ហេតុផល២ហ្នឹងសោះ បានជាទឹកឃ្មុំធម្មជាតិ មិនសូវសម្បូរដូចមុន នៅខេត្តកោះកុង

2017-10-18 03:31:13
ចំនួនមតិ 0 | ចំនួនចែករំលែក 0

ចន្លោះមិនឃើញ

តើមានកត្តាអ្វីខ្លះដែលទឹកឃ្មុំធម្មជាតិមិនសូវសម្បូរដូចមុន? មិនសូវសម្បូរទឹកឃ្មុំធម្មជាតិ ទី១ ដោយសារតែ អ្នករកឃ្មុំឥឡូវរកឃើញឃ្មុំលក់ទាំងសំបុក លក់ទាំងកូនឃ្មុំ ទី២ ការកាប់រានដីព្រៃ ដើម្បីធ្វើការអភិវឌ្ឍផ្សេងៗ ញុំាងឲ្យគ្មានជម្រកឃ្មុំ ជាដើម។ នេះជាការលើកឡើងរបស់ លោក អឺង បាន គណៈកម្មការប្រមូលទិញទឹកឃ្មុំ ក្នុងសហគមន៍ភ្នំទ័ពជាង នៅភូមិព្រះអង្គកែវ ឃុំដងរែក ស្រុកស្រែអំបិល ខេត្តកោះកុង។

អស់រយៈពេល ១០ ឆ្នាំមកហើយ ដែល លោក អឺង បាន ចាប់មុខរបរជាអ្នកប្រមូលទិញទឹកឃ្មុំ។ កាលពីអំឡុងឆ្នាំ ២០០៧ លោក បាន អាចរកទិញឃ្មុំមួយរដូវ ខ្ទង់តោនទឹកឃ្មុំធម្មជាតិ យកទៅលក់ដែលធ្វើឲ្យឈ្មួញមួយចំនួនស្ទើរមិនជឿថា ឃ្មុំនៅឃុំដងរែក សម្បូរបែបនេះ។ ប៉ុន្តែ ២ឆ្នាំចុងក្រោយនេះ ទឹកឃ្មុំធម្មជាតិមិនសូវមាននោះទេ ដែលធ្លាប់ទិញ ១តោន ធ្លាក់មកនៅត្រឹម មិនដល់ ១០០ គីឡូនោះទេ។

«ធម្មជាតិរិចរិល ទឹកឃ្មុំក៏រិចរិល» ពាក្យនេះ លោកបាន ចង់សំដៅដល់ការបាត់បង់ព្រៃឈើជាទីជម្រករបស់ឃ្មុំ ព្រោះតែការអភិវឌ្ឍផ្សេងៗ។

លោកបាន និយាយថា ទឹកឃ្មុំធម្មជាតិ ដែលសម្បូរបំផុតនៅចន្លោះខែ មិថុនា ដល់ខែ សីហា។ ទឹកឃ្មុំខែប្រាំងទិញចូលថ្លៃជាងទឹកឃ្មុំខែវស្សា ព្រោះទឹកឃ្មុំល្អខាប់ មិនដូចទឹកឃ្មុំខែវស្សា រាវនោះឡើយ។

ទឹកឃ្មុំទិញខែប្រាំង គឺទិញចូលក្នុង ១លីត្រ ៦០ ០០០ រៀល (ទឹកឃ្មុំលេខ១) ហើយលក់ចេញ ១០០ ០០០ រៀល ប្រភេទទឹកឃ្មុំលេខ ២ លក់ចេញ តម្លៃ៨០០ ០០០រៀល និង លេខ៣, ៥០០ ០០០រៀល។ ចំពោះទឹកឃ្មុំទិញចូលខែវស្សា គឺតម្លៃ ៤០ ០០០ រៀល ក្នុង១លីត្រ ព្រោះទឹកឃ្មុំវស្សា មិនសូវល្អ ទឹកឃ្មុំរាវ និង ទុកមិនបានយូរក៏ប្រែពណ៌។

លោកបាន លើកឡើងទៀតថា ទឹកឃ្មុំនៅក្នុងសហគមន៍របស់លោក ភាគច្រើនលក់ឲ្យអង្គការសេដាក និងឈ្មួញនៅរាជធានីភ្នំពេញ។ ឯនៅសេសសល់តិចតួច លោកលក់នៅផ្ទះ។

សហគមន៍ភ្នំទ័ពជាង មានសមាជិក សរុប ៣៧០គ្រួសារ ក្នុងនោះ ៥០គ្រួសារ ជាសមាជិករកឃ្មុំធម្មជាតិ ហើយឃ្មុំដែលរកបានរមែងយកមកលក់ឲ្យលោក ដែលបានចាប់ផ្ដើមតាំងពីឆ្នាំ ២០០៧ រហូតមកទល់នឹងពេលនេះ៕

អត្ថបទ៖ ប៊ិន ប៊ុណ្ណា