iPhone X ជាង ៤៦ ៥០០ គ្រឿងបញ្ជូនចេញពីរោងចក្រ Foxconn ត្រៀមកើបលុយ

2017-10-18 01:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រភពព័ត៌មានពី Xinuanet ផ្សាយថា ក្រុមហ៊ុន Apple បានដឹកជញ្ជូនផលិតផលសម្រេច iPhone X ជាលើកដំបូងចេញពីរោងចក្រតៃវ៉ាន់ Foxconn ក្រោយផលិត និងដំឡើងរួចក្នុងបិរមាណឆ្ងាយពីការរំពឹងទុកហើយខ្លួននឹងត្រៀមដាក់លក់ទ្រង់ទ្រាយធំក្នុងរយៈពេលមិនដល់ពីរសប្តាហ៍ទៀត។

iPhone X

ការនាំចេញផលិតផលពីរោងចក្រលើកដំបូងនឹងធ្វើឱ្យទូរសព្ទ iPhone X របស់ក្រុមហ៊ុនអាមេរិក Apple កាន់តែបោះជំហានឈានដើម្បីទៅដល់ដៃអតិថិជនបន្ទាប់ពីមានការពន្យាពេលត្រូវបានរាយការណ៍។

ប្រភពដដែលពី Xinhuanet ឱ្យដឹងថា ការនាំចេញផលិតផល iPhone X ពីរោងចក្រស្ថិតក្នុងទីតាំងក្នុងទីក្រុង Zhengzhou និងក្រុងសៀងហៃ កាលពីថ្ងៃចន្ទម្សិលមិញនេះ ហើយទូរសព្ទគំរប់ខួប១០ឆ្នាំ របស់ក្រុមហ៊ុនត្រូវបានរាយការណ៍ថាបានបញ្ជូនទៅកាន់ប្រទេសហូឡង់ និងអារ៉ាប់រួម។

យ៉ាងណាមិញការនាំចេញ iPhone X លើកដំបូងនេះនឹងមិនអាចបំពេញតម្រូវការរបស់អតិថិជនខ្លួនបានឡើយដែលទីតាំងទាំងពីររបស់ក្រុម Foxconn ផលិតបានត្រឹមតែ ៤៦ ៥០០ គ្រឿងប៉ុណ្ណោះខណៈការបញ្ជាកុម្ម៉ង់ទិញលើសពី ៥០ លានគ្រឿងឯណោះ។

Foxconn ត្រូវបានគេរាយការណ៍ថាអាចផលិតបន្ថែមដើម្បីបង្កើនសង្វាក់ផលិតកម្មរបស់ខ្លួនរហូតដល់ ៤០០ ០០០ គ្រឿងក្នុង១សប្តាហ៍ តែយ៉ាងណាក៏ដោយក៏ Apple នៅតែមិនអាចផ្គត់ផ្គង់តម្រូវការទីផ្សាររបស់អតិថិជនបានដែរ។

ទន្ទឹមគ្នានេះដែរលោក Ming-Chi Kuo អ្នកវិភាគដ៏ល្បីល្បាញជឿជាក់ថា ក្រុមហ៊ុន Apple អាចនាំចេញ iPhone X ត្រឹមតែ៣០ លានគ្រឿងទៅ ៣៥ លានគ្រឿងតែប៉ុណ្ណោះនៅដំណាច់ឆ្នាំ ២០១៧ នេះ មានន័យថា អ្នកដែលកុម្ម៉ង់ទិញនឹងត្រូវរង់ចាំទូរសព្ទថ្មីឆ្នាំក្រោយ។

ព័ត៌មានថ្មីនៃការដឹកជញ្ជូន iPhone X មិនទាន់ត្រូវបានបញ្ជាក់ជាផ្លូវការដោយ Apple ទេតែក្រុមហ៊ុន និងដៃគូផលិតរបស់ខ្លួននឹងបង្កើនសង្វាក់ផលិតកម្មដើម្បីបំពេញតម្រូវការដ៏ពុះកញ្ជ្រោលខណៈវានឹងដាក់លក់នៅថ្ងៃទី ៣ វិច្ឆិកាខាងមុខ៕