អ៊ុំស្រី លី សុខន ស្ទើរពេញ១ជីវិត រស់ពឹងរបរដេរស្លឹកចាក
- 2017-10-05 09:24:40
- ចំនួនមតិ 0 | ចំនួនចែករំលែក 0
អ៊ុំស្រី លី សុខន ស្ទើរពេញ១ជីវិត រស់ពឹងរបរដេរស្លឹកចាក
ចន្លោះមិនឃើញ
«ខ្ញុំដេរស្លឹកចាក តាំងពីនៅក្មេង ដល់ចេញពីសម័យខ្មែរក្រហមក៏នៅមុខរបរហ្នឹង! ចេះតែធ្វើទៅ មិនដឹងធ្វើអ្វី ដូចជាការងារខ្លួនយើង ផ្ទះខ្លួនយើង គ្មាននរណាថាអីឲ្យយើងហ្នឹងណាអូន»។ នេះជាសម្ដីចេញពី អ៊ុំស្រី លី សុខន រស់នៅភូមិស្នំប្រាំពីរ ឃុំម៉ាកប្រាង្គ ស្រុកទឹកឈូ ខេត្តកំពត។
អង្គុយលើគ្រែរនាប ក្រោមផ្ទះ ស្ត្រីវ័យ ៦៤ឆ្នាំ បានរៀបរាប់ទាំងស្នាមញញឹមថា អ៊ំស្រីបានចាប់ផ្ដើមរបរមួយនេះ តាំងពីមុនសម័យរដ្ឋប្រហារ រហូតមកទល់នឹងពេលនេះ ក៏នៅរក្សាមុខរបរដូនតាដដែល ព្រោះមិនដឹងប្រកបរបរអ្វីក្រៅពីនេះ។
ស្ត្រីមេម៉ាយ ដែលប្ដីស្លាប់ក្នុងសម័យខ្មែរក្រហម បានលើកឡើងថា របរដេរស្លឹកចាកនេះ បានជួយចិញ្ចឹមជីវិតរហូតមកដល់សព្វថ្ងៃ ដោយក្នុង ១ថ្ងៃអាចរកចំណូល បានប្រហែល ១ ៥០០០ រៀល គ្រាន់ផ្គត់ផ្គង់គ្រួសារ ដែលមានម្ដាយចាស់ម្នាក់ និង កូន៤នាក់ ប្រុសពីរ-ស្រីពីរ។
នៅពេលសួរថា អ៊ុំស្រី ចម្ការចាកដែរទេ? អ៊ំស្រីបានឆ្លើយតបភ្លាមៗថា មិនមានទេ គឺស្លឹកចាកទាំងអស់នេះ ម៉ៅចម្ការចាកគេ ដែលដាំក្បែរព្រែក ការពារកុំឲ្យបាក់ដី ដោយក្នុង១ឆ្នាំ ជួល៣០ម៉ឺនរៀល ហើយអាចប្រមូលផលបាន ២ដង។
ឆ្លើយនឹងសំណួរមួយទៀតថា តើស្លឹកចាកមានប្រយោជន៍អ្វីខ្លះ? អ៊ុំស្រី លី សុខន បានរៀបរាប់ថា ស្លឹកចាកមានប្រយោជន៍ច្រើន គឺ ផ្លែកចាកក្រៅពីញុំាបាន ក៏អាចធ្វើបង្អែមផងដែរ។ ឯស្លឹកចាកយកទៅវេចធ្វើនំ និង ដេរស្លឹកចាក ធ្វើជាជញ្ជាំង និង ដំបូល កញ្ចុះបានយ៉ាងល្អ ហើយមានគុណភាពទៀតផង។
ស្រ្តីមេម៉ាយ ដដែល បានបន្តថា រាល់ថ្ងៃដេរស្លឹកចាក ១កណ្ដបស្មើនឹង ៥០០រៀល ហើយក្នុង១ថ្ងៃអាចដេរបាន ៣០ កណ្ដប ដែលស្មើនឹង ១ ៥០០០ រៀល។ ចំពោះការចំណាយវិញ គ្រាន់តែទិញដើមឬស្សី យកមកពុះធ្វើជាដងកណ្ដប ដែលដើមឫស្សី ១ដើម ៥ ០០០ រៀល ហើយក្នុង១ដើម ស្មើនឹង ២០០ ទៅ ៣០០ កណ្ដប។ មួយទៀតត្រូវទិញ ដើមរុន យកមកពុះធ្វើជាខ្សែដេរស្លឹកចាក។
ដោយពឹងផ្អែកលើរបរធ្វើនំចាក និង ដេរស្លឹកចាក តាំងពីនៅក្មេងរហូតមកទល់នឹងពេលបច្ចុប្បន្ននេះ អ៊ុំស្រី ក៏បានសម្ដែងការព្រួយបារម្ភផងដែរថា នៅថ្ងៃអនាគត ស្លឹកចាកអាចនឹងបាត់បង់ ព្រោះតែស្រុកឈូកមានការអភិវឌ្ឍ។
«ខ្ញុំបារម្ភដែរក្មួយ ព្រោះខ្លាចអស់ស្លឹកចាក ណាមួយឥឡូវគេអភិវឌ្ឍន៍ ដូច្នេះ ម្ចាស់ដីអាចហ្នឹងលក់ដីឲ្យគេ ហើយគេនឹងកាប់ស្លឹកចាកចោល យកដីធ្វើការអភិវឌ្ឍផ្សេង តែធ្វើម៉េច បើគេអភិវឌ្ឍន៍ពេលណា ពេលហ្នឹងទៅ យើងគ្រាន់តែស្ដាយរបរដូនតា តែបើថា ដាច់ពោះមិនដាច់ទេ យើងអាចនឹងព្យាយាមរករបរផ្សេង ព្រោះទីនេះសម្បូរទេសចរ អាចលក់អ្វីផ្សេងក៏បាន។»
ទស្សនាវីដេអូ