ភ្ជាប់ពាក្យបាន ១០ថ្ងៃ កូនក្រមុំយកបណ្ណាការដាក់មេប្រូចបាត់ស្រមោល

2017-10-05 04:53:25
ចំនួនមតិ 0 | ចំនួនចែករំលែក 0

ចន្លោះមិនឃើញ

បុរសជនជាតិថៃអាយុ ៣២ឆ្នាំម្នាក់សង្ឃឹមថា ថ្លៃបណ្ណាការប្រមាណ ១ ៥០០ដុល្លារ នឹងអាចស្វែងរកស្នេហាពិតជាមួយមិត្តស្រីដ៏ស្រស់ស្អាតម្នាក់ បន្ទាប់ពីធ្វើពិធីភ្ជាប់ពាក្យនៅផ្ទះគ្រួសារខាងស្រីបានរយៈពេលប្រមាណ ១០ថ្ងៃ ប៉ុន្តែបែរជានាងរត់ចោលទៅវិញ។

បុរសរូបនេះមានឈ្មោះ Boonchuay ជាបុគ្គលិកផ្នែកបច្ចេកទេសនៅក្រុមហ៊ុនមួយ បានដាក់ពាក្យបណ្ដឹងទៅកាន់ប៉ូលិសខេត្តប៉ះធុមថានី ដោយរៀបរាប់ថា គូដណ្ដឹងរបស់ខ្លួនបានបោកប្រាស់ដោយបបួលលោកទៅភ្ជាប់ពាក្យ គឺគ្រាន់តែយកថ្លៃបណ្ណាការដើម្បីរត់គេចប៉ុណ្ណោះ។

លោក Boonchuay បន្តថា ខ្លួនបានជួបគូដណ្ដឹងឈ្មោះ Arisa ជាអ្នកលក់ឥវ៉ាន់នៅផ្សារមួយក្នុងតំបន់ Nava Nakorn កាលពីថ្ងៃទី ៣កញ្ញា។ ក្រោយមកក៏ណាត់ជួបគ្នា និងស្គាល់គ្នាបាន ៣សប្ដាហ៍ នាង Arisa បានណែនាំគាត់ឲ្យឪពុកម្ដាយរបស់នាងស្គាល់។

Boonchuay និយាយថា គ្រួសាររបស់ Arisa បានស្នើសុំប្រាក់បណ្ណាការឲ្យកូនស្រីរបស់ពួកគេ ប្រសិនបើខ្លួនចង់បន្តទំនាក់ទំនងនឹង Arisa។ លោកក៏យល់ព្រមតាម ដោយដំបូងលោកជូន ៦០០ដុល្លារ ប៉ុន្តែម្ដាយខាងស្រីចង់បាន ១ ៥០០ដុល្លារ ដូច្នេះគាត់ក៏យល់ព្រមទៅដកប្រាក់ពីធនាគារបន្ថែម។ ពួកគេបានភ្ជាប់ពាក្យនៅថ្ងៃទី ២៤កញ្ញា។

ប៉ុន្តែក្រោយពីភ្ជាប់ពាក្យ លោកមិនដែលឃើញ Arisa ម្ដងណាឡើយបានត្រឹមតែនិយាយតាមទូរសព្ទ ឬឆាតតាម Line ប៉ុណ្ណោះ។ ចំណែកគ្រួសារខាងស្រីធ្លាប់សន្យាថា ឲ្យលោកទៅនៅជាមួយពួកគេបាន បន្ទាប់ពីភ្ជាប់ពាក្យហើយ ប៉ុន្តែមិនដែលហៅឲ្យទៅទៀតទេ ទើបគាត់ដាក់ពាក្យបណ្ដឹង។

Boonchuay បន្ថែមថា ទំនាក់ទំនងរបស់ពួកគេបែរជាមិនប្រក្រតីនៅមុនថ្ងៃភ្ជាប់ពាក្យមួយថ្ងៃ គឺលោកបានឃើញមិត្តស្រីផ្ញើសារស្នេហ៍ទៅកាន់បុរសម្នាក់ទៀត។ លោកក៏បានសួរនាំ ហើយនាងឆ្លើយថា ពួកគេមិនទាន់រៀបការ ដូច្នេះនាងអាចឆាតទៅអ្នកណាក៏បាន ឲ្យតែនាងចង់។ ពេលនេះប៉ូលិសកំពុងតាមដាន Arisa និងម្ដាយរបស់នាងដើម្បីសាកសួរហើយ៕