មកដឹងតំណែងការងារកំពុងខ្វះអ្នកធ្វើនៅកម្ពុជា ល្បីប្រាក់ខែខ្ទង់ពាន់ដុល្លារ
- 2017-10-18 06:47:48
- ចំនួនមតិ 0 | ចំនួនចែករំលែក 0
មកដឹងតំណែងការងារកំពុងខ្វះអ្នកធ្វើនៅកម្ពុជា ល្បីប្រាក់ខែខ្ទង់ពាន់ដុល្លារ
ចន្លោះមិនឃើញ
តាមការលើកឡើងរបស់លោក ច័ន្ទ វាសនា ជាប្រធានផ្នែកធនធានមនុស្សក្នុងធនាគារកាណាឌីយ៉ា លើកឡើងថា មុខតំណែងដែលកំពុងត្រូវប៉ាន់ជាងគេ គឺផ្អែកទៅលើស្ថានភាពសេដ្ឋកិច្ចប្រទេសកម្ពុជាដែរ។ ជាក់ស្ដែងបច្ចុប្បន្ននេះកម្ពុជាកំពុងតែរីកចម្រើនខ្លាំង ទៅលើវិស័យអចលនទ្រព្យនិងសំណង់។ ដូច្នេះមុខតំណែងដែលកំពុងត្រូវប៉ាន់ទីផ្សារច្រើនជាងគេ គឺផ្នែកវិស្វករ និងអ្នកក្រាហ្វិកឌីហ្សាញទៅលើសំណង់អគារជាដើម។
លោក ច័ន្ទ វាសនា ក៏បានឱ្យដឹងទៀតថា មុខតំណែងនេះកំពុងត្រូវការធនធានមនុស្សច្រើន ខណៈនិស្សិតកម្ពុជាដែលសិក្សាទៅលើជំនាញនេះនៅមានកម្រិតនៅឡើយ។ ចំណែកឯគុណភាពក៏មិនទាន់ឆ្លើយតបនឹងតម្រូវការ។ ដូច្នេះហើយអ្នកដែលបញ្ចប់ការសិក្សាលើជំនាញនេះ ឫជំនាញណាដែលស្ថិតក្នុងផ្នែកបច្ចេកទេស គឺមានឱកាសច្រើន ជាពិសេសទទួលបានប្រាក់បៀវត្សខ្ពស់បើធៀបនឹងជំនាញដទៃទៀត។ បន្ទាប់ពីវិស័យសំណង់នេះ វិស័យហិរញ្ញវត្ថុក៏កំពុងដុះដាលខ្លាំងដែរ ឱ្យតែចេះច្បាស់លាស់ ក៏ប្រាក់ខែមិនធម្មតាដែរ។
បន្ថែមចំពោះការលើកឡើងនេះ ឯកឧត្ដម ហៃ ហ៊ុនឡេង ទីប្រឹក្សាក្រសួងការងារ និងបណ្ដុះបណ្ដាលវិជ្ជាជីវៈ និងជាអនុប្រធានទីភ្នាក់ងារជាតិនឹងមុខរបរ មានប្រសាសន៍ថា ការងារអ្វីក៏ដោយសុទ្ធតែល្អ និងត្រូវប៉ាន់ដូចគ្នាសម្រាប់យុវជន ប៉ុន្តែវាក៏អាស្រ័យទៅលើគុណភាព សមត្ថភាពរបស់យុវជនផ្ទាល់។ ឯកឧត្ដម បន្តទៀតថា ជាការពិតណាស់ធនធានមនុស្សផ្នែកវិទ្យាសាស្ត្រ បច្ចេកទេសនៅកម្ពុជា ពិតជានៅមានកម្រិតមែន។ ដូច្នេះអ្នកដែលសិក្សាទៅលើជំនាញបច្ចេកទេស ផ្នែកវិទ្យាសាស្ត្រ គឺអាចមានលទ្ធភាពរកចំណូលបានខ្ពស់នាពេលបច្ចុប្បន្ននេះ។
យ៉ាងណាក្ដី ឯកឧត្ដម ហៃ ហ៊ុនឡេង លើកឡើងថា ប្រាក់ខែតិច ឫច្រើនក៏អាស្រ័យលើសមត្ថភាពនឹងគុណតម្លៃខ្លួនឯងផ្ទាល់។ ជួនកាលការងារមុខតំណែងដូចគ្នា តែមានអ្នកប្រាក់ខែតិច និងអ្នកប្រាក់ខែច្រើន គឺអាស្រ័យលើការបំពេញការងារ បានល្អកម្រិតណា។ ដូច្នេះហើយជំនាញអ្វីក៏ដោយ ក៏ល្អដែរឱ្យតែចេះច្បាស់ និងមានសមត្ថភាពពិតប្រាកដ។
សូមជម្រាបជូនថា លោកទាំងពីរលើកឡើងបែបនេះ ក្នុងឱកាសសន្និសីទសារព័ត៌មានស្ដីពិព័រណ៍ការងារ និងផលិតភាពជាតិឆ្នាំ២០១៧ នៅឯក្រសួងការងារ និងបណ្ដុះបណ្ដាលវិជ្ជាជីវៈ។ ចំណែកឯព្រឹត្តិការណ៍ដ៏ធំប្រចាំឆ្នាំនេះ នឹងផ្ដល់ឱកាសការងារគ្រប់ប្រភេទប្រមាណ២ម៉ឺនមុខតំណែង សម្រាប់យុវជន សិស្ស/និស្សិត និងអ្នកកំពុងស្វែងរកការងារធ្វើជាមួយក្រុមហ៊ុនធំៗរហូតជាង១២០ ឯណោះ។
ពិព័រណ៍ការងារ និងផលិតភាពជាតិលើកទី៧ រៀបចំឡើងរយៈពេលពីរថ្ងៃ គឺថ្ងៃទី២៧ និង២៨ ខែតុលា ឆ្នាំ២០១៧ នៅសាលសន្និបាត និងពិព័រណ៍កោះពេជ្រ។ព្រឹត្តិការណ៍ថ្នាក់ជាតិដ៏ធំប្រចាំឆ្នាំមួយនេះ រៀបចំឡើងដោយ ក្រសួងការងារ និងបណ្ដុះបណ្ដាលវិជ្ជាជីវៈ សហការជាមួយ សហភាពសហព័ន្ធយុវជនកម្ពុជារាជធានីភ្នំពេញ និងសមាគមរោងចក្រកាត់ដេរកម្ពុជា(GMAC)៕
ចុចអានអត្ថបទពាក់ព័ន្ធ៖
កុំភ្លេចកាន់ CV ទៅកោះពេជ្រ ការងារ២ម៉ឺនកន្លែងកំពុងរង់ចាំនិស្សិតគ្រប់ជំនាញ
មកដឹងជំនាញទាំង៧ នៅកម្ពុជាល្បីរៀនចប់ប្រាក់ខែ អាចដល់ខ្ទង់ពាន់ដុល្លារ
៥យ៉ាងមិនអាចជៀសផុតនៅកន្លែងធ្វើការ បើមិនចេះទ្រាំមុខជាប្ដូរការងាររហូត
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
