មកដឹងពីប្រវត្តិបណ្ណាល័យជាតិដ៏ចំណាស់ជាងគេទាំងអស់គ្នា
- 2017-10-09 23:30:00
- ចំនួនមតិ 0 | ចំនួនចែករំលែក 0
មកដឹងពីប្រវត្តិបណ្ណាល័យជាតិដ៏ចំណាស់ជាងគេទាំងអស់គ្នា
ចន្លោះមិនឃើញ
បណ្ណាល័យជាតិ ជាបណ្ណាល័យដែលមានវ័យចំណាស់ជាងគេនៅកម្ពុជា ត្រូវបានកសាងនៅឆ្នាំ១៩២៤ ដែលមានផ្ទុកឯកសារ និងសៀវភៅសំខាន់ៗរាប់ម៉ឺនក្បាល ដែលសៀវភៅទាំងនោះមានទាំងមុន និងក្រោយសម័យខ្មែរក្រហម។
លោកស្រី ខ្លូត វិបុលឡា អ្នកគ្រប់គ្រងទូទៅនៃបណ្ណាល័យជាតិ មានប្រសាសន៍ថា បណ្ណាល័យជាតិមួយនេះ បង្កើតឡើង និងគ្រប់គ្រងដោយបណ្ឌិតសាស្ត្រាចារ្យជនជាតិបារាំងម្នាកក្នុងសម័យអណានិគមបារាំង ហើយបណ្ណាល័យពេលនោះមានឈ្មោះថា «បណ្ណាល័យកណ្តាលនៃរាជធានីភ្នំពេញ»។ ក្រោយមកបណ្ណាល័យនេះ បានផ្ទេរការគ្រប់គ្រងមកជនជាតិខ្មែរវិញនៅពេលកម្ពុជាទទួលឯករាជ្យពីអាណានិគមបារាំង និងប្ដូរឈ្មោះជា «បណ្ណាល័យជាតិកម្ពុជា» នៅឆ្នាំ១៩៥៤។
លោកស្រីបន្តថាៈ «កាលសម័យរបបប៉ុលពត (ពីឆ្នាំ ១៩៧៥-១៩៧៩) យើងដឹងហើយថា បណ្ណាល័យមួយនេះ ត្រូវរងការបំផ្លិចបំផ្លាញ ហើយសៀវភៅ និងឯកសារច្រើនត្រូវបាត់បង់... ក្រោយរំដោះសម័យប៉ុល ពតរួច បណ្ណាល័យនេះបានបើកជាថ្មីនៅឆ្នាំ ១៩៨០ យើងមានសៀវភៅនៅសេសសល់បច្ចុប្បន្នប្រមាណ ២៣ ០០០ក្បាល ដែលជាភាសាខ្មែរនៅសល់ ១ ២០០ចំណង ជាភាសាបារាំងនិយាយពីខ្មែរ មាន ៤០០ចំណងជើង ឥណ្ឌូចិនមាន កម្ពុជា វៀតណាម ឡាវ...មានជាង ១០០០ចំណងជើង ...មានសៀវភៅប្រវត្តិសាស្ត្រ សារបេតិកភណ្ឌរបស់បារាំងពាក់ព័ន្ធនឹងសេដ្ឋកិច្ច ទេសចរណ៍ វប្បធម៌គ្រប់បែបយ៉ាង»។
ក្រៅពីសៀវភៅបណ្ណាល័យជាតិនេះ ក៏បន្តរក្សាទុកនូវកំណត់ត្រារបស់ខ្មែរពីដើមរហូតមកដល់សព្វថ្ងៃនេះដូចជា សាស្ត្រាស្លឹករឹត ក្រាំង ដែលមានអាយុតាំងពីសតវត្សទី១៨ និង១៩ ។
យ៉ាងណាមិញ ការផ្គត់ផ្គង់សៀវភៅនៅក្នុងបច្ចុប្បន្នមិនទាន់គ្រប់គ្រាន់សម្រាប់អ្នកអាននៅឡើយ បើទោះបីក្រសួងអប់រំ ឧបត្ថម្ភថវិកាចំនួន ១៥លានរៀលរៀងរាល់ឆ្នាំ សម្រាប់ទិញសៀវភៅថ្មីៗ ផ្គង់ផ្គត់ក្នុងបណ្ណាល័យបន្ថែមក៏ដោយ។ លោកស្រីបន្ថែម៕