ត្រាំ ធ្វើឲ្យពិភពលោកងឿងឆ្ងល់ពេលបង្ហើបថា មានវិធីតែមួយ អាចដោះស្រាយនឹងគីម ជុងអ៊ុន

2017-10-08 05:14:25
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រធានាធិបតីអាមេរិកដូណាល់ ត្រាំ បានបញ្ជាក់នៅយប់ថ្ងៃសៅរ៍ថា «មានវិធីតែមួយគត់អាចដោះស្រាយជាមួយកូរ៉េខាងជើងបាន» បន្ទាប់ពីរដ្ឋបាលអាមេរិកមុនៗ បានចរចាជាមួយក្រុងព្យុងយ៉ាង ដើម្បីបញ្ឈប់កម្មវិធីនុយក្លេអ៊ែរ តែគ្មានលទ្ធផល។

ដូណាល់ ត្រាំ បានសរសេរសារបង្ហោះនៅលើបណ្ដាញសង្គមទ្វីតធឺរបស់ខ្លួនថា «ប្រធានាធិបតី និងរដ្ឋបាលអាមេរិកជាច្រើន បានចរចាជាមួយកូរ៉េខាងជើងអស់រយៈពេល ២៥ឆ្នាំ កិច្ចព្រមព្រៀងក៏មាន ថវិកាដ៏ច្រើនសន្ធឹកសន្ធាប់ក៏បានចំណាយ ប៉ុន្តែវាមិនដំណើរការសោះ កិច្ចព្រមព្រៀងត្រូវបំពាន ទាំងទឹកខ្មៅចុះហត្ថលេខា មិនទាន់ស្ងួត ធ្វើឲ្យអ្នកចរចាអាមេរិកវិលមុខ។ សុំទោស ប៉ុន្តែមានរឿងតែមួយគត់ នឹងជួយដោះស្រាយបាន..!»

មួយឃ្លាចុងក្រោយនេះ បានធ្វើឲ្យពិភពលោកចង់ដឹងគ្រប់គ្នា ប៉ុន្តែដូណាល់ ត្រាំ មិនបានបញ្ជាក់លម្អិតថា លោកចង់សំដៅលើអ្វីនៅឡើយទេ។ ក្រោយមក អ្នកសារព័ត៌មានជាច្រើន បានសួរអំពីអត្ថន័យសារទាំងនោះ ប៉ុន្តែ ដូណាល់ ត្រាំ បានឆ្លើយតបត្រឹមថា "អ្នកនឹងឃើញនៅពេលឆាប់ៗនេះ"។

អ្នកកាសែតបានទាក់ទងសុំការបញ្ជាក់ពីរដ្ឋលេខាធិការសេតវិមានលោកស្រី Sarah Sanders លោកស្រីមិនបង្ហើបអ្វីច្រើន តែថា ជម្រើសទាំងអស់កំពុងស្ថិតនៅលើតុចរចា តែមិនអាចបរិយាយពេលនេះបានទេ។ ទោះមិនមានការលម្អិតពីខាងណាក្ដី ប៉ុន្តែសារព័ត៌មាន Reuters បានផ្សាយថា អត្ថន័យសារទាំងនេះ ទំនងជាចង់សំដៅលើការអន្តរាគមន៍យោធាបន្ថែមទៅកូរ៉េខាងជើង។

ដូណាល់ ត្រាំ ធ្លាប់មានប្រសាសន៍ថា អាមេរិកនឹងកម្ទេចកូរ៉េខាងជើងទាំងស្រុងបើចាំបាច់ ដើម្បីការពារខ្លួនឯង និងប្រទេសសម្ព័ន្ធមិត្តនានាពីការគំរាមនុយក្លេអ៊ែររបស់ក្រុងព្យុងយ៉ាង។

ការបង្ហោះសារខាងលើ គឺកើតឡើងនៅក្រោយ ២ថ្ងៃ នៃប្រសាសន៍របស់លោកថា "អាមេរិកនឹងធ្វើអ្វីៗដែលយើងត្រូវធ្វើដើម្បីការពារបន្ថែម។ យើងមិនអាចអនុញ្ញាតឲ្យរបបផ្ដាច់ការគំរាមប្រជាជាតិរបស់យើង និងសម្ព័ន្ធមិត្តដែលធ្វើឲ្យបាត់បង់ជីវិតមិនអាចស្រមៃដល់នោះទេ"៕