ការប្រកួតបាល់ទាត់ទាំង ៥ នៅអឺរ៉ុប ដែលលេង គ្មានអ្នកមើល

2017-10-05 12:09:19
ចំនួនមតិ 0 | ចំនួនចែករំលែក 0

ចន្លោះមិនឃើញ

ជាទូទៅក្នុងការប្រកួតរបស់ក្លឹបល្បីៗក្នុងលីគបាល់ទាត់កំពូលធំៗ នៅបណ្ដាប្រទេសក្នុងទ្វីបអឺរ៉ុប ដូចជា អង់គ្លេស អេស្ប៉ាញ អ៊ីតាលីជាដើមសុទ្ធតែមានមនុស្សមកមើលច្រើនណាស់ដើម្បីគាំទ្រក្លឹបបាល់ទាត់ដែលខ្លួនស្រលាញ់។ ទោះជាយ៉ាងណា មានការប្រកួតមួយចំនួនត្រូវបានបង្ខំចិត្តតម្រូវឲ្យលេងបិទទ្វារ ដោយមិនអនុញ្ញាតឲ្យអ្នកគាំទ្រសូម្បីម្នាក់ចូលទៅទស្សនាឡើយ ដោយសារតែទើបតែជួបបញ្ហាសន្តិសុខមួយចំនួន ឬក៏ក្លឹបទាំងនោះរងការពិន័យដោយស្ថាប័នបាល់ទាត់ជាដើម។ ស្របជាមួយគ្នានេះ អត្ថបទនេះនឹងលើកយកពីការប្រកួតបាល់ទាត់ល្បីទាំង ៥ ប្រព្រឹត្តទៅគ្មានអ្នកមើលសូម្បីម្នាក់ មានដូចតទៅ៖ ១. ការប្រកួតក្របខ័ណ្ឌអឺរ៉ុបរវាងក្លឹបអង់គ្លេស West Ham United ជាមួយក្លឹបអេស្ប៉ាញ Castilla (ខែតុលា ១៩៨០)៖ ដោយសារតែមានបញ្ហាចលាចលបង្កឡើងដោយអ្នកគាំទ្រក្លឹប West Ham United កាលពីពេលប្រកួតជុំទី ១រវាងក្លឹបទាំងពីរ ក្នុងទីក្រុង Madrid ធ្វើឲ្យក្លឹប West Ham រងពិន័យដោយតម្រូវឲ្យ លេងជុំទី២ក្នុងទឹកដីរបស់ខ្លួន ជាមួយ Castilla ដោយគ្មានវត្តមានរបស់អ្នកគាំទ្រសូម្បីតែម្នាក់ចូលមកមើល។

២. ការប្រកួតក្នុងក្របខ័ណ្ឌ Serie Aរវាងក្លឹប Juventus និង Lecce (ខែឧសភា ២០០៩) ៖ លីគបាល់ទាត់កំពូលអ៊ីតាលី បានដាក់ពិន័យក្លឹបសេះបង្កង់ Juventus បន្ទាប់ពីអ្នកគាំទ្រក្លឹបមួយនេះ បានប្រើពាក្យជេរប្រមាថបែបរើសអើងពណ៌សម្បុរទៅលើកីឡាករ Mario Balotelli (កាលនោះ Balotelli ជាកីឡាកររបស់ក្លឹប Inter Milan) ក្នុងការប្រកួតជាមួយក្លឹប Inter Milan កាលពីពេលកន្លងមក។ ក្នុងការពិន័យនោះ គឺតម្រូវឲ្យក្លឹប Juventus ប្រកួតជាមួយ Lecce ដោយធ្វើការបិទទ្វារកីឡដ្ឋានរបស់ខ្លួន។

៣. ការប្រកួតវគ្គជម្រុះដណ្ដើមពាន KNVB Cup រវាងក្លឹប Ajax និង AZ Alkmaar (ខែមករា ២០១២)៖ Ajax ត្រូវបានពិន័យឲ្យលេងក្នុងសភាពបិទទ្វារក្នុងទឹកដីរបស់ខ្លួនជាមួយ ក្លឹប AZ Alkmaar ដោយសារតែកីឡាករ Ajax ម្នាក់បានប៉ះទង្គិចធ្ងន់ធ្ងរជាមួយអ្នកទស្សនា ក្នុងការប្រកួតកន្លងមក។

៤. ការប្រកួតក្របខ័ណ្ឌ Europa Leagueរវាងក្លឹប Fenerbahce និង BATE (ខែកុម្ភៈ ២០១៣)៖ ដូច West Ham និង Juventus ដែរ ក្លឹប Fenerbahce ត្រូវបានពិន័យឲ្យលេងបិទទ្វារក្នុងកីឡដ្ឋានរបស់ខ្លួនជាមួយក្លឹប BATE ក្នុងក្របខ័ណ្ឌ Europa League ដោយសារតែចលាចលបង្កឡើងដោយអ្នកគាំទ្ររបស់ខ្លួនក្នុងការប្រកួតមុនជាមួយក្លឹបអាល្លឺម៉ង់ Borussia Moenchengladbach។

៥. ការប្រកួតក្នុងក្របខ័ណ្ឌ La Ligaរវាងក្លឹប Barcelona និង Las Palmas (ខែតុលា ២០១៧)៖ ដោយសារតែមានភាពតានតឹងក្នុងទឹកដី Catalan នៅពេលមានការបោះឆ្នោតប្រជាមតិដើម្បីបំបែកទឹកដីមួយនេះចេញពីអេស្ប៉ាញ ក្លឹប Barcelona បានលេងបិទទ្វារក្នុងកីឡដ្ឋាន Camp Nouជាមួយ Las Palmas។ ក្លឹបអ្នកមានបុណ្យនឹងត្រូវលេងដោយគ្មានវត្តមានអ្នកគាំទ្ររបស់ខ្លួនម្ដងទៀត ពេលប៉ះជាមួយក្លឹប Atletico Madrid នៅថ្ងៃទី ១៤តុលា ខាងមុខ៕