មកដឹងពីការពិតទាំង ៨ នៅថៃ ក្នុងអំឡុងខែកាន់ទុក្ខចុងក្រោយដល់អតីតមហាក្សត្រ

2017-10-03 12:55:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ខែតុលា គឺជាខែចុងក្រោយដែលប្រជាជនថៃសម្ដែងការកាន់ទុក្ខរបស់ខ្លួនដល់អតីតមហាក្សត្រ Bhumibol Adulyadej ដែលបានសោយទិវង្គតកាលពីឆ្នាំមុន។ នៅតាមដងផ្លូវក្នុងរាជាណាចក្រមួយនេះ មានវត្តមានពលរដ្ឋថៃចាប់ផ្ដើមស្លៀកពាក់ពណ៌ខ្មៅដើម្បីបង្ហាញនូវការគោរពដល់អតីតក្សត្រជាទីស្រលាញ់របស់ខ្លួន។ អត្ថបទនេះនឹងលើកឡើងពីការពិតទាំង ៨ នៅប្រទេសថៃ ក្នុងអំឡុងខែកាន់ទុក្ខលើកក្រោយនេះដល់អតីតព្រះរាជាថៃអង្គនេះ មានដូចតទៅ៖

#១.ស្លៀកពាក់កាន់ទុក្ខ៖ រដ្ឋាភិបាលបានណែនាំឲ្យពលរដ្ឋខ្លួនធ្វើការស្លៀកពាក់សំលៀកបំពាក់កាន់ទុក្ខ (ពណ៌ខ្មៅ ស ឬប្រផេះ) ចាប់ពីថ្ងៃទី ១ដល់ថ្ងៃទី ២៧ខែតុលានេះ។

#២.ព្រះរាជពិធីបុណ្យសព៖ នឹងប្រព្រឹត្តឡើងចាប់ពីថ្ងៃទី ២៥ ដល់២៩ ខែតុលាខាងមុខនេះ ខណៈព្រះរាជពិធីបូជាព្រះសព នឹងធ្វើឡើងនៅថ្ងៃទីពីរ នៃរាជពិធីបុណ្យសព ពោលគឺថ្ងៃទី ២៦។

#៣.ទង់ជាតិ៖ នឹងបង្ហូតត្រឹមពាក់កណ្ដាលចាប់ពីថ្ងៃទី ១៣ ដល់២៧ ខែតុលានេះ។

#៤.បុណ្យជាតិ៖ ថៃ្ងទី ១៣ តុលា ដែលជាថ្ងៃដែលព្រះអង្គ Bhumibol Adulyadej សោយទិវង្គតកាលពីឆ្នាំមុន នឹងក្លាយជាបុណ្យជាតិចាប់ពីឆ្នាំនេះតទៅ ខណៈពលរដ្ឋថៃត្រូវបានអនុញ្ញាតឲ្យឈប់សម្រាកចំនួនមួយថ្ងៃ ក្នុងថ្ងៃទី ២៦ តុលា ឆ្នាំនេះ ដែលជាថ្ងៃប្រារព្ធព្រះរាជពិធីបូជាព្រះសព។

#៥.ពិធីមានលក្ខណៈសប្បាយរីករាយ៖ ដើម្បីជាការសម្ដែងដល់គោរពដល់អតីតព្រះមហាក្សត្រ រាល់ពិធីដែលមានលក្ខណៈសប្បាយរីករាយអធិកអធម ត្រូវបានស្នើមិនឲ្យមានក្នុងអំឡុងខែកាន់ទុក្ខចុងក្រោយនេះ។

#៦.ពិធីបុណ្យសែនលោកខែ (ថ្ងៃទី ៥តុលា)៖ នឹងមិនមានការប្រារព្ធពិធីនេះទេក្នុងឆ្នាំនេះ។

#៧.ប្រព័ន្ធផ្សព្វផ្សាយ៖ ប៉ុស្តិ៍ទូរទស្សន៍បានប្ដូរទៅជាពណ៌ស ខ្មៅ កាលពីថ្ងៃអាទិត្យកន្លងទៅនេះ។ ស្ថានីយវិទ្យុទូរទស្សន៍ ត្រូវបានស្នើមិនឲ្យមានការផ្សាយកម្មវិធីកម្សាន្តដែលមានលក្ខណៈសប្បាយរីករាយ ក្នុងខែតុលានេះ ហើយបែរមកចាក់ភាពយន្តឯកសារ ព័ត៌មាន និងកម្មវិធីសិក្សាវិញ។

#៨.តំបន់ទេសចរណ៍៖ ព្រះបរមរាជវាំងថៃ និង Wat Phra Kaew ត្រូវបានបិទមិនឲ្យភ្ញៀវទេសចរចូលទស្សនា ចាប់ពីថ្ងៃទី ១ ដល់ ២៩ ខែតុលានេះ៕