មិនបាច់ចូលហាងក៏បាន ៣កន្លែងនៅភ្នំពេញលក់ខោអាវស្អាតៗហើយថោកទៀត

2017-10-10 07:39:45
ចំនួនមតិ 0 | ចំនួនចែករំលែក 0

ចន្លោះមិនឃើញ

ដើរផ្សារទិញខោអាវជារឿងដ៏ពេញនិយមមួយសម្រាប់យុវវ័យ មិនថាបុរស ឫនារីនោះទេ។ ប៉ុន្តែភាគច្រើនពេលដើរផ្សារម្ដងៗ មិនថាអ្នកណាក៏ចង់រកកន្លែងលក់សំលៀកបំពាក់ស្អាតៗ ហើយថោកដែរ ជាពិសេសអាចតថ្លៃបានទៀត។ ថ្ងៃនេះ Sabay សូមនាំប្រិយមិត្តអ្នកអានទាំងអស់គ្នា មកស្គាល់កន្លែងលក់ខោអាវស្អាត ៣កន្លែងនៅភ្នំពេញ ល្បីសម្បូរម៉ូតស្អាតៗ និងតម្លៃសមរម្យដូចខាងក្រោមនេះ៖

១. កាច់ជ្រុងផ្សារបឹងកេងកង

បើជិះកាត់ផ្លូវនៅក្រោយវិទ្យាល័យបឹងកេងកង នៅកាច់ជ្រុងជិតផ្សារតែម្ដងប្រិយមិត្តនឹងឃើញ តូបលក់សំលៀកបំពាក់ជាច្រើនតាំងលក់រយីងរយោងមានគ្រប់ម៉ូត ជាពិសេសសំលៀកបំពាក់របស់បុរស។ បើតាមការឱ្យដឹងពីអ្នកលក់ម្នាក់សុំមិនបញ្ចេញឈ្មោះប្រាប់ថា នៅទីនេះមានលក់សំលៀកបំពាក់គ្រប់ម៉ូតមិនថា អាវក្រណាត់ អាវយឺត ខោខោវប៊យជើងវែងជើងខ្លី ខោក្នុង។ល។

សំលៀកបំពាក់ទាំងនោះត្រូវបានអ្នកលក់ប្រាប់ថា ភាគច្រើននាំចូលពីប្រទេសថៃ ហុងកុងជាដើម។ ក្រៅពីនោះសំលៀកបំពាក់ខ្លះគឺផលិតនៅប្រទេសកម្ពុជាផ្ទាល់ ប៉ុន្តែសុទ្ធតែសាច់ក្រណាត់ល្អ។ ចំណែកតម្លៃទាបបំផុតត្រឹម ៣ ឫ ៤ដុល្លារ ហើយចំពោះតម្លៃខ្ពស់បំផុតត្រឹម ២០ដុល្លារប៉ុណ្ណោះ និងអាចតថ្លៃបានទៀតផង។

២. ក្រោយក្រសួងដែនដីនៅកាច់ជ្រុងផ្សារបឹងត្របែក

ចុះពីផ្លូវមុនីវង្សចូលតាមច្រកផ្លូវនៅជាប់ក្រសួងដែនដី ជិះទៅត្រង់បន្តិចប្រិយមិត្តនឹងឃើញកន្លែងលក់សំលៀកបំពាក់ជាច្រើននៅជាប់នឹងផ្លូវសុទ្ធតែខោអាវស្អាតៗ។ បើតាមអ្នកស្រីយ៉ា ជាអ្នកលក់សំលៀកបំពាក់នៅទីតាំងនេះប្រាប់ថា នៅកន្លែងនេះមានខោអាវគ្រប់ម៉ូត គ្រប់ជម្រើស គ្រប់ពណ៌ សាច់ក្រណាត់ល្អៗ និងនាំចូលពីប្រទេសថៃ ហុងកុង មិនចាញ់ក្នុងហាងទេ។

ចំណែកឯតម្លៃវិញអ្នកលក់សំលៀកបំពាក់ខាងលើប្រាប់ថា តម្លៃធូរជាងក្នុងហាងមានចាប់ពី ៣ដុល្លាររហូតដល់ ២០ដុល្លារអាស្រ័យទៅលើម៉ូត និងសាច់ក្រណាត់ ប៉ុន្តែអាចតថ្លៃបាននៅត្រឹម ១៤ ទៅ ១៥ដុល្លារប៉ុណ្ណោះ។

៣. នៅខាងកើតវត្តភ្នំពេញជិតមន្ទីរពេទ្យព្រះកេតុមាលា

ចំណែកកន្លែងលក់សំលៀកបំពាក់ទី៣នេះវិញ ក៏សម្បូរមិនធម្មតាដែរ ប៉ុន្តែភាគច្រើនមានលក់ខោអាវជជុះប៉ុន្តែសុទ្ធតែក្បាលគីប មិនចាញ់ថ្មីប៉ុន្មានឡើយ។ អ្នកលក់សំលៀកបំពាក់នៅម្ដុំនោះ ប្រាប់ថា ភាគច្រើនអ្នកមិនសូវសម្បូរលុយ គេចូលចិត្តមកទិញណាស់ ព្រោះធូរថ្លៃហើយពាក់បានដូចគ្នា។ ចំពោះតម្លៃខ្ពស់បំផុតត្រឹម ៣ ទៅដុល្លារ ចំណែកឯតម្លៃទាបបំផុតត្រឹម ៥០០រៀលក៏មានដែរ៕