Ford ផ្ដល់ប្រាក់ ២៥ ០០០ដុល្លារ សង់អណ្ដូងទឹកដល់អ្នកកំពង់ស្ពឺ និងត្បូងឃ្មុំ
- 2017-10-10 05:06:08
- ចំនួនមតិ 0 | ចំនួនចែករំលែក 0
Ford ផ្ដល់ប្រាក់ ២៥ ០០០ដុល្លារ សង់អណ្ដូងទឹកដល់អ្នកកំពង់ស្ពឺ និងត្បូងឃ្មុំ
ចន្លោះមិនឃើញ
RMA Cambodia តំណាងនាំចូល និងចែកចាយផ្ដាច់មុខរថយន្ត Ford ប្រចាំកម្ពុជា បានផ្ដល់មូលនិធិទឹកប្រាក់ ២៥ ០០០ដុល្លារ ដល់អង្គការយុវជនខ្មែរ និងការអភិវឌ្ឍសង្គម (KYSD) ក្រោមជំនួយឧបត្ថម្ភនៃមូលនិធិអភិរក្ស និងការពារបរិស្ថានជាសកលរបស់ Ford (Ford Conservation and Environmental Grants Initiative)។
មូលនិធិនេះ អាចឲ្យ KYSD សាងសង់អណ្ដូងទឹក១៦ នៅខេត្តកំពង់ស្ពឺ និងត្បូងឃ្មុំ ដើម្បីផ្ដល់ទឹកស្អាតដល់ប្រជាជនរស់នៅក្នុងតំបន់ និងជួយកាត់បន្ថយការលំបាកប្រចាំថ្ងៃ ដោយអណ្ដូងទាំងនេះ នឹងផ្គត់ផ្គង់ទឹកស្អាតដល់មនុស្សជាង ១ ២០០នាក់ (ជាង២០០គ្រួសារ)។
លោក សេង វឹង នាយកគ្រប់គ្រងផ្នែករថយន្ត Ford បាននិយាយថា៖ "រៀងរាល់ឆ្នាំ យើងបានសហការជាមួយអង្គការមិនស្វែងរកប្រាក់ចំណេញ ក្នុងការស្វែងរកសហគមន៍ជនបទដែលកំពុងខ្វះខាតទឹកស្អាតប្រើប្រាស់ ហើយយើងប្រឹងប្រែងដើម្បីជួយសម្រាលការលំបាកដល់ប្រជាជនក្នុងតំបន់នោះ"។
Ford ក៏បានចូលរួមចំណែកជាមួយ KYSD ដើម្បីសាងសង់បណ្ណាល័យមួយខ្នងក្នុងឃុំចក ស្រុកអូររាំងឪ ខេត្តត្បូងឃ្មុំ ដោយបណ្ណាល័យនេះ នឹងក្លាយជាកន្លែងសិក្សា និងស្រាវជាវសម្រាប់សិស្សជាង ៦០០នាក់ក្នុងតំបន់នោះ។
KYSD ជាអង្គការមិនរកប្រាក់ចំណេញមួយដែលមានគោលបំណងកាត់បន្ថយភាពក្រីក្រនៅកម្ពុជាដោយលើកទឹកចិត្តឲ្យយុវជនធ្វើការសម្របសម្រួលជាមួយអ្នកដទៃ ដើម្បីនាំយកការអភិវឌ្ឍន៍ទៅតំបន់ដាច់ស្រយាល។
គម្រោងមូលនិធិអភិរក្ស និងការពារបរិស្ថានរបស់ Ford បានបង្កើតតាំងពីឆ្នាំ១៩៨៣ ដើម្បីជំរុញបុគ្គល និងអង្គការនានាឲ្យធ្វើការស្រាវជ្រាវលើគម្រោងផ្សេងៗ ព្រមទាំងណែនាំប្រជាពលរដ្ឋឲ្យចេះស្រលាញ់ និងការពារបរិស្ថានក្នុងសហគមន៍ពួកគេ៕