វិមានសន្តិភាព មានយុវជនជាមគ្គទេសក៍សម្រាប់អ្នកចូលទស្សនា

2017-10-18 01:22:10
ចំនួនមតិ 0 | ចំនួនចែករំលែក 0

ចន្លោះមិនឃើញ

កញ្ញា អ៊ាន ម៉ានិត ជានិស្សិតផ្នែកទំនាក់ទំនងអន្តរជាតិកំពុងសិក្សាឆ្នាំទី៣ នៅសាកលវិទ្យាល័យបញ្ញាសាស្ត្រ។ ក្រៅពីការសិក្សា ម៉ានិត បានចំណាយពេលទៅលើការងារស្ម័គ្រចិត្តឲ្យស្របតាមមុខវិជ្ជាដែលខ្លួនរៀន ខណៈដែលម៉ានិតក៏មានការងារជាជំនួយការនៅក្នុងស្ថាប័នរដ្ឋមួយផងដែរ។

(កញ្ញា អ៊ាន ម៉ានិត ឈរនៅខាងស្ដាំដៃ)

យុវតី ម៉ានិត បានរៀបរាប់ពីបទពិសោធន៍ចូលបម្រើការងារស្ម័គ្រចិត្តជាមុគ្គទេសក៍នាំសាធារណជនចូលទស្សនកិច្ច វិមានសន្តិភាព ដែលជាគម្រោងរបស់សហភាពសហព័ន្ធយុវជនកម្ពុជា(សសយក) ។ ម៉ានិត និយាយថាៈ « ការងារនេះ ខ្ញុំមិនទទួលបានកម្រៃអ្វីឡើយ តែខ្ញុំពេញចិត្តនិងស្រលាញ់ការងារនេះ ព្រោះវាត្រូវនឹងជំនាញដែលខ្ញុំកំពុងរៀន»។

ម៉ានិត បន្តថាៈ «នៅពេលដែលខ្ញុំចូលបម្រើការដំបូង ខ្ញុំត្រូវបានសិស្សច្បងនៃក្រុមកាងារ បង្វឹករយៈពេលកន្លះខែ ឲ្យខ្ញុំក្លាហាន ហ៊ាននិយាយ ហើយខ្ញុំទទួលបានចំណេះដឹងជាច្រើន ពាក់ព័ន្ធនឹងការងារមុគ្គទេសក៍ណែនាំសាធារណជននដឹងពីវិមានសន្តិភាព។ ជាពិសេសនោះ ខ្លួនខ្ញុំផ្ទាល់ ទទួលចំណេះដឹងពីរបៀបវារៈនៃការទទួលភ្ញៀវលំដាប់អន្តរជាតិនៅវិមានសន្តិភាពនេះថែមទៀត»។

លោក វ៉ា ណារិទ្ធ អ្នកសម្របសម្រួលនៃគម្រោងកម្មវិធីទស្សនកិច្ចវិមានសន្តិភាព បានឲ្យដឹងថា គម្រោងនេះ បានបង្កើតឡើងនៅថ្ងៃទី ១៩ តុលា ឆ្នាំ ២០១៦ ពោលគឺជិតមួយឆ្នាំហើយ ក្រោមការគាំទ្ររបស់ប្រមុខរដ្ឋាភិបាល។ គម្រោងនេះបានទទួលនិស្សិតឲ្យធ្វើការស្ម័គ្រប្រមាណ ២០នាក់ក្នុងមួយឆ្នាំៗ។ គោលបំណងសំខាន់នៃកម្មវិធី ដែលរៀបចំដោយ សហភាពសហព័ន្ធយុវជនកម្ពុជានេះ គឺធ្វើឡើងដើម្បី ផ្ដល់ឱកាសឲ្យយុវជន និងសាធារណជនទូទៅស្វែងយល់ អំពីមុខងារ និងការប្រើប្រាស់ វិមានសន្តិភាព និងទី២ បង្កើនភាពស្និទ្ធស្នាលរវាងប្រជាពលរដ្ឋទូទៅ និងថ្នាក់ដឹកនាំ។ លោកបន្តថាចំណុចមួយទៀតគឺ ជំរុញទឹកចិត្តយុវជនជំនាន់ក្រោយ អំពីភាពជាគំរូនៃភាពជាអ្នកដឹកនាំ និងពង្រីកស្មារតីមោទនភាពជាតិរបស់ប្រជាពលរដ្ឋខ្មែរ ចំពោះប្រជាជាតិកម្ពុជា តាមរយៈមហាស្ថាបត្យកម្ម វិមានសន្តិភាព។ គម្រោងទស្សនកិច្ចនេះ នឹងប្រព្រឹត្តទៅតាមកម្មវិធី និងសកម្មភាពទស្សនកិច្ចតាមសាលសន្និសីទ និងបន្ទប់ប្រជុំសំខាន់ៗដោយរួមជាមួយខ្លឹមសារបរិយាយលើ គោលបំណង មូលហេតុ និងប្រវត្តិនៃការកសាងវិមានសន្តិភាព រចនាបថ និងប្រភេទនៃស្ថាបត្យកម្ម ក៏ដូចជាស្ថាបនិក និងស្ថាបត្យករ ក៏មានផងដែរការរៀបរាប់ប្រាប់ពីសាវតានៃការប្រើប្រាស់វិមានសម្រាប់កិច្ចប្រជុំ និងព្រឹត្តិការណ៍សំខាន់ៗ និងខ្លឹមសារពាក់ព័ន្ធដទៃទៀត។

គួរជម្រាបថា ចំពោះសាធារណជនដែលចង់ចូលទស្សនាវិមានសន្តិភាព អាចចុះឈ្មោះតាមរយៈ សហភាពសហព័ន្ធយុវជនកម្ពុជា ហើយដំណើរទស្សនកិច្ចនឹងធ្វើឡើងរៀងរាល់ខែ និងមិនត្រូវបានគិតតម្លៃឡើយ៕

អត្ថបទ៖ ស៊ិន សាវ៉េត

រូបភាព៖ ផ្ដល់ឲ្យ