នរណាអាចជាអ្នកចាត់ការថ្មីរបស់ Leicester City?

2017-10-18 03:53:35
ចំនួនមតិ 0 | ចំនួនចែករំលែក 0

ចន្លោះមិនឃើញ

Leicester City បានបណ្ដេញអ្នកចាត់ការទូទៅចេញពីតំណែងកាលពីយប់មិញយ៉ាងគួរឲ្យភ្ញាក់ផ្អើលជាទីបំផុតក្រោយដឹកនាំក្រុមចូលក្នុងតំបន់គ្រោះថ្នាក់ (លេខ១៨ក្នុងតារាង)។

Craig Shakespeare

ក្រុមជើងឯកអង់គ្លេសឆ្នាំ២០១៦ កាលពីរដូវកាលចាស់បានបណ្ដេញលោក Claudio Ranieri ម្ដងហើយ បន្ទាប់មកនៅរដូវកាលនេះសេដ្ឋីជនជាតិថៃបានឃ្នើសចិត្តបណ្ដេញលោក Craig Shakespeare ម្នាក់ទៀតបើទោះជាទើបតែងតាំងបាន៤ខែក៏ដោយ។

ក្រោយអវត្តមានអ្នកចាត់ការសញ្ជាតិអង់គ្លេស ក្លឹបឲ្យជំនួយការលោក Michael Appleton ដឹកនាំក្រុមជាបណ្ដោះអាសន្នរង់ចាំការតែងតាំងថ្មី។ បើតាមប្រភពពី BBC បានបង្ហាញបេក្ខភាពសំខាន់ៗមួយចំនួនដែល Leicester កំពុងចាប់អារម្មណ៍យកមកបំពេញកៅអីដែលទំនេរ។

Carlo Ancelotti ដែលត្រូវ Bayern Munich បណ្ដេញចេញ, អតីតគ្រូបង្វឹកជម្រើសជាតិអង់គ្លេស Sam Allardyce, អ្នកចាត់ការគ្មានការងារធ្វើ David Moyes និងអតីតអ្នកចាត់ការ Crystal Palace លោក Alan Pardew សុទ្ធតែជាគោលដៅរបស់ក្លឹប។ ក្នុងនោះក៏មានលោក Chris Coleman អ្នកចាត់ការជម្រើសជាតិវែល និង Roberto Mancini អតីតអ្នកចាត់ការ Manchester City ផងដែរ៕