកប្រដាល់ជនជាតិខ្មែរឥស្លាមរូបនេះបន្ថែមទៀតថា ក្នុង១ខែៗ គេត្រូវចំណាយច្រើន ការរៀនសូត្ររបស់កូន ម្ហូបអាហារនិងថ្លៃផ្ទះជួលជាដើម ដូច្នេះមានតែសុំការអនុគ្រោះដាក់ឲ្យឡើងប្រកួតទេទើបអាចរកចំណូលបាន ហើយខ្លួននឹងប្ដេជ្ញាចិត្តខំប្រឹងប្រកួតឲ្យពេញចិត្តអ្នកទស្សនាតែម្ដង។

កីឡាករ ព្រំ សំណាង

ចំណែកកីឡាករ ព្រំ សំណាង លើកឡើងដែរថា បច្ចុប្បន្ននេះកំពុងមានជីវភាពលំបាកលំបិនខ្លាំងណាស់ ព្រោះត្រូវចិញ្ចឹមប្រពន្ធកូន ហើយមិនទាន់មានផ្ទះសម្បែងត្រឹមត្រូវដូចគេ ចំណូលគឺពឹងផ្អែកទៅលើការឡើងសង្វៀន ប៉ុន្តែរយៈពេលប៉ុន្មានខែនេះមិនមានឈ្មោះឡើងប្រកួតតាមសង្វៀនណានោះទេ។ «សំណាង» ក៏មិនច្បាស់ថាមកពីមូលហេតុអ្វីដែលធ្វើឲ្យរូបគេមិនបានឡើងប្រកួតនោះឡើយ ហើយអ្វីដែលសំខាន់នៅពេលនេះ រូបគេពិតជាចង់ឡើងប្រកួតវិញដើម្បីទទួលបានប្រាក់ចំណូលសម្រាប់ដោះស្រាយជីវភាពប្រចាំថ្ងៃ។

កីឡាករ ឡេះ តើត ក្រហម

កីឡាករ ព្រំ សំណាង ពេលឈ្នះមេដាយកីឡាជាតិ

គូរបញ្ជាក់ដែរថា កីឡាករ ព្រំ សំណាង មកពីក្លឹបប្រដាល់ទ័ពពិសេសឆ័ត្រយោង ៩១១ រីឯ ឡេះ តើត ជាកីឡាករមកពីក្លឹបប្រដាល់ ពុទ្ធសេរីវង្សពោធិ៍សែនជ័យ ពួកគេទាំងពីរជាអ្នកប្រដាល់ចាស់វស្សាដែលធ្លាប់ប្រឡូកក្នុងគុនខ្មែរយូរមកហើយ៕

អត្ថបទ៖ នួន ស៊ីណា