ធន់ សុភា សង្ឃឹម៨០%លើ ឆៃ សារ៉ា ឈ្នះខ្សែក្រវាត់ថ្ងៃអាទិត្យនេះ
- 2017-10-03 06:52:43
- ចំនួនមតិ 0 | ចំនួនចែករំលែក 0
ធន់ សុភា សង្ឃឹម៨០%លើ ឆៃ សារ៉ា ឈ្នះខ្សែក្រវាត់ថ្ងៃអាទិត្យនេះ
ចន្លោះមិនឃើញ
គ្រូប្រដាល់គុនខ្មែរ ធន់ សុភា សង្ឃឹមដល់ទៅ ៨០% ឯណោះថាកូនសិស្សរបស់លោកនឹងឈ្នះខ្សែក្រវាត់ស្រាបៀលីអូរបស់សង្វៀនបាយ័នបឹងស្នោ នាថ្ងៃអាទិត្យ ទី៨ ខែតុលា ឆ្នាំ២០១៧ ខាងមុខនេះ។
ធន់ សុភា បានឲ្យដឹងមុននេះថា បើមើលតាមការខំប្រឹងហ្វឹកហាត់រយៈពេល១ខែនេះ ឃើញថាសន្ទុះកម្លាំងស៊ុហ្វ ក៏ដូចជាស្នៀតប្រយុទ្ធរបស់ ឆៃ សារ៉ា មានការរីកចម្រើនខ្លាំង រួមផ្សំទឹកចិត្តដែលចង់បានខ្សែក្រវាត់ទៀតនោះ លោកជើងជាក់ថាកូនសិស្សរបស់លោកនឹងឈ្នះខ្សែក្រវាត់ស្របៀលីអូនេះ។
គ្រូប្រដាល់មកពីក្រសួងការពារជាតិខាងលើបន្តថា បើគិតពីការហ្វឹកហាត់ខ្លាំង និងអស់ពីសមត្ថភាពនោះប្រហែលជា១ខែហើយ ដែលការហាត់នេះធ្វើឡើង២ពេលក្នុងមួយថ្ងៃ ចាប់ពីម៉ោង៦-៩ព្រឹក និងចាប់ពីម៉ោង ៣-៥,៣០ល្ងាច។ ការប្រកួតនៅវគ្គផ្ដាច់ព្រ័ត្រនេះលោកបានប្រាប់ឲ្យ «សារ៉ា» ត្រៀមក្បាច់ដើម្បីយកឈ្នះដៃគូរួចហើយ និងមួយទៀតនោះការប្រកួតនេះ៩០% នឹងមានស្នាមបែកព្រោះអ្នកទាំងពីរសុទ្ធតែអ្នកលេងកេងដូចគ្នា។
នៅថ្ងៃអាទិត្យ ទី៨ ខែតុលា ឆ្នាំ២០១៧ នេះ កីឡាករ ឆៃ សារ៉ា នឹងត្រូវប្រកួតវគ្គផ្ដាច់ព្រ័ត្រជាមួយ ម៉ុត ខ្លឹមខ្មៅ ដើម្បីរកម្ចាស់ខ្សែក្រវាត់ស្រាបៀលីអូទម្ងន់ ៦៥គីឡូក្រាម ខណៈ ចាន់ រតនា ប៉ះ ឡាវ យកលេខ៣-៤ ហើយកម្មវិធីចាប់ផ្ដើមឡើងពីម៉ោង ៤ល្ងាចតទៅ៕