គ្រូបង្វឹក Atletico ថា Griezmann បង្កើតឲ្យមានទម្លាប់អាក្រក់ក្នុងក្រុម
- 2017-10-03 14:00:00
- ចំនួនមតិ 0 | ចំនួនចែករំលែក 0
គ្រូបង្វឹក Atletico ថា Griezmann បង្កើតឲ្យមានទម្លាប់អាក្រក់ក្នុងក្រុម
ចន្លោះមិនឃើញ
គ្រូបង្វឹកក្លឹប Atletico Madrid លោក Diego Simeone កាលពីពេលថ្មីៗនេះបាននិយាយថា ខ្សែប្រយុទ្ធឆ្នើម Antoine Griezmann បានធ្វើឲ្យក្រុមមានទម្លាប់អាក្រក់ ហើយលោកចង់ឲ្យក្រុមទាំងមូល កុំឲ្យពឹងផ្អែកខ្លាំងពេក លើខ្សែប្រយុទ្ធបារាំងរូបនេះ។
លោក Simeone បាននិយាយថា៖ "គេ (Griezmann) គឺជាកីឡាករដែលធ្វើឲ្យក្រុមមានទម្លាប់អាក្រក់ ដោយសារតែគេជាកីឡាករដែលតែងតែដោះស្រាយបញ្ហា នៅពេលដែលប្រព័ន្ធប្រយុទ្ធក្រុមមានបញ្ហា"។
គ្រូបង្វឹកអាហ្សង់ទីនរូបនេះ បានបន្តទៀតថា៖ "នៅពេលដែលគេស៊ុតចូល ក្រុមមានឱកាសឈ្នះច្រើន តែបើគេស៊ុតមិនចូលវិញ វាពិតជាលំបាកខ្លាំងណាស់។ ខ្ញុំគិតថា ខ្សែប្រយុទ្ធផ្សេងទៀត ក៏ដូចជាក្រុមទាំងមូល ត្រូវជួយគេឲ្យបានច្រើនជាងនេះ ហើយមិនគួរទម្លាក់ទំនួលខុសត្រូវនៃប្រព័ន្ធប្រយុទ្ធរបស់ក្រុមលើគេតែម្នាក់ឯងនោះទេ"។
ក្លឹប Atletico Madrid ហាក់កំពុងមានបញ្ហាប្រយុទ្ធរបស់ខ្លួន ដោយក្លឹបមួយនេះ ស៊ុតចូលច្រើនបំផុតចំនួន ២គ្រាប់ប៉ុណ្ណោះ នៅប៉ុន្មានប្រកួតចុងក្រោយនេះ ហើយទើបតែចាញ់ Chelsea ក្នុងលទ្ធផល ២ទល់ នឹង ១ ក្នុងក្របខ័ណ្ឌបាល់ទាត់ Champions League និងស្មើជាមួយក្លឹប Leganes ក្នុងលីគកំពូលអេស្ប៉ាញកាលពីពេលចុងសប្ដាហ៍មុន។
Atletico Madrid នឹងត្រូវប៉ះជាមួយក្លឹបអ្នកមានបុណ្យ Barcelona ក្នុងក្របខ័ណ្ឌ La Liga នាថ្ងៃទី ១៥ ខាងមុខនេះ បន្ទាប់ពីការសម្រាកដើម្បីប្រកួតបាល់ទាត់អន្តរជាតិត្រូវបានបញ្ចប់៕