ដឹងតែល្អមើលមិនខាន ៤ គូវគ្គ Play-off សុទ្ធតែក្រុមមិនធម្មតា!

2017-10-17 13:40:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ខណៈការចាប់ឆ្នោតនៅទ្វីបអឺរ៉ុបទាក់ទងនឹងវគ្គ Play-off ដើម្បីឡើងទៅលេង World Cup ទើបតែបញ្ចប់អម្បាញ់មិញ ជាលទ្ធផលក្រុមជម្រើសជាតិ អ៊ីតាលី ត្រូវប៉ះជាមួយ ស៊ុយអែត ខណៈក្រូអាត នឹងត្រូវប្រកួតជាមួយ ក្រិក។

បន្ថែមពីលើគូពិសេសទាំងពីរខាងលើ ប្រទេស ៤ ទៀតក៏នឹងធ្វើការប្រកួតវគ្គនេះដែរ ពោលគឺ អៀរឡង់ខាងជើង ត្រូវប៉ះជាមួយ ស្វីស ចំណែកឯ ដាណឺម៉ាក ត្រូវប្រកួតជាមួយ សាធារណរដ្ឋអៀរឡង់។ ការប្រកួតវគ្គ Play-offទាំងនេះ ជើងទី១ នឹងធ្វើឡើងនៅចន្លោះពីថ្ងៃទី ៩ ដល់ថ្ងៃទី ១១ ខែវិច្ឆិកាខាងមុខ ខណៈជើងទី ២ នឹងធ្វើឡើងនៅចន្លោះថ្ងៃទី ១២ ដល់ថ្ងៃទី ១៤ ខែដដែល។

បើទោះជា អេហ្ស៊ីប និង នីហ្សេរីយ៉ា បានកក់កៅអី World Cup បានសម្រេចកាលពីពេលថ្មីៗនេះក្ដី នៅទ្វីបអាហ្វ្រិក ការប្រជែងគ្នានៅតែបន្ត ក្នុងវគ្គជម្រុះ World Cup ដោយការប្រកួតចុងក្រោយនឹងធ្វើឡើងក្នុងថ្ងៃទី ១៤ វិច្ឆិកា ខាងមុខ។

ក្រៅពីទ្វីបអឺរ៉ុប និងអាហ្វ្រិក ក៏មានបណ្ដាប្រទេសចំនួន ៤ទៀតដែលត្រៀមលេងវគ្គ Play-off ដើម្បីឡើងទៅលេង World Cup។ ក្នុងនោះ ប្រទេសអូស្ត្រាលី ត្រូវលេងជាមួយ ហុងឌុយរ៉ាស់ ទាំងពីរជើងនៅថ្ងៃទី ១០ និងទី ១៥ ខែវិច្ឆិកា ខណៈ នូវែលហ្សេឡង់ ត្រូវប្រកួតជាមួយ ប៉េរូ ទាំងពីរជើងនៅថ្ងៃទី ១១ និង ១៥ ខែវិច្ឆិកា។

រហូតមកទល់ពេលនេះ មានប្រទេសចំនួន ២៣ ហើយដែលបានកក់កៅអីបានសម្រេចក្នុងការទៅលេង World Cup នៅរុស្ស៊ីឆ្នាំក្រោយ៕