ក្មេងប្រុសវៀតណាម អាយុ៣ឆ្នាំ ជិះលើសត្វពស់ថ្លាន់ដ៏ធំ ដោយមិនញញើតបន្តិចសោះ

2017-10-15 03:53:56
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីពេលថ្មីៗនេះ វីដេអូដ៏គួរឲ្យភ្ញាក់ផ្អើលមួយ បានបង្ហាញឲ្យឃើញ ក្មេងប្រុសជនជាតិវៀតណាម អាយុ៣ឆ្នាំម្នាក់ ជិះនៅលើសត្វពស់ថ្លាន់ដ៏ធំមួយក្បាល ដោយមិនមានភាពភ័យខ្លាច ឬញញើតសូម្បីតែបន្តិច ខណៈប្រទេសវៀតណាមកំពុងជួបគ្រោះទឹកជំនន់។

សត្វពស់ថ្លាន់ដ៏ធំនោះមានប្រវែង ៦ម៉ែត្រ ជាសត្វចិញ្ចឹមរបស់គ្រួសារក្មេងប្រុសខាងលើ ដែលស្ថិតនៅខេត្ត Thanh Hoa ភាគខាងជើង ប្រទេសវៀតណាម។

ក្រោយពេលវីដេអូនោះបានបង្ហោះទៅលើបណ្ដាញសង្គមរួចមក ក៏មានអ្នកប្រើប្រាស់មួយចំនួនអះអាងថា វាគ្រាន់តែជាវីដេអូកាត់តប៉ុណ្ណោះ ប៉ុន្តែគ្រួសារក្មេងប្រុសខាងលើ បានឆ្លើយតបថាវាជាការពិត។

ម្ដាយមីងរបស់ក្មេងប្រុសខាងលើ មានឈ្មោះថា An Nguyen ប្រាប់ឲ្យដឹងថា ពស់ថ្លាន់នោះមានទម្ងន់រហូតដល់ទៅ ៨០គីឡូក្រាមឯណោះ ហើយគ្រួសារនេះបានចិញ្ចឹមវា អស់រយៈពេល ៤ឆ្នាំមកហើយ និងអះអាងថាវាស្លូតទៀតផង។ អ្នកស្រី An Nguyen បានបន្ថែមឲ្យដឹងថា ដោយសារតែមានភ្លៀង និងទឹកជន់លិច ទើបពួកគេប្រលែងពស់នោះចេញក្រៅតែម្ដង។

គួររំលឹកឲ្យថា គ្រោះទឹកជំនន់ បានវាយប្រហារលើប្រទេសវៀតណាម បណ្ដាលឲ្យមនុស្សចំនួន ៥៤នាក់ស្លាប់បាត់បង់ជីវិត និងជន់លិចផ្ទះសម្បែងរាប់ពាន់ខ្នងទៀតផង៕

សូមទស្សនាវីដេអូខាងក្រោម៖

ចុចអាន៖

ប្រភព៖ Dailymail ប្រែសម្រួល៖ សេង ឡុង