នាយកផ្នែកព័ត៌មានវិទ្យារបស់ Cellcard ទើបទទួលបានពានអ្នកដឹកនាំឆ្នើម

2017-10-12 08:05:08
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក លឹម សុខសុផៃ នាយកផ្នែកព័ត៌មានវិទ្យារបស់ Cellcard បានទទួលពានរង្វាន់ជាអ្នកដឹកនាំឆ្នើមក្នុងវិស័យព័ត៌មានវិទ្យា និងសន្តិសុខព័ត៌មាន នៅក្នុងកម្មវិធីអាស៊ាន CIO Awards (Chief Information Officers) ២០១៧ កាលពីថ្ងៃទី៦ តុលា នៅវៀតណាម។

ការវាយតម្លៃរបស់បេក្ខជន ផ្អែកលើលក្ខណៈវិនិច្ឆ័យ ៣កម្រិត ល្អណាស់ ៣ពិន្ទុ ល្អ ២ពិន្ទុ និងមធ្យម ១ពិន្ទុ ហើយលក្ខខណ្ឌក្នុងការវាយតម្លៃមានចំណុចសំខាន់ៗដូចជា មាត្រដ្ឋាននៃអង្គភាព សមត្ថភាព និងបទពិសោធន៍របស់បេក្ខជន បទបង្ហាញពីគម្រោង និងផលវិបាក រួមជាមួយទំនួលខុសត្រូវសង្គម ដោយមានក្រុមគណៈកម្មការធ្វើការកាត់សេចក្ដីនៅវគ្គផ្ដាច់ព្រ័ត្រ។

លោក លឹម សុខសុផៃ នាយកផ្នែកព័ត៌មានវិទ្យា Cellcard បាននិយាយថា៖ "ពានរង្វាន់នេះ ជាភស្តុតាងនៃសមិទ្ធផលការងារដ៏អស្ចារ្យ និងប្រកបដោយភាពច្នៃប្រឌិតនៃក្រុមព័ត៌មានវិទ្យាទាំងមូលដោយមានការជ្រោមជ្រែង និងលើកទឹកចិត្តពីថ្នាក់ដឹកនាំខាងលើរបស់ក្រុមហ៊ុន"។

ក្រៅពីពានរង្វាន់នេះ Cellcard ក៏ធ្លាប់ឈ្នះពានរង្វាន់ ៦ឆ្នាំជាប់គ្នារួចមកហើយ ជាពានរង្វាន់ក្រុមហ៊ុនឆ្នើមបំផុតនៅអាស៊ីតាំងពី ២០១២ ដល់ ២០១៧ ហើយត្រូវបានគេទទួលស្គាល់ជាក្រុមហ៊ុនផ្ដោតសំខាន់លើការវិវឌ្ឍរបស់បុគ្គលិក ព្រមទាំងលើកកម្ពស់ឲ្យមានតុល្យភាពការងារ និងជីវិតផ្ទាល់ខ្លួន។

ពានរង្វាន់អាស៊ាន CIO ជាព្រឹត្តិការណ៍ប្រចាំឆ្នាំមួយដែលរៀបចំដោយ IDG (The International Data Group) អាស៊ាន ដែលប្រមូលផ្តុំមេដឹកនាំលើវិស័យព័ត៌មានវិទ្យា និងសន្តិសុខព័ត៌មាន ដែលកំពុងមានឥទ្ធិពលនៅក្នុងអង្គភាព និងសហគមន៍របស់ខ្លួន៕