Bayern ហៅគ្រូចាស់របស់ខ្លួនមកដឹកនាំក្រុមវិញ

2017-10-05 14:00:12
ចំនួនមតិ 0 | ចំនួនចែករំលែក 0

ចន្លោះមិនឃើញ

អតីតគ្រូបង្វឹកក្លឹប Bayern Munich លោក Jupp Heynckes ក្នុងថ្ងៃនេះ បាននិយាយបញ្ជាក់ហើយថា ក្លឹបយក្សអាល្លឺម៉ង់មួយនេះបានទាក់ទងលោកទៅធ្វើជាគ្រូបង្វឹកវិញ។

លោក Jupp Heynckes បានថ្លែងទៅសារព័ត៌មានអាល្លឺម៉ង់ RPonline ថា៖ " Bayern Munich បានសុំឲ្យខ្ញុំទៅធ្វើជាអ្នកចាត់ការក្នុងក្លឹបម្ដងទៀតរហូតដល់រដូវកាលក្ដៅឆ្នាំ ២០១៨"។ លោកបានបន្តទៀតថា៖ "វាមិនទាន់ច្បាស់ទេ អត់ទាន់មានកិច្ចព្រមព្រៀងអ្វីនៅឡើយទេ។ ខ្ញុំសុំពេលវិភាគស្ថានការណ៍សិន។ វាមានរយៈពេល ៤ឆ្នាំកន្លះ ហើយដែលខ្ញុំចាកចេញពី Bayern ហើយអំឡុងពេលនេះ អ្វីៗបានប្រែប្រួលច្រើនណាស់ក្នុងពិភពបាល់ទាត់"។ សូមបញ្ជាក់ផងដែរថា លោក Heynckes បានធ្វើជាគ្រូបង្វឹកក្លឹប Bayern ចំនួន ៣ដងហើយ មុនពេលខ្លួនចូលនិវត្តន៍កាលពីឆ្នាំ ២០១៣ បន្ទាប់ពីជួយឲ្យក្លឹបមួយនេះឈ្នះពានធំៗបីក្នុងឆ្នាំនោះ។ ក្លឹបជើងលីគកំពូលអាល្លឺម៉ង់ Bayern Munich ទើបតែធ្វើការបណ្ដេញគ្រូបង្វឹកអ៊ីតាលី Carlo Ancelotti កាលពីចុងខែកញ្ញាកន្លងទៅនេះ បន្ទាប់ដឹកនាំចាញ់ PSG ៣ ទល់នឹង ០ ក្នុងក្របខ័ណ្ឌបាល់ទាត់ Champions League។ បច្ចុប្បន្ន Bayern ដឹកនាំបណ្ដោះអាសន្នដោយលោក Willy Sagnol៕