បុរសខ្មែរឥស្លាម ប្រើពេលជាងពាក់កណ្ដាលជីវិត នៅលើទូកនេសាទ
- 2017-10-11 06:27:05
- ចំនួនមតិ 0 | ចំនួនចែករំលែក 0
បុរសខ្មែរឥស្លាម ប្រើពេលជាងពាក់កណ្ដាលជីវិត នៅលើទូកនេសាទ
ចន្លោះមិនឃើញ
អណ្ដែតឃ្លេងឃ្លោងៗលើផ្ទៃទឹកទន្លេសាប មុខព្រះបរមរាជវាំង បុរសខ្មែរឥស្លាមវ័យ៥៨ឆ្នាំម្នាក់ បានអង្គុយលើទូករៀបរាប់ពីខ្សែជីវិតរបស់ខ្លួនថា លោករស់នៅលើទូកតាំងពីបឋមវ័យមកម្លេះ ព្រោះថាមិនមានផ្ទះសម្បែង ហើយបានចាប់របរតពីដូនតា ជាអ្នកនេសាទនេះរៀងរហូតមក។
អ្នកនេសាទខ្មែរឥស្លាមរូបនេះ មានឈ្មោះថា ជ្រេស រូន។ កំពុងជួសជុលទូក និងឧបករណ៍នេសាទ លោក ជ្រេស រូន និយាយថា របរនេសាទតូចតាចរបស់លោកសព្វថ្ងៃនេះ សឹងមិនអាចទ្រទ្រង់ជីវភាពគ្រួសារបានទេ ដោយថាចំនួនត្រីកាន់តែតិចទៅៗ។ ក្នុងមួយថ្ងៃ រាប់តាំងពីព្រលឹមដល់ល្ងាច លោកថារកចំណូលបានពីពីរម៉ឺន ទៅប្រាំម៉ឺនរៀលប៉ុណ្ណោះយ៉ាងច្រើន។
ចំណែកប្រាក់ដែលរកបាន លោកថាត្រូវចំណាយលើប្រេងម៉ាស៊ីនទូក សងបំណុលដែលខ្ចីទិញអង្ករ និងទុកជួសជុលឧបករណ៍នេសាទ រួមមាន មង សំណាញ់ ចារ៉ា ជាដើម ពោលប្រាក់ដែលរកបាន គ្មាននៅសល់នោះឡើយ។ លោក ជ្រេស រូន និងភរិយា គឺអ្នកស្រី សារ៉ស់ បានចាប់ដៃគ្នាជាប្ដីប្រពន្ធតាំងពីឆ្នាំ១៩៨៤ ហើយមានកូនប្រុសស្រី៨នាក់។ បច្ចុប្បន្នកូនទាំង៨បានរៀបការ និងបែកចេញពីលោកអស់ហើយដែរ។
ទូកតូចយោលយោគទៅមកតាមរលកទឹកទន្លេ ប្រឡាក់ជាប់ដោយក្លិនមច្ឆា គឺជាទីអាស្រ័យអចិន្ត្រៃយ៍របស់ប្ដីប្រពន្ធអ្នកទាំងពីរ។ នេះបើតាមការរៀបរាប់របស់លោក ជ្រេស រូន។ របរនេសាទនេះ មិនបានផ្ដល់ក្ដីសង្ឃឹមឲ្យលោកថានឹងអាចសល់ប្រាក់ខ្លះ ដើម្បីទិញដីធ្វើផ្ទះនឹងគេបានឡើយ តែយ៉ាងណាក៏ដោយ លោកនៅតែខំព្យាយាមទាំងថ្ងៃទាំងយប់ ដើម្បីរកចំណូលប្រចាំថ្ងៃ។ លោក ជ្រេស រូន បន្ថែម៕