មកដឹងរឿងរ៉ាវស្នេហាខ្លះៗរបស់ សាន ស្រីឡៃ មុនបុរសម្នាក់បាញ់សម្លាប់នាង

2017-10-16 12:14:54
ចំនួនមតិ 0 | ចំនួនចែករំលែក 0

ចន្លោះមិនឃើញ

ហេតុការណ៍បាញ់សម្លាប់ដ៏សាហាវទៅលើអតីតបេក្ខភាព អតីតបេក្ខភាព The Voice Camboida រដូវកាលទី២ អ្នកនាង សាន ស្រីឡៃ នៅរសៀលនេះ នៅមិនទាន់ដឹងមូលហេតុឡើយ។

មុនសមត្ថកិច្ចស្រាវជ្រាវរកឃើញពីដើមចមបណ្តាលឲ្យមានការបាញ់សម្លាប់ទៅលើតារាចម្រៀងរូបនេះ Sabay សូមបង្ហាញនូវរឿងទាក់ទងនឹងស្នេហាខ្លះៗរបស់អ្នកនាង សាន ស្រីឡៃ។

បន្ទាប់ពីចូលរួមប្រឡងកម្មវិធីលំដាប់ពិិភពលោក The Voice Camboida រដូវកាលទី២ មានទស្សនិកជនស្គាល់ និងគាំទ្រច្រើន មានលេចនូវរឿងរ៉ាវថា សាន ស្រីឡៃ មានពាក់ព័ន្ធនឹងស្វាមីគេ ប៉ុន្តែសាមីខ្លួនធ្លាប់បានអះអាងប្រាប់ Sabay ថា មិនដូចអ្វីដែលគេបានលើកឡើងទាំងអស់នោះទេ។ នាងថា រឿងរ៉ាវទាំងនេះវាជារឿងអតីត កើតឡើងតាំងពីជាង១០ឆ្នាំមុនមកម្ល៉េះ ដោយគាត់បានលែងគ្នាដាច់ស្រេចហើយ។

នាងបន្តទៀតថា រឿងរ៉ាវស្វាមីនាង និងអ្នកមុនកើតឡើងយូរហើយ ហេតុអ្វីបានជាមានគេគាស់កកាយឡើងវិញ នៅពេលដែលនាងកំពុងមានកេរ្ត៍ឈ្មោះក្នុងពិភពសិល្បៈបែបនេះ? យ៉ាងណាមិញនាងប្រាប់ថា នាងមិនខ្វល់ឡើយ ចង់ពួកគេនិយាយអ្វីក៏ដោយចុះ ព្រោះរឿងនេះ មិនមែនជាការពិតឡើយ។

ក្រោយមកទៀតនៅដើមឆ្នាំ ២០១៧ ក៏មានដំណឹងថា នាងបែកបាក់ជាមួយស្វាមី ហើយថែមទាំងបានទម្លាយរឿងរ៉ាវផ្ទាល់ខ្លួនថា នាងកំពុងតែស្ថិតក្នុងស្ថានភាពមួយ លំបាក ដោយសារខ្លួនមួយត្រូវរ៉ាប់រងបន្ទុកគ្រួសារទាំងមូល។

ក្នុងបន្ទុកគ្រួសារមានសមាជិក ៦នាក់សុទ្ធតែមិនទាន់មានការងារ ប្អូននិងកូនៗ ៤នាក់ កំពុងនៅសិក្សា និងមានម្ដាយនៅមើលថែផ្ទះសម្បែង លើកលែង ស្រីឡៃ កំពុងច្រៀងរកថវិកាទំនុកបម្រុងគ្រួសារម្នាក់ឯង៕

អត្ថបទ៖ ដេត ធន្នី